Yoshlar siyosatidagi islohotlar ijrosi yuzasidan matbuot anjumani oʻtkazildi

Yurtimizda yoshlarga qaratilayotgan eʼtibor, gʻamxoʻrlik mamlakatimizda olib borilayotgan siyosatning eng ustuvor yoʻnalishlaridan biridir. Zero, yoshlar mamlakat kelajagi boʻlib, butun jamiyatning har tomonlama rivojlanishi barcha jabhalarda yoshlar faoliyati uchun yaratilayotgan sharoitlarga bogʻliq.

Amudaryo tumanida davlatimiz rahbari tashabbusi bilan yoshlar siyosatida amalga oshirilayotgan islohotlar ijrosi borasidagi ishlarga bagʻishlangan matbuot anjumani boʻlib oʻtdi.

Oʻzbekiston Respublikasi Prezidenti Administratsiyasi huzuridagi Axborot va ommaviy kommunikatsiyalar agentligi direktori hamda Qoraqalpogʻiston Respublikasi Vazirlar Kengashi Raisi tomonidan joriy yil 2-chorak uchun tasdiqlangan media-rejaga asosan tashkil etilgan matbuot anjumanida tuman hokimining yoshlar siyosati, ijtimoiy rivojlantirish va maʼnaviy-maʼrifiy ishlar boʻyicha oʻrinbosari Nodirbek Kamolov, Yoshlar ishlari agentligi tuman boʻlimi masʼullari, tuman hokimligi Axborot xizmati masʼullari, “Amudaryo” telekanali va “Taraqqiyot koʻzgusi” gazetasi jurnalist va muxbirlari ishtirok etdi.

Tadbirni tuman hokimi oʻrinbosari Nodirbek Kamolov kirish soʻzi bilan ochib berdi. U oʻz soʻzida bugungi kunda davlatimiz rahbari tomonidan ochiqlik va oshkoralik siyosatini amalga oshirishda ommaviy axborot vositalarining oʻrni va ahamiyatiga alohida eʼtibor qaratilayotgani xususida toʻxtaldi.

Matbuot anjumanida Yoshlar ishlari agentligi tuman boʻlimi boshligʻi Begzod Oʻrinboyev kun tartibidagi mavzu yuzasidan hisobot berdi.

Hisobotda taʼkidlanganidek, soʻnggi yillarda mamlakatimizda aholi, shu jumladan, yoshlarning ijtimoiy himoyaga muhtoj, turmush sharoiti ogʻir, ishsiz va kasb-hunarga ega boʻlmagan, huquqiy va maʼnaviy-psixologik qoʻllab-quvvatlashga zarurati boʻlgan qatlamiga davlat tomonidan manzilli koʻmaklashish boʻyicha mutlaqo yangicha tizim joriy qilindi. Bu boradagi islohotlar ijrosini taʼminlash yuzasidan tumanda keng koʻlamli ishlar olib borilmoqda.

Xususan, 2024-yil davomida 187 nafar yoshlar doimiy ish oʻrinlariga joylashtirilgan, 160 nafari kasb-hunarga oʻqitilgan, 246 nafariga subsidiya asosida mehnat qurollari berilgan, 1104 nafariga dehqonchilik uchun jami 400,5 gektar ekin maydonlari ajratib berilgan. Bundan tashqari, 364 nafar yoshlarga tadbirkorlik uchun kredit ajratilgan, 77 nafari harbiy xizmatga yuborilgan. Amalga oshirilgan ishlar natijasida 2024-yilning oʻzida 2 ming 138 nafar yoshlarning bandligini taʼminlashga erishilgan. 2025-yil boshidan shu kungacha “Yoshlar daftari”ga 203 nafar yoshlar kiritilgan boʻlib, ularning 119 nafariga amaliy yordamlar koʻrsatilgan. Hozirda yoshlar daftaridagi 86 nafar yoshlarni qoʻllab-quvvatlash, ularning bandligini taʼminlash, kasb-hunarga oʻqitish borasida tizimli ishlar tashkil etilmoqda.

Matbuot anjumanida ommaviy axborot vositalari vakillari tomonidan yoshlar siyosatidagi islohotlar ijrosi yuzasidan yoʻllangan savollarga masʼullar tomonidan aniq javoblar berildi.

Charos Arslonova, tuman hokimligining Axborot xizmati rahbari.