Fuqarolar murojaatlari yuzasidan Choykoʻl ovulida sayyor qabul boʻlib oʻtdi

Mamlakatimizda insonlarning dardini tinglash, ularni qiynayotgan muammolarga joyida yechim topish maqsadida muntazam ravishda tashkil etilayotgan sayyor qabullar samarali natija bermoqda. Ushbu qabullar orqali fuqarolar bevosita rahbarlarga murojaat qilish imkoniga ega boʻlmoqda.

Sayyor qabullar davomida ijtimoiy, huquqiy, iqtisodiy mazmundagi muammolar oʻrganilib, ularning koʻpchiligiga qabul jarayoning oʻzida yechim topilmoqda. Bu esa oʻz navbatida fuqarolarning davlatga, boshqaruv organlariga, mutasaddi rahbarlarning faoliyatiga boʻlgan ishonchini mustahkamlamoqda.

Qoraqalpogʻiston Respublikasi Vazirlar Kengashi Raisining Jamoat va diniy tashkilotlar bilan aloqalar boʻyicha oʻrinbosari Rajapbay Nurazizov ishtirokida Amudaryo tumani Choykoʻl ovul fuqarolar yigʻinida sayyor qabul boʻlib oʻtdi. Sayyor qabulda barcha sohalar boʻyicha respublika hamda tuman miqyosidagi masʼullar va aholi vakillari ishtirok etdi. Qabul jarayonida fuqarolar masʼullarga turli masalalar yuzasidan murojaat qildilar.

Xususan, choykoʻllik fuqarolarning uy-joy uchun qurilish materiallari, moddiy-yordam olishda hamda farzandlarining shartnoma pullarini toʻlashda amaliy yordam soʻrab qilgan murojaatlari masʼullar tomonidan belgilangan tartibda qabul qilindi.

Shuningdek, masʼullarga Oʻzbekiston Kurash Federatsiyasi tuman boʻlimini bino bilan taʼminlash, uning moddiy-texnik bazasini mustahkamlash hamda sportchilarning sport bilan shugʻullanishi uchun zal ajratib berish, Qipchoq-Mangʻit yoʻlini taʼmirlashda amaliy yordam berish, suyultirilgan gaz taʼminoti kabi masalalarda ham murojaatlar yoʻllandi.

Murojaatlardagi masalalarning aksariyati qabul jarayonida oʻz yechimini topgan boʻlsa, qoʻshimcha oʻrganish va muddat talab qiladigan murojaatlarning ijobiy hal etilishi yuzasidan tegishli masʼullarga topshiriq va koʻrsatmalar berildi.

Taʼkidlash kerakki, sayyor qabullarda har bir murojaat ortida inson taqdiri turgani inobatga olinib, masalalarga individual yondashilmoqda. Shu tarzda, sayyor qabullar odamlarga chinakam yordam koʻrsatishning samarali vositasiga aylanmoqda.

Shuningdek, aholining muammolarini tizimli oʻrganish, ularning kelgusida oldini olish, joylardagi kamchilik va muammolarni aniqlash hamda ularni bartaraf etish borasida samarali vosita boʻlib xizmat qilmoqda. Natijada, fuqarolarning davlat organlariga boʻlgan ishonchi ortmoqda, jamiyatda ijtimoiy adolat tamoyili mustahkamlanmoqda.

Charos Arslonova, tuman hokimligining Axborot xizmati rahbari.