Фуқаролар мурожаатлари юзасидан Чойкўл овулида сайёр қабул бўлиб ўтди

Мамлакатимизда инсонларнинг дардини тинглаш, уларни қийнаётган муаммоларга жойида ечим топиш мақсадида мунтазам равишда ташкил этилаётган сайёр қабуллар самарали натижа бермоқда. Ушбу қабуллар орқали фуқаролар бевосита раҳбарларга мурожаат қилиш имконига эга бўлмоқда.

Сайёр қабуллар давомида ижтимоий, ҳуқуқий, иқтисодий мазмундаги муаммолар ўрганилиб, уларнинг кўпчилигига қабул жараёнинг ўзида ечим топилмоқда. Бу эса ўз навбатида фуқароларнинг давлатга, бошқарув органларига, мутасадди раҳбарларнинг фаолиятига бўлган ишончини мустаҳкамламоқда.

Қорақалпоғистон Республикаси Вазирлар Кенгаши Раисининг Жамоат ва диний ташкилотлар билан алоқалар бўйича ўринбосари Ражапбай Нуразизов иштирокида Амударё тумани Чойкўл овул фуқаролар йиғинида сайёр қабул бўлиб ўтди. Сайёр қабулда барча соҳалар бўйича республика ҳамда туман миқёсидаги масъуллар ва аҳоли вакиллари иштирок этди. Қабул жараёнида фуқаролар масъулларга турли масалалар юзасидан мурожаат қилдилар.

Хусусан, чойкўллик фуқароларнинг уй-жой учун қурилиш материаллари, моддий-ёрдам олишда ҳамда фарзандларининг шартнома пулларини тўлашда амалий ёрдам сўраб қилган мурожаатлари масъуллар томонидан белгиланган тартибда қабул қилинди.

Шунингдек, масъулларга Ўзбекистон Кураш Федерацияси туман бўлимини бино билан таъминлаш, унинг моддий-техник базасини мустаҳкамлаш ҳамда спортчиларнинг спорт билан шуғулланиши учун зал ажратиб бериш, Қипчоқ-Манғит йўлини таъмирлашда амалий ёрдам бериш, суюлтирилган газ таъминоти каби масалаларда ҳам мурожаатлар йўлланди.

Мурожаатлардаги масалаларнинг аксарияти қабул жараёнида ўз ечимини топган бўлса, қўшимча ўрганиш ва муддат талаб қиладиган мурожаатларнинг ижобий ҳал этилиши юзасидан тегишли масъулларга топшириқ ва кўрсатмалар берилди.

Таъкидлаш керакки, сайёр қабулларда ҳар бир мурожаат ортида инсон тақдири тургани инобатга олиниб, масалаларга индивидуал ёндашилмоқда. Шу тарзда, сайёр қабуллар одамларга чинакам ёрдам кўрсатишнинг самарали воситасига айланмоқда.

Шунингдек, аҳолининг муаммоларини тизимли ўрганиш, уларнинг келгусида олдини олиш, жойлардаги камчилик ва муаммоларни аниқлаш ҳамда уларни бартараф этиш борасида самарали восита бўлиб хизмат қилмоқда. Натижада, фуқароларнинг давлат органларига бўлган ишончи ортмоқда, жамиятда ижтимоий адолат тамойили мустаҳкамланмоқда.

Чарос Арслонова, туман ҳокимлигининг Ахборот хизмати раҳбари.