Durunki mahallasida sayyor sud majlisi oʻtkazildi

Inson yaralibdiki, muayyan jamiyatdagi qonun-qoidalarga boʻysunadi, oʻz haq-huquqlaridan foydalanadi. Har bir davlatning esa, oʻz konstitutsiyasi hamda oʻz qonunlari bor. Biroq, qaysi jamiyatda yashashingizdan qatʼiy nazar har qanday jinoyatga yoki huquqbuzarlikka javobgarlik bor. Albatta, jinoyatga odilona baho berishda, haqiqatning qaror topishida odil sudlovning ahamiyati katta.

13-mart kuni Amudaryo tumanining Durunki MFY binosida Jinoyat ishlari boʻyicha Amudaryo tuman sudining tergov sudyasi Donaxon Yusupova raisligida, sudya yordamchisi Elyor Jumaniyozovning kotibligida ochiq sayyor sud majlisi boʻlib oʻtdi. Ochiq sayyor sud majlisida Amudaryo tuman IIB tomonidan taqdim qilingan jami 13 ta maʼmuriy huquqbuzarlikka oid ishlar koʻrib chiqildi.

Jumladan, Oʻzbekiston Respublikasi Maʼmuriy javobgarlik toʻgʻrisidagi Kodeksining 183-moddasida koʻrsatilgan mayda bezorilik huquqbuzarligini sodir etgan 5 nafar shaxsga nisbatan toʻplangan maʼmuriy huquqbuzarlik ish materiallari koʻrib chiqildi va 3 nafar shaxsga nisbatan maʼmuriy qamoq jazosi, 2 nafar shaxsga nisbatan esa maʼmuriy jarima jazosi tayinlandi.

Undan tashqari, Oʻzbekiston Respublikasi Maʼmuriy javobgarlik toʻgʻrisidagi Kodeksining 101-moddasi 1-qismida nazarda tutilgan elektr, issiqlik energiyasi, gazdan foydalanish qoidalarini buzish holati boʻyicha huquqbuzarlik sodir etgan 3 nafar shaxsga nisbatan toʻplangan ish materiallari ham koʻrib chiqilib, aybdorlarga nisbatan maʼmuriy jarima jazosi tayinlandi.

Shuningdek, sud majlisida Oʻzbekiston Respublikasi Maʼmuriy javobgarlik toʻgʻrisidagi Kodeksining 59-moddasi 2-qismida nazarda tutilgan maishiy zoʻravonlik holati boʻyicha huquqbuzarlik sodir etgan hamda ushbu kodeksning 41-moddasi va 52-moddasining 2-qismida nazarda tutilgan huquqbuzarliklarni sodir etgan shaxslarga nisbatan toʻplangan ish materiallari ham koʻrib chiqilib, huquqbuzar deb topilgan shaxslarga nisbatan qonunda nazarda tutilgan jazolar tayinlanib, qonuniy, adolatli qarorlar qabul qilindi.

Maʼlumki, inson jamiyatda oʻz oʻrnini egallab, el-yurt orasida obroʻ-eʼtibor qozonishi igna bilan quduq qazishdek murakkab jarayon. Namunali fuqaro boʻlish uchun esa, ehtimol, yillar kerak. Birgina bosilgan egri qadam yoki birgina huquqbuzarlik ana shu misqollab yigʻilgan insoniylik mavqesini yoʻqqa chiqarishi shubhasiz. Shunday ekan, har bir shaxs oʻz huquqlarini bilgan holda, atrofidagilarning, davlat va jamiyatning huquq va manfaatlarini hurmat qilishi kerak.

Donaxon Yusupova, Jinoyat ishlari boʻyicha Amudaryo tuman sudining terov sudyasi.