Har bir mahallada xavfsiz muhit yaratish – ustuvor vazifa

Mamlakatimizda jinoyatchilik va huquqbuzarliklarning barvaqt oldini olishga qaratilgan keng koʻlamli chora-tadbirlar amalga oshirilmoqda. Shu maqsadda, 2025-yil 3-yanvar kuni Oʻzbekiston Respublikasi Prezidentining “2025-yilda respublika mahallalarida xavfsiz muhitni yaratish va huquqbuzarliklarning barvaqt oldini olish tizimi samaradorligini yanada oshirish boʻyicha chora-tadbirlar toʻgʻrisida”gi Qarori qabul qilingan edi.

Ushbu qaror ijrosini taʼminlash va tizim samaradorligini oshirish maqsadida 27-mart kuni Amudaryo tumani Ichki ishlar boʻlimi majlislar zalida yigʻilish boʻlib oʻtdi. Unda Qoraqalpogʻiston Respublikasi Ichki ishlar vazirining birinchi oʻrinbosari, polkovnik Jasurbek Atayev, tuman IIB boshligʻi Muxammedali Xojamuratov, sohaviy xizmat rahbarlari, profilaktika inspektorlari va shaxsiy tarkib ishtirok etdi. Yigʻilishda mazkur qaror ijrosi tahlil qilinib, mavjud kamchiliklar yuzasidan tushuntirish ishlari olib borildi.

Soʻnggi yillarda mamlakatimizda xavfsizlikni taʼminlashning mutlaqo yangi mexanizmlari joriy etildi. Jumladan, jinoyatchilikka sabab boʻlayotgan ijtimoiy-maishiy muammolarni bartaraf etish, aholida shaxsiy xavfsizlik hissini shakllantirish va mahallalarda huquqbuzarliklarning oldini olish borasida samarali choralar koʻrilmoqda. Mahallalarda xavfsiz muhitni yaratishning tashkiliy-profilaktik asoslarini zamon talablariga moslashtirish, jinoyatchilikning asl omillarini aniqlab, kompleks choralar bilan bartaraf etish bugungi kunning eng dolzarb vazifalaridan biriga aylandi.

Prezident Qaroriga muvofiq, 2025-yilda “Har bir mahallada huquqbuzarliklarning barvaqt oldini olish” ustuvor vazifa sifatida belgilandi. Xususan, jinoyatchilik koʻp sodir etiladigan mahallalar aniqlanib, ularning holati ilmiy-amaliy yondashuv asosida oʻrganiladi. Huquqbuzarliklarning asl sabablarini aniqlash va bartaraf etish boʻyicha tashkiliy-huquqiy choralar koʻriladi. Shuningdek, mahallalarda “mahalla yettiligi” har bir vakilining aniq masʼuliyati belgilab beriladi, yoshlar, ayollar va ishsizlar oʻrtasida huquqbuzarliklarning oldini olishga qaratilgan ish uslublari takomillashtiriladi.

Shu bilan birga, aholida huquqiy ong va ijtimoiy faollikni oshirish maqsadida jamoatchilik vakillari, nuroniylar va mahalla faollari keng jalb qilinadi. Jinoyatchilikni kamaytirish uchun zamonaviy raqamli texnologiyalar va texnik vositalardan foydalanish mexanizmi yoʻlga qoʻyiladi. Har bir masʼul idora va muassasaning ish faoliyati qatʼiy nazoratga olinib, jinoyatchilikka qarshi kurashda masʼuliyatsizlikka yoʻl qoʻygan rahbarlarga taʼsir choralari koʻriladi.

Amudaryo tumanida 8 ta ovul va mahalla “qizil” toifaga kiritilgan boʻlib, ularni “yashil” toifaga oʻtkazish uchun tegishli topshiriqlar berildi. Huquqbuzarliklarning oldini olish maqsadida “Xavfsiz hudud” tadbirlari oʻtkazilib, joylarda xavfsizlik choralari kuchaytirilmoqda. Shu bilan birga, huquqbuzarlik sodir etgan 5 nafar xotin-qiz maʼmuriy javobgarlikka tortildi, soʻnggi ikki oyda tazyiq va zoʻravonlikka uchragan 95 nafar xotin-qizga himoya orderlari berildi.

Ozodlikni cheklash bilan bogʻliq jazo choralari qoʻllanilgan shaxslarning bandligini taʼminlash maqsadida shu kuni tuman IIB va tuman Kambagʻallikni qisqartirish va bandlikka koʻmaklashish boʻlimi hamkorligida mehnat yarmarkasi ham tashkil etildi. Unda ishtirok shaxslardan 6 nafari ish bilan taʼminlandi. Bu esa ularning qayta jinoyat sodir etish ehtimolini kamaytiradi.

Tinch va xavfsiz hayotni taʼminlash nafaqat huquq-tartibot idoralari, balki keng jamoatchilikning hamjihatlikdagi saʼy-harakatlariga bogʻliq. Har bir fuqaro oʻz mahallasida huquqbuzarliklarning oldini olishda faol ishtirok etishi, jamoatchilik nazoratini kuchaytirishi muhim ahamiyatga ega. Davlatimiz rahbari tomonidan belgilangan chora-tadbirlar ham aynan shu maqsadlarga xizmat qiladi.

Shohzod Qurbonboyev.