Madaniyat boʻlimi binosida Ichki ishlar vazirligining ashula va raqs ansambli tomonidan xayriya kontserti oʻtkazildi

Oʻzbekiston Respublikasi Ichki ishlar vazirining tegishli buyrugʻiga asosan tasdiqlangan maxsus reja doirasida ayni kunlarda mamlakatimiz boʻylab vazirlik tasarrufidagi ashula va raqs ansamblining xayriya kontsert dasturlari oʻtkazilmoqda. Ushbu tadbirlar orqali vatan himoyasi yoʻlida fidokorona xizmat qilib halok boʻlgan yoki nogiron boʻlib qolgan ichki ishlar organlari xodimlarining oilalarini moddiy va maʼnaviy qoʻllab-quvvatlash, shu bilan birga jamoatchilikka vatanparvarlik, hamjihatlik va doʻstlik tuygʻularini singdirish maqsad qilingan.

Shu kabi tadbirlarning navbatdagisi joriy yilning 18-aprel kuni Amudaryo tumani Madaniyat boʻlimi binosida tashkil etildi. Unda ichki ishlar tizimi faxriylari, xizmat burchini ado etish vaqtida halok boʻlgan yoki jarohat olib, nogiron boʻlib qolgan xodimlarning oila aʼzolari, mahalliy aholi, faol yoshlar va sanʼatsevarlar ishtirok etdi.

Kontsert dasturida Oʻzbekistonda xizmat koʻrsatgan artist, IIV Madaniyat saroyi rahbari, podpolkovnik Uchqun Tillayev boshchiligidagi ansambl aʼzolari tomonidan yuksak ijro mahorati taqdim etildi. Xalqimiz sevgan soʻz ustalari — Oʻtkir Muhammadxoʻjayev va Zokir Ochildiyev, xonandalar — Goʻzal Jumaniyozova (Dilsoʻz), Ulugʻbek Xoliqov, Suhrobbek Hamdamov hamda Nurali Shukurullayevlar ijrosidagi kuy-qoʻshiqlar tomoshabinlarga yuksak kayfiyat ulashdi.

Ushbu xayriya tadbiri orqali tinchlik va osoyishtalikni taʼminlash yoʻlida oʻz hayotini fido qilgan mard insonlarning xotirasi yana bir bor eʼzozlandi, ularning oilalariga hurmat va gʻamxoʻrlik namoyon etildi.

Tadbirning asosiy maqsadlaridan biri — xalq va huquqni muhofaza qiluvchi organlar oʻrtasida maʼnaviy bogʻlanishni mustahkamlash, jamiyatda hamjihatlik, bagʻrikenglik va yurt taqdiriga daxldorlik tuygʻusini yuksaltirishdan iborat. Bu esa madaniyat va sanʼat vositasida amalga oshirilayotgani bilan ahamiyatlidir.

Taʼkidlash joizki, sanʼat va madaniyat yosh avlodni vatanparvarlik ruhida tarbiyalashda, milliy qadriyatlarga hurmat ruhini shakllantirishda beqiyos tarbiyaviy ahamiyat kasb etadi. Ansambl faoliyati aynan shu maqsadlarga qaratilgan boʻlib, jamoa har yili mamlakatimizning turli hududlariga gastrol safarlarini uyushtirib, keng jamoatchilikni ijodiy namunalari bilan xursand etib kelmoqda.

Ayniqsa, olis va chekka hududlarda oʻtkazilayotgan kontsert dasturlari aholi uchun tom maʼnoda maʼnaviy bayramga aylanmoqda. Badiiy soʻz ustalari va mahoratli xonandalarning chiqishlari xalqimiz qalbiga Vatanga muhabbat va sadoqat tuygʻusini singdirishi bilan alohida ahamiyat kasb etadi.

Mazkur xayriya kontsertlari sanʼat orqali jamiyatda yuksak maʼnaviy muhitni shakllantirish, odamlar oʻrtasida doʻstlik va birodarlik rishtalarini mustahkamlashga xizmat qilmoqda. Shu bilan birga, madaniyat va sanʼatni ommalashtirish va jamiyatning turli qatlamlari oʻrtasida hamjihatlik muhitini yanada kuchaytirishga yordam bermoqda.

Ashula va raqs ansambli tomonidan bunday kontsertlar mamlakatimizning boshqa shahar va qishloqlarida ham davom ettirilyapti. Bu esa ichki ishlar organlari faoliyatining insonparvarlik va maʼnaviyatni yuksaltirish borasidagi muhim jihatlarini yaqqol namoyon etmoqda.

U.Oʻrozaliyev, tuman IIB boshligʻining oʻrinbosari, podpolkovnik.