Дурунки маҳалласида сайёр суд мажлиси ўтказилди

Инсон яралибдики, муайян жамиятдаги қонун-қоидаларга бўйсунади, ўз ҳақ-ҳуқуқларидан фойдаланади. Ҳар бир давлатнинг эса, ўз конституцияси ҳамда ўз қонунлари бор. Бироқ, қайси жамиятда яшашингиздан қатъий назар ҳар қандай жиноятга ёки ҳуқуқбузарликка жавобгарлик бор. Албатта, жиноятга одилона баҳо беришда, ҳақиқатнинг қарор топишида одил судловнинг аҳамияти катта.

13 март куни Амударё туманининг Дурунки МФЙ биносида Жиноят ишлари бўйича Амударё туман судининг тергов судьяси Донахон Юсупова раислигида, судья ёрдамчиси Элёр Жуманиёзовнинг котиблигида очиқ сайёр суд мажлиси бўлиб ўтди. Очиқ сайёр суд мажлисида Амударё туман ИИБ томонидан тақдим қилинган жами 13 та маъмурий ҳуқуқбузарликка оид ишлар кўриб чиқилди.

Жумладан, Ўзбекистон Республикаси Маъмурий жавобгарлик тўғрисидаги Кодексининг 183-моддасида кўрсатилган майда безорилик ҳуқуқбузарлигини содир этган 5 нафар шахсга нисбатан тўпланган маъмурий ҳуқуқбузарлик иш материаллари кўриб чиқилди ва 3 нафар шахсга нисбатан маъмурий қамоқ жазоси, 2 нафар шахсга нисбатан эса маъмурий жарима жазоси тайинланди.

Ундан ташқари, Ўзбекистон Республикаси Маъмурий жавобгарлик тўғрисидаги Кодексининг 101-моддаси 1-қисмида назарда тутилган электр, иссиқлик энергияси, газдан фойдаланиш қоидаларини бузиш ҳолати бўйича ҳуқуқбузарлик содир этган 3 нафар шахсга нисбатан тўпланган иш материаллари ҳам кўриб чиқилиб, айбдорларга нисбатан маъмурий жарима жазоси тайинланди.

Шунингдек, суд мажлисида Ўзбекистон Республикаси Маъмурий жавобгарлик тўғрисидаги Кодексининг 59-моддаси 2-қисмида назарда тутилган маиший зўравонлик ҳолати бўйича ҳуқуқбузарлик содир этган ҳамда ушбу кодекснинг 41-моддаси ва 52-моддасининг 2-қисмида назарда тутилган ҳуқуқбузарликларни содир этган шахсларга нисбатан тўпланган иш материаллари ҳам кўриб чиқилиб, ҳуқуқбузар деб топилган шахсларга нисбатан қонунда назарда тутилган жазолар тайинланиб, қонуний, адолатли қарорлар қабул қилинди.

Маълумки, инсон жамиятда ўз ўрнини эгаллаб, эл-юрт орасида обрў-эътибор қозониши игна билан қудуқ қазишдек мураккаб жараён. Намунали фуқаро бўлиш учун эса, эҳтимол, йиллар керак. Биргина босилган эгри қадам ёки биргина ҳуқуқбузарлик ана шу мисқоллаб йиғилган инсонийлик мавқесини йўққа чиқариши шубҳасиз. Шундай экан, ҳар бир шахс ўз ҳуқуқларини билган ҳолда, атрофидагиларнинг, давлат ва жамиятнинг ҳуқуқ ва манфаатларини ҳурмат қилиши керак.

Донахон Юсупова, Жиноят ишлари бўйича Амударё туман судининг теров судьяси.