AMUDARYoLIK BITIRUVChI YoShLAR OʻRTASIDA “BOʻLAJAK YoSh MUHANDISLAR” FAN OLIMPIADASI OʻTKAZILDI

Mamlakatimizda umumtaʼlim maktablari bitiruvchilarini oʻzlari qiziqqan sohalar boʻyicha yoʻnaltirish, ularning qiziqish va intilishlarini qoʻllab-quvvatlash hamda ragʻbatlantirish maqsadida amalga oshirilayotgan chora-tadbirlar tufayli bilimdon, iqtidorli, oʻziga ishonchi baland, intiluvchan yoshlar safi tobora oshib bormoqda. Joriy 2024-2025 oʻquv yilida umumiy oʻrta taʼlim maktablarining 11-sinf oʻquvchilari oʻrtasida matematika, fizika va kimyo fanlariga qiziquvchi yoshlarning isteʼdodlarini rivojlantirish maqsadida tashkil etilgan “Boʻlajak yosh muhandislar” fan olimpiadasi ham ana shunday qobiliyatli oʻquvchilarni har tomonlama qoʻllab-quvvatlashga qaratilgani bilan muhim ahamiyat kasb etmoqda.

Maʼlumki, Oʻzbekiston Respublikasi Prezidenti Sh.Mirziyoyev rahbarligida 2024-yil 20-iyun kuni kengaytirilgan tarzda oʻtkazilgan “Muhandislik sohasida kadrlar tayyorlash va oliy taʼlim muassasalari faoliyatini yanada takomillashtirish chora-tadbirlari toʻgʻrisida”gi videoselektor yigʻilishining 32-sonli bayonida oliy taʼlim muassasalarning muhandislik yoʻnalishiga qiziqishi yuqori boʻlgan iqtidorli yoshlarni tanlab olish tizimini yaratish vazifasi belgilab berilgan edi. Unga koʻra, ushbu vazifani bajarish boʻyicha Toshkent toʻqimachilik va yengil sanoat instituti rektori, Oʻzbekiston Respublikasi Savdo-sanoat palatasi raisi Vahobov Davron Abdujalolovich rahbarligida Oʻzbekiston Respublikasi Maktabgacha va maktab taʼlimi vazirligi bilan hamkorlikda Respublika boʻylab matematika, fizika va kimyo fanlaridan “Boʻlajak yosh muhandislar” nomli fan olimpiadasi tuman, viloyat, Respublika bosqichlarini oʻtkazish va shu orqali muhandislik yoʻnalishiga qiziqishi yuqori boʻlgan iqtidorli yoshlarni jalb qilgan holda institutda olib boriladigan taʼlim-tarbiya jarayoni va taʼlim yoʻnalishlari yuzasidan targʻibot tishlarini olib borish topshirilgan edi.

Prezidentimiz Farmonida belgilangan ushbu vazifalar ijrosini taʼminlash maqsadida joriy yilning 8-aprel sanasida Amudaryo tuman Maktabgacha va maktab taʼlimi boʻlimi tasarrufidagi 1-sonli umumtaʼlim maktabi binosida 11-sinf bitiruvchilari oʻrtasida “Boʻlajak yosh muhandislar” fan olimpiadasining tuman bosqichi boʻlib oʻtdi.

Olimpiadaga tumandagi 86 ta umumiy oʻrta taʼlim maktablaridan va ixtisoslashtirilgan maktabdan matematika, fizika va kimyo fanlariga qiziquvchi 170 nafarga yaqin iqtidorli oʻquvchilar qatnashdilar.

“Boʻlajak yosh muhandislar” fan olimpiadasining tuman bosqichi ochilish marosimida Qoraqalpogʻiston Respublikasi Maktabgacha va maktab taʼlimi vazirligining Fan olimpiadasi boʻyicha Iqtidorli bolalar bilan ishlash sektori metodisti Zaxida Usenova, Toshkent toʻqimachilik va yengil sanoat instituti Oliy matematika va kompyuter grafikasi kafedrasi dotsenti Jasur Karimboyev, Amudaryo tuman Maktabgacha va maktab taʼlimi boʻlimi boshligʻi Yalgʻashboy Shamuratov, Maktablar faoliyatini muvofiqlashtirish shuʼbasi metodistlari Habibulla Davletyarov va Rayhon Yakubova, olimpiada auditoriya rahbarlari, hakamlar, kuzatuvchilar ishtirok etdilar.

Marosimida soʻzga chiqqan Amudaryo tuman Maktabgacha va maktab taʼlimi boʻlimi boshligʻi Yalgʻashboy Shomuratov “Boʻlajak yosh muhandislar” fan olimpiadasini oʻtkazishdan koʻzlangan maqsad va vazifalar haqida batafsil maʼlumot va tushunchalar berdi. Shundan soʻng Toshkent toʻqimachilik va yengil sanoat instituti Oliy matematika va kompyuter grafikasi kafedrasi dotsenti Jasur Karimbayev institut haqida taqdimot oʻtkazdi.

Bugungi kunda talab yuqori boʻlgan zamonaviy mutaxassisliklarni tayyorlovchi mazkur yetakchi oliy taʼlim muassasasida mavjud fakultetlar va yoʻnalishlar haqida atroflicha soʻz yuritilib, institutda dual taʼlim yoʻlga qoʻyilganligi, talabalar oʻqish davrida hafta davomida 3 kun tahsil olsa, qolgan 3 kunida ishlab chiqarish korxonalarida 2 million soʻmdan boshlab oylik maosh olib, ishlashlari, olgan nazariy bilimlarini amaliyotda mustahkamlash imkoniyati mavjudligi alohida taʼkidlandi.

Bundan tashqari, institutda qoʻshma taʼlim ham mavjud boʻlib, talabalar 2+2, 3+1, 2+2+1 dasturi boʻyicha, yaʼni 2 yoki 3-yil mazkur institutda, 2 yoki 1-yil xorijda oʻqib, 2 ta davlatning diplomiga ega boʻlishlari, qoʻshma taʼlim bitiruvchilari xorijda qulay sharoitlardagi yuqori maoshli korxona va tashkilotlarga ishga joylashish imkoniyatiga ega boʻlishlari haqida batafsil maʼlumotlarni taqdim etdi.

Shundan soʻng “Boʻlajak yosh muhandislar” olimpiadasining tuman bosqichi boshlandi va unda muhandislik yoʻnalishiga qiziquvchi amudaryolik yoshlar unda faol ishtirok etdilar.

Shaffoflik asosida oʻtgan olimpiada yakunlariga koʻra, 40-, 25-sonli va ixtisoslashgan maktablar oʻquvchilari sovrinli 1-, 2-, 3- oʻrinni egalladilar va olimpiadaning Qoraqalpogʻiston Respublikasi bosqichiga yoʻllanma oldilar. Gʻolib oʻquvchilarga institut tomonidan tegishli tartibda 700 000, 500 000, 300 000 soʻmlik pulli vaucherlar tantanali ravishda topshirildi.

Maʼlumot uchun: olimpiadaning Respublika bosqichi gʻoliblari uchun quyidagi sovgʻa va vaucherlar berish nazarda tutilgan:

1-oʻrin uchun DAMAS avtomobili;

2-oʻrin uchun 20 mln. soʻm;

3-oʻrin uchun 10 mln. soʻm.

Bu kabi olimpiadalar oʻtkazilishi taʼlim muassasalari oʻquvchilari orasidan matematika, fizika, kimyo fanlari boʻyicha bilimli, ushbu fanga qiziquvchi, intiluvchan va ijodkor yoshlarni aniqlash hamda ularning ijodiy qobiliyatlarini roʻyobga chiqarishga koʻmaklashish, qoʻllab-quvvatlash, ragʻbatlantirish bilan birga Oʻzbekiston Respublikasi ravnaqi, kelajagi uchun oʻz hissasini qoʻshadigan yoshlar safini yanada oshirish imkonini beradi.

Robiya Yoʻldosheva.