Salqin ichimlik va muzqaymoq isteʼmolida ehtiyot boʻling

Kunlar isib boshlashi bilan aholi, xususan, yoshlar orasida salqin ichimliklar va muzqaymoqlarga boʻlgan talab ortishi kuzatiladi. Chanqoqni bosish va organizmni tetiklashtirish maqsadida bu kabi mahsulotlar keng isteʼmol qilinadi. Biroq ularni notoʻgʻri sharoitda saqlash va sotish holatlari inson salomatligi uchun jiddiy xavf tugʻdirishi mumkin.

Ayniqsa, ushbu mahsulotlarni isteʼmol qilish orqali oʻtkir yuqumli ichak kasalliklari, ovqatdan zaharlanish hamda yuqumli boʻlmagan boshqa kasalliklarning kelib chiqish ehtimoli yuqori. Shu bois isteʼmolchilar oʻz sogʻligʻini asrash maqsadida isteʼmolga masʼuliyat bilan yondashishi lozim.

Shu kunlarda Amudaryo tuman Sanitariya-epidemiologik osoyishtalik va jamoat salomatligi boʻlimi mutaxassislari tomonidan aholi gavjum joylar — bozorlar, kafeler va jamoat maskanlarida salqin ichimliklar, muzqaymoqlar hamda tez buziladigan mahsulotlardan zaharlanish holatlarining oldini olish maqsadida profilaktik tadbirlar oʻtkazilmoqda. Turgʻun savdo shoxobchalarida sotilayotgan mahsulotlardan namunalar olinib, boʻlim laboratoriyasida ularning kimyoviy va bakteriologik tarkibi tekshirilmoqda.

Muzqaymoqlar sut mahsulotlari toifasiga kiradigan, oziqaviy qiymati yuqori va tez buziladigan mahsulotlar sirasiga kiradi. Salqin ichimliklar esa chanqoqni bosishda keng qoʻllaniladi. Ushbu mahsulotlarning xavfsiz isteʼmoli ularning belgilangan sanitariya qoidalari va davlat standartlariga muvofiq saqlanishi hamda sotilishiga bogʻliq.

Jumladan, yumshoq — frezerli muzqaymoqlar faqat turgʻun savdo nuqtalaridan sotilishi mumkin. Savdoga chiqarilayotgan har bir salqin ichimlik va muzqaymoq sifat va xavfsizlik talablariga javob beruvchi sertifikatga ega boʻlishi shart. Ular saqlanayotgan idishlar belgilangan standartlarga mos boʻlishi, maxsus sovutgich uskunalar bilan jihozlangan boʻlishi va isteʼmol muddati koʻrsatilgan muhrga ega boʻlishi lozim.

Sotish jarayonida mahsulot bir marta foydalaniladigan idishlarga quyilishi, bu idishlar foydalanilgandan soʻng alohida konteynerlarda yigʻilishi talab etiladi. Shu bilan birga, sotuvchilar tibbiy koʻrikdan oʻtgan, maxsus kiyim-boshda boʻlishi va shaxsiy gigiyena qoidalariga qatʼiy amal qilishi zarur.

Afsuski, baʼzan koʻchalarda, quyosh nuri toʻgʻridan-toʻgʻri tushadigan ochiq joylarda, polietilen idishlarda qadoqlangan, qanday sharoitda tayyorlangani nomaʼlum boʻlgan salqin ichimliklar sotilmoqda. Bunday mahsulotlar sanitariya-gigiyena talablariga javob bermaydi va inson salomatligi uchun jiddiy xavf tugʻdirishi mumkin. Ularni isteʼmol qilish orqali turli kasalliklar, jumladan, oʻtkir ichak infektsiyalari va ovqatdan zaharlanish holatlari kelib chiqishi mumkin.

Shuning uchun issiq kunlarda salqin ichimliklar va muzqaymoqlar isteʼmol qilishdan oldin har bir shaxs ehtiyotkor boʻlishi, ularning saqlash va sotish sharoiti, qadoqlanish holati, isteʼmol muddati hamda sotuvchilarning sanitariya talablariga amal qilishiga alohida eʼtibor qaratishi zarur.

Sogʻligʻingiz oʻz qoʻlingizda — unga beparvo boʻlmang!

D. Baltabayeva, Amudaryo tumani SEO va JSB oliy toifali shifokori.