1-sonli politexnikumda “Kasblar festivali” tadbiri yuqori saviyada tashkil etildi

Kasb-hunar taʼlimi har doim yoshlarni mustaqil hayotga tayyorlash, mehnat bozorida oʻz oʻrnini topa oladigan yetuk mutaxassislar sifatida voyaga yetkazishda muhim omil boʻlib kelgan. Bu jarayonda oʻrta boʻgʻin kasb-hunar taʼlimi tizimining oʻrni beqiyos.

Amudaryo tumanida faoliyat yuritayotgan 1-sonli politexnikum aynan shunday zamonaviy talablar asosida tashkil etilgan taʼlim maskanlaridan biridir. Mazkur muassasada oʻquvchilar tanlagan mutaxassisliklari boʻyicha nazariy bilimlar bilan bir qatorda ishlab chiqarishda zarur boʻlgan amaliy koʻnikmalarga ham ega boʻlib bormoqdalar.

Yaqinda politexnikumda 9–11-sinf bitiruvchilari, ularning ota-onalari, mahalliy jamoatchilik, taʼlim sohasi vakillari ishtirokida “Ochiq eshiklar kuni” hamda “Kasblar festivali” yuqori saviyada tashkil etildi. Tadbirni politexnikum direktori Allayor Baltayev kirish soʻzi bilan ochib, kasb-hunar taʼlimi davlat siyosatidagi oʻrni, yoshlarni zamon talablariga mos ravishda tayyorlash yoʻnalishidagi islohotlar haqida toʻxtalib oʻtdi.

Tadbir davomida muassasada yoʻlga qoʻyilgan ixtisosliklar, oʻquv jarayoni, innovatsion yondashuvlar, amaliy mashgʻulotlar samaradorligi va yoshlarni ish bilan taʼminlash imkoniyatlari haqida keng maʼlumot berildi.

Bugungi kunda politexnikumda zamonaviy talablar asosida bir qator mutaxassislik yoʻnalishlari boʻyicha taʼlim berib kelinmoqda. Avtotransport vositalarini taʼmirlash va texnik xizmat koʻrsatish, elektrotexnika va energetika, santexnika hamda isitish-sovitish tizimlari, qurilish va smeta ishlari, kompyuter texnologiyalari va axborot tizimlari, sanoat uskunalariga xizmat koʻrsatish, servis xizmatlari kabi muhim yoʻnalishlar shular jumlasidan. Shuningdek, xizmat koʻrsatish sohasi uchun ham malakali mutaxassislar tayyorlashga alohida eʼtibor qaratilmoqda.

Sport zalida tashkil etilgan maxsus koʻrgazmalar, toʻgaraklar, ishlab chiqarish ustaxonalarining faoliyati bilan tanishish jarayoni, oʻquvchilarning oʻz qoʻllari bilan tayyorlagan maketlari, oʻquv-texnik uskunalari ishtirokchilarda katta taassurot qoldirdi. Ayniqsa, ijodiy chiqishlar tadbirga bayramona kayfiyat bagʻishladi.

Politexnikumda taʼlim oluvchilar uchun barcha shart-sharoitlar yaratilgan. 240-oʻrinli ishlab chiqarish ustaxonalari, 100-oʻrinli yotoqxona va oshxona, sport zallari, ochiq sport maydonchalari, zamonaviy laboratoriyalar, kompyuter va multimedia sinflari, kasb-hunar mashgʻulotlari uchun maxsus auditoriyalar – bularning barchasi oʻquvchilarning nazariy bilimlarini amaliyot bilan uygʻunlashtirishga xizmat qilmoqda.

Bundan tashqari, muassasada 30 nafar oliy maʼlumotli oʻqituvchi, shu jumladan 2 nafar bosh oʻqituvchi, 6 nafar yetakchi oʻqituvchi, 9 nafar katta oʻqituvchi va 9 nafar amaliyot ustasi faoliyat yuritmoqda.

Politexnikum Qoraqalpoq davlat universitetiga biriktirilgan boʻlib, oʻquv jarayoni milliy va xalqaro standartlarga mos ravishda olib boriladi. Taʼlim kredit-modul tizimida tashkil etilgan boʻlib, oʻquvchilar olgan natijalari oliy taʼlim muassasalari tomonidan tan olinadi. Bu esa bitiruvchilarga keyingi bosqichda oʻqishni davom ettirish imkonini yaratadi.

Alohida taʼkidlash joizki, politexnikum ishlab chiqarish korxonalari, tashkilot va muassasalar bilan keng koʻlamli hamkorlik aloqalarini yoʻlga qoʻygan. Bu tizim oʻquvchilarning bilim va koʻnikmalarini amalda sinovdan oʻtkazishga, ish tajribasiga ega boʻlishlariga keng yoʻl ochmoqda. Shu orqali ular mehnat bozorida oʻz oʻrnini topishga tayyor, raqobatbardosh mutaxassislar sifatida shakllanmoqda.

2025–2026 oʻquv yilidan boshlab politexnikumda boshlangʻich kasbiy taʼlim dasturlari doirasida 9-sinf bitiruvchilari uchun quyidagi yoʻnalishlarda taʼlim olish imkoniyati yaratildi. Xususan, avtomobillarni taʼmirlash va ularga xizmat koʻrsatish, payvandlovchi, suv taʼminoti va kanalizatsiya tarmoqlari kuzatuvchisi, tikuvchi, axborot vositalari mashinalari va kompyuter tarmoqlari, elektrik, qishloq xoʻjalik mashinalari taʼmirchisi va traktorchi-mashinist, qurilish ishlari ishchisi, asalarichi, raqamli axborotlarni qayta ishlash ustasi, shuningdek, dual taʼlim asosida oshpazlik kabi yoʻnalishlar boʻyicha mutaxassislar tayyorlanadi.

Oʻrta va oʻrta maxsus kasbiy taʼlim dasturlari boʻyicha esa kunduzgi shaklda maktabgacha taʼlim tarbiyachisi, buxgalteriya va kompyuter injiniringi yoʻnalishlari, sirtqi shaklda esa maktabgacha taʼlim tarbiyachisi, elektr uskunalar taʼmirchisi, fermer xoʻjaligi boshqaruvi, suv xoʻjaligi va melioratsiya, oʻrmon xoʻjaligi kabi texnik yoʻnalishlarda mutaxassislar tayyorlash yoʻlga qoʻyilgan.

Amudaryo tumani 1-sonli politexnikumi bugungi kunda zamonaviy kasb-hunar taʼlimining ilgʻor namunalaridan biriga aylangan. Oʻziga xos innovatsion yondashuvlar, ishlab chiqarish bilan uzviy aloqalar, keng yoʻnalishlar va zamonaviy infratuzilma tufayli yoshlar nafaqat kasb egasi, balki oʻz hayotini toʻlaqonli qurishga qodir boʻlgan shaxs sifatida shakllanmoqda.

Shohzod Qurbonboyev.