Boʻsh ish oʻrinlari yarmarkasida 30 nafar fuqaro doimiy ishga joylashtirildi

Aholi bandligini taʼminlash jamiyatning osoyishtaligi va barqarorligida muhim oʻrin tutadi. Shu bois, ishsizlikni kamaytirish, fuqarolarni munosib ish oʻrinlari bilan taʼminlash va ularning mehnat bozorida faol ishtirokini qoʻllab-quvvatlash maqsadida mamlakatimizda tizimli ishlar amalga oshirilmoqda.

Aholi bandligini oshirish va ishsizlikni kamaytirishga qaratilgan keng koʻlamli chora-tadbirlar doirasida yaqinda Oʻzbekiston Mahallalar uyushmasi tuman boʻlimi binosida tashkil etilgan mehnat yarmarkasi aholi uchun yangi ish imkoniyatlarini yaratishda muhim oʻrin tutadi. Amudaryo tumani hokimligi, tuman Kambagʻallikni qisqartirish va bandlikka koʻmaklashish boʻlimi hamda Amudaryo muhandislik texnologiyalari texnikumi hamkorligida oʻtkazilgan tadbirda tumandagi 33 ta korxona va tashkilot 175 ta boʻsh ish oʻrni bilan qatnashdi.

Tadbirda tuman prokurori yordamchisi Sanjar Abdullayev, Amudaryo muhandislik texnologiyalari texnikumi direktori Shuhrat Matirzayev, tuman IIB huzuridagi Probatsiya boʻlimi boshligʻi Ruslan Iskandarov, shuningdek, qator hamkor tashkilotlar va tijorat banklari vakillari qatnashdi.

Shu bilan birga, mehnat bozorida oʻz oʻrnini topish istagida boʻlgan 62 nafar ishsiz fuqaro, probatsiya hisobidagi shaxslar, aliment toʻlovchilar, nogironligi boʻlgan shaxslar hamda taʼlim muassasalarining bitiruvchi yoshlari ham mehnat yarmarkasida faol ishtirok etdi.

Tadbirni tuman Kambagʻallikni qisqartirish va bandlikka koʻmaklashish boʻlimi boshligʻi oʻrinbosari Bahodir Baltabayev kirish soʻzi bilan ochib, bu kabi tadbirlarning aholi bandligini taʼminlashda tutgan oʻrni, yangi ish oʻrinlari yaratish va fuqarolarni faol mehnat bozoriga jalb qilishdagi ahamiyati haqida toʻxtalib oʻtdi. Shundan soʻng, Amudaryo muhandislik texnologiyalari texnikumi direktori Shuhrat Matirzayev soʻzga chiqib, texnikumdagi mavjud taʼlim yoʻnalishlari va kasb-hunar oʻquv kurslari haqida batafsil axborot berdi. Kasbiy malaka oshirish orqali ishga joylashish imkoniyatlari alohida taʼkidlandi.

Yarmarkada Amir Temur ovul fuqarolar yigʻini hokim yordamchisi Temur Olloberganov soʻzga chiqib, davlat tomonidan aholi bandligini taʼminlash borasida yaratilayotgan shart-sharoitlar, subsidiyalar, imtiyozli kreditlar va ssudalar haqida maʼlumot berdi.

Mehnat yarmarkasida tuman Kambagʻallikni qisqartirish va bandlikka koʻmaklashish boʻlimi xodimlari tomonidan ishtirokchilarga qator amaliy yordamlar koʻrsatildi. Jumladan, boʻsh ish oʻrinlari haqida maʼlumotlar, ishga joylashish, kasb-hunarga oʻqish, xorijda ishlash imkoniyatlari va mehnat huquqlari boʻyicha huquqiy maslahatlar berildi.

Yarmarka davomida 30 nafar fuqaro, jumladan, 1 nafar nogironligi boʻlgan shaxs, 2 nafar mehnat muhojiri, 3 nafar taʼlim muassasalari bitiruvchisi hamda 24 nafar ishsiz fuqaro doimiy ishga joylashtirildi. Shuningdek, 2 nafar ishsiz fuqaro kasb-hunarga oʻqishga yoʻnaltirildi. Bundan tashqari, boʻlim xodimlari tomonidan tadbir ishtirokchilariga ishga joylashish, kasb-hunar va tadbirkorlikka oʻqitish, xorijda ishga joylashish hamda mehnat huquqlari boʻyicha huquqiy maslahatlar berildi.

Boʻsh ish oʻrinlari yarmarkasi aholi bandligini taʼminlash va yangi ish oʻrinlarini yaratish borasida amalga oshirilayotgan tizimli ishlar samaradorligini namoyon etgani bilan ahamiyatli boʻldi.

Shohzod Qurbonboyev.