Ҳар бир маҳаллада хавфсиз муҳит яратиш – устувор вазифа

Мамлакатимизда жиноятчилик ва ҳуқуқбузарликларнинг барвақт олдини олишга қаратилган кенг кўламли чора-тадбирлар амалга оширилмоқда. Шу мақсадда, 2025 йил 3 январь куни Ўзбекистон Республикаси Президентининг “2025 йилда республика маҳаллаларида хавфсиз муҳитни яратиш ва ҳуқуқбузарликларнинг барвақт олдини олиш тизими самарадорлигини янада ошириш бўйича чора-тадбирлар тўғрисида”ги Қарори қабул қилинган эди.

Ушбу қарор ижросини таъминлаш ва тизим самарадорлигини ошириш мақсадида 27 март куни Амударё тумани Ички ишлар бўлими мажлислар залида йиғилиш бўлиб ўтди. Унда Қорақалпоғистон Республикаси Ички ишлар вазирининг биринчи ўринбосари, полковник Жасурбек Атаев, туман ИИБ бошлиғи Мухаммедали Хожамуратов, соҳавий хизмат раҳбарлари, профилактика инспекторлари ва шахсий таркиб иштирок этди. Йиғилишда мазкур қарор ижроси таҳлил қилиниб, мавжуд камчиликлар юзасидан тушунтириш ишлари олиб борилди.

Сўнгги йилларда мамлакатимизда хавфсизликни таъминлашнинг мутлақо янги механизмлари жорий этилди. Жумладан, жиноятчиликка сабаб бўлаётган ижтимоий-маиший муаммоларни бартараф этиш, аҳолида шахсий хавфсизлик ҳиссини шакллантириш ва маҳаллаларда ҳуқуқбузарликларнинг олдини олиш борасида самарали чоралар кўрилмоқда. Маҳаллаларда хавфсиз муҳитни яратишнинг ташкилий-профилактик асосларини замон талабларига мослаштириш, жиноятчиликнинг асл омилларини аниқлаб, комплекс чоралар билан бартараф этиш бугунги куннинг энг долзарб вазифаларидан бирига айланди.

Президент Қарорига мувофиқ, 2025 йилда “Ҳар бир маҳаллада ҳуқуқбузарликларнинг барвақт олдини олиш” устувор вазифа сифатида белгиланди. Хусусан, жиноятчилик кўп содир этиладиган маҳаллалар аниқланиб, уларнинг ҳолати илмий-амалий ёндашув асосида ўрганилади. Ҳуқуқбузарликларнинг асл сабабларини аниқлаш ва бартараф этиш бўйича ташкилий-ҳуқуқий чоралар кўрилади. Шунингдек, маҳаллаларда “маҳалла еттилиги” ҳар бир вакилининг аниқ масъулияти белгилаб берилади, ёшлар, аёллар ва ишсизлар ўртасида ҳуқуқбузарликларнинг олдини олишга қаратилган иш услублари такомиллаштирилади.

Шу билан бирга, аҳолида ҳуқуқий онг ва ижтимоий фаолликни ошириш мақсадида жамоатчилик вакиллари, нуронийлар ва маҳалла фаоллари кенг жалб қилинади. Жиноятчиликни камайтириш учун замонавий рақамли технологиялар ва техник воситалардан фойдаланиш механизми йўлга қўйилади. Ҳар бир масъул идора ва муассасанинг иш фаолияти қатъий назоратга олиниб, жиноятчиликка қарши курашда масъулиятсизликка йўл қўйган раҳбарларга таъсир чоралари кўрилади.

Амударё туманида 8 та овул ва маҳалла “қизил” тоифага киритилган бўлиб, уларни “яшил” тоифага ўтказиш учун тегишли топшириқлар берилди. Ҳуқуқбузарликларнинг олдини олиш мақсадида “Хавфсиз ҳудуд” тадбирлари ўтказилиб, жойларда хавфсизлик чоралари кучайтирилмоқда. Шу билан бирга, ҳуқуқбузарлик содир этган 5 нафар хотин-қиз маъмурий жавобгарликка тортилди, сўнгги икки ойда тазйиқ ва зўравонликка учраган 95 нафар хотин-қизга ҳимоя ордерлари берилди.

Озодликни чеклаш билан боғлиқ жазо чоралари қўлланилган шахсларнинг бандлигини таъминлаш мақсадида шу куни туман ИИБ ва туман Камбағалликни қисқартириш ва бандликка кўмаклашиш бўлими ҳамкорлигида меҳнат ярмаркаси ҳам ташкил этилди. Унда иштирок шахслардан 6 нафари иш билан таъминланди. Бу эса уларнинг қайта жиноят содир этиш эҳтимолини камайтиради.

Тинч ва хавфсиз ҳаётни таъминлаш нафақат ҳуқуқ-тартибот идоралари, балки кенг жамоатчиликнинг ҳамжиҳатликдаги саъй-ҳаракатларига боғлиқ. Ҳар бир фуқаро ўз маҳалласида ҳуқуқбузарликларнинг олдини олишда фаол иштирок этиши, жамоатчилик назоратини кучайтириши муҳим аҳамиятга эга. Давлатимиз раҳбари томонидан белгиланган чора-тадбирлар ҳам айнан шу мақсадларга хизмат қилади.

Шоҳзод Қурбонбоев.