Giyohvandlik – yoshlar kelajagiga tahdid

Bugungi kunda jamiyatimizda eng dolzarb muammolardan biri — bu giyohvandlik vositalari bilan bogʻliq holatlar, xususan, voyaga yetmaganlar oʻrtasida ushbu illatga moyillikning ortib borayotganidir. Giyohvand moddalarini noqonuniy tarzda sotib olish, isteʼmol qilish va tarqatish kabi holatlar soni ortib borayotgani hamda bu jarayonda yoshlarning ishtiroki tobora kengayib borayotgani jiddiy xavotir uygʻotmoqda. Bu holat nafaqat yosh avlodning, balki butun jamiyatning kelajagiga tahdid soladi.

Giyohvandlik moddalariga moyillik yoshlar orasida tez surʼatda tarqalmoqda. Bu esa ularning sogʻligʻiga jiddiy xavf tugʻdirish bilan birga, jinoyatchilikka moyillikni ham oshirayotganini koʻrsatadi. Voyaga yetmaganlar orasida giyohvandlikka oid jinoyatlarning soni ortishi nafaqat ota-onalar, balki barcha jamiyat aʼzolarini oʻylantirishi lozim. 

Yoshlar oʻrtasida bu illatning keng tarqalishi turli xil oqibatlarga olib kelmoqda: qonunbuzarlik, oʻgʻrilik, zoʻravonlik, jamoat joylarida tartibsizlik va eng achinarlisi — yuqumli kasalliklar, xususan, OITS kabi xastaliklarning tarqalishidir. 

Afsuski, ushbu muammoga qarshi, asosan, huquqni muhofaza qiluvchi organlari kurashmoqda, jamoatchilikning ishtirokisiz esa bunday illatni bartaraf etish deyarli mumkin emas. Buning ustiga, ayrim hollarda voyaga yetmaganlar kattalar tomonidan giyohvand moddalarni isteʼmol qilish yoki tarqatishga jalb qilinayotgani ham kuzatilmoqda. 

Giyohvand moddalarga mutaassib boʻlgan shaxslar moddaga muhtojlik hissi bilan har qanday jinoyatga qoʻl urishi mumkin. Ular modda uchun pul topish maqsadida avvalo mayda jinoyatlar, soʻngra esa ogʻir jinoyatlar sodir etishga moyil boʻlib qolishadi. 

Bugungi kunda davlat tomonidan bu muammoni bartaraf etishga qaratilgan qonunlar va amaliy chora-tadbirlar qabul qilingan. Voyaga yetmaganlar oʻrtasida profilaktik tadbirlar, tushuntirish ishlari olib borilmoqda. Huquqni muhofaza qiluvchi organlar, taʼlim muassasalari va mahallalar tomonidan sogʻlom turmush tarzi targʻib qilinmoqda. 

Shu bilan birga, giyohvand moddalarni isteʼmol qilishga yoki ular bilan bogʻliq jinoyatlarga boshqa shaxslarni jalb qilish holatlariga nisbatan jinoiy javobgarlikni kuchaytirish zarur. Bu nafaqat jinoyatga qarshi kurashda samara beradi, balki kelajakdagi ehtimoliy jabrlanuvchilarni ham asraydi.

Giyohvandlik — inson hayoti va kelajagini barbod etuvchi ijtimoiy xavfli illatdir. U jamiyatning rivojiga, taraqqiyotiga toʻsiq boʻladigan, axloqiy va maʼnaviy tanazzulga yetaklovchi asosiy omillardan biridir. 

Yoshlar xalqning tayanchi va kelajagi ekan, ularni ushbu illatdan asrash barchamizning burchimizdir. Har bir oila, taʼlim muassasasi, davlat idoralari va keng jamoatchilik birlashib harakat qilsa, shundagina bu illatga qarshi samarali kurash olib borish mumkin boʻladi. Oʻz navbatida, har bir fuqaro ham bu jarayonda faol ishtirok etishi zarur. Chunki, bir yoshning kelajagini saqlab qolish — butun jamiyatning kelajagini muhofaza qilish demakdir.

Shohzod Qurbonboyev tayyorladi.