Mahallalarda xavfsiz muhitni yaratish borasidagi ishlar jadallashtirilmoqda

Keyingi yillarda mamlakatimizda jinoyatchilikka qarshi kurashish va huquqbuzarliklarning oldini olish boʻyicha keng koʻlamli islohotlar amalga oshirilmoqda. Mazkur islohotlar doirasida aholining tinch va osoyishta hayotini taʼminlash hamda jamoat xavfsizligi madaniyatini shakllantirish boʻyicha ijobiy natijalarga erishilmoqda. Bundan tashqari, huquqbuzarliklar profilaktikasi va ularning oldini olish, shuningdek fuqarolarga yuksak huquqiy madaniyat va qonunga hurmat tuygʻusini singdirish borasidagi huquqiy mexanizmlar ham yanada takomillashtirilmoqda.

Joriy yilning 3-yanvar sanasida imzolangan Oʻzbekiston Respublikasi Prezidentining “2025-yilda respublika mahallalarida xavfsiz muhitni yaratish va huquqbuzarliklarning barvaqt oldini olish tizimi samaradorligini yanada oshirish boʻyicha chora-tadbirlar toʻgʻrisida”gi qarori bu borada muhim dasturulamal boʻlmoqda.

2-aprel kuni Amudaryo tumani hokimligining majlislar zalida Prezident qarori ijrosini taʼminlash borasida amalga oshirilayotgan ishlar va kelgusidagi rejalarga bagʻishlangan yigʻilish boʻlib oʻtdi. Unda Qoraqalpogʻiston Respublikasi Ichki ishlar vazirining birinchi oʻrinbosari Jasurbek Atayev, tuman hokimi Sobir Xoʻjametov, tuman Prokuraturasi, Ichki ishlar boʻlimi masʼullari, hokim oʻrinbosarlari, boʻlimlar, tashkilotlar rahbarlari hamda “Mahalla yettiligi” masʼullari ishtirok etdilar.

Yigʻilishni tuman hokimi Sobir Xoʻjametov kirish soʻzi bilan ochib berdi. Tuman hokimi oʻz soʻzida bugungi kunda huquqbuzarliklarning oldini olish, jinoyatchilikni jilovlash masalasi davlat siyosati darajasiga koʻtarilganligini, jinoyatchilikka qarshi kurashish, huquqbuzarliklarning profilaktikasi yuzasidan huquqni muhofaza qiluvchi organlar bilan birga mutasaddi idoralar zimmasiga muhim vazifalar yuklanganligini hamda bu boradagi islohotlar ijrosini taʼminlash boʻyicha qator chora-tadbirlar amalga oshirilayotgani xususida soʻz yuritdi.

Qoraqalpogʻiston Respublikasi Ichki ishlar vazirining birinchi oʻrinbosari Jasurbek Atayev soʻzga chiqib, yuqoridagi Prezident qarori bilan belgilab berilgan mahallalarda xavfsiz muhitni yaratish borasidagi ustuvor vazifalar xususida soʻz yuritdi.

Xususan, joriy yilda “Har bir mahallada huquqbuzarliklarning barvaqt oldini olish” ustuvor vazifa etib belgilanib, ishlash mexanizmlari joriy etildi.

2024-yilda jinoyat sodir etilgan har bir mahallada kriminogen vaziyatni barqarorlashtirish hamda jinoyatlarni barvaqt profilaktika qilishning mahallalar kesimida choraklik manzilli chora-tadbirlarini belgilagan holda mahalla — tuman — viloyat darajasida uning ijrosi uchun bevosita masʼul rahbarlar biriktirilganligi va aniq sohaviy javobgarlik yuklanganligi taʼkidlandi.

Shuningdek, qaror bilan kriminogen vaziyat ogʻir mahallalarda ilmiy-amaliy yondashuvlar asosida joylarga chiqqan holda maqsadli oʻrganishlarni oʻtkazish orqali huquqbuzarliklarga sabab boʻlayotgan asl omillarni aniqlash va barham berish boʻyicha tashkiliy-huquqiy choralarni koʻrish, mahallalarda yoshlar, ayollar va ishsizlar tomonidan, shuningdek, oila-turmush munosabatlari doirasida sodir etiladigan jinoyatlarning oldini olishda “mahalla yettiligi” har bir vakilining aniq masʼuliyatini belgilash, ushbu toifadagi huquqbuzarliklar profilaktikasiga yangicha ish uslublarini tatbiq qilish belgilab berilgan asosiy vazifalardan ekani taʼkidlandi.

Qolaversa, yigʻilish mobaynida aholining huquqiy ongi, ijtimoiy faolligi va fuqarolik masʼuliyatini oshirish, jinoyat sodir etilishiga sabab boʻlishi mumkin boʻlgan ijtimoiy muammolarni hal etishga jamoatchilik vakillari, nuroniylar va mahalla faollarini keng jalb etib borish, mahallalar jamoat joylari va yashash xonadonlarida xavfsiz muhit yaratish, fuqarolar hayoti, sogʻligʻi va mol-mulkiga har qanday tajovuzlarning oldini olish maqsadida huquqbuzarliklar profilaktikasiga zamonaviy raqamli texnologiyalar va texnik vositalarni keng joriy etish lozimligi taʼkidlandi.

Charos Arslonova, tuman hokimligining Axborot xizmati rahbari.