Tomorqa – daromad manbai va farovonlik kafolati

Bahor fasli dehqonlar uchun yangi hayot, yangi imkoniyatlar mavsumi. Ona zamin yashil rangga burkanib, tabiat uygʻongan sari mehnatsevar insonlar ham dala va tomorqa ishlariga kirishadi. Mamlakatimizda aholining tomorqalardan samarali foydalanishi, daromad topish imkoniyatlarini kengaytirish maqsadida keng koʻlamli chora-tadbirlar amalga oshirilmoqda. Qishloq xoʻjaligini rivojlantirishga qaratilgan davlat dasturlari doirasida ajratilayotgan imtiyozli kreditlar va subsidiyalar aholi uchun haqiqiy imkoniyatga aylandi.

Amudaryo tumanining Arnaboʻyi mahallasida mehnatkash dehqon va tadbirkorlar mahalla raisi Shuhrat Sultanov va hokim yordamchisi Siroj Urazmatovlarning saʼy-harakatlari bilan mavjud imkoniyatlardan samarali foydalanib, dehqonchilik va tomorqa orqali yaxshi natijalarga erishmoqda. Yetishtirilgan mahsulotlar aholi dasturxonlari toʻkinligiga ham hissa qoʻshmoqda.

Jamoliddin Raimboyev issiqxonasida bahor mavsumiga mos bodring urugʻlari ekilgan boʻlib, bugungi kunda unib chiqqan. Issiqxona egatlari plyonka bilan qoplangani tufayli issiqlik taʼsiri oshirilib, hosildorlik yuqori boʻlishi taʼminlanmoqda.

Jamoliddin Raimboyev bolaligidan dehqonchilikka qiziqib kelgan. Avval oziq-ovqat savdosi bilan shugʻullangan, bugun esa yaxshi koʻrgan kasbi orqali daromad topish maqsadida issiqxona tashkil etdi. 2024-yil iyun oyida 30 sotix yer maydonida issiqxona qurishga kirishgan tadbirkor iyul oyi oʻrtalarida bodring ekib, bir oy ichida ilk hosilni oldi.

Issiqxonada mahalliy va saralangan navli bodringlar yetishtirilmoqda. Tomchilatib sugʻorish tizimining joriy etilishi suv tejamkorligini taʼminlab, hosildorlikni oshirishga xizmat qilmoqda. Issiqxona qurish ishlari andijonlik tajribali ustalar tomonidan bajarilgan. Raimboyevlar oilasi issiqxona orqali yil davomida 3-marta hosil olishga erishmoqda. Loyihani amalga oshirish uchun bankdan 5-yil muddatga 280 million soʻm miqdorida imtiyozli kredit olingan. Har bir ekish mavsumida ekin 2 oy davomida hosil beradi va mahalliy bozorlarga yetkazib beriladi.

Mahalladagi yana bir mehnatkash tomorqachi Oybek Xalillayev ham oilasi bilan 4 sotixlik issiqxonasida asosan bodring yetishtiradi. Bu yil dehqon sinov tariqasida pomidor va qalampir ekishga ham bel bogʻladi. Issiqxonadan tashqari 30 sotixdan iborat tomorqasida kartoshka, karam, shuningdek, bodring va pomidor yetishtirish bilan shugʻullanadi. Bugungi kunda kartoshka ekish ishlari yakunlangan boʻlib, issiqxonaga oʻz koʻchatxonasida yetishtirilgan bodring koʻchatlarini oʻtkazmoqda.

Oybek aka mehnatsevar va irodali inson. U nogironligi bor boʻlishiga qaramay, tirishqoqligi va mehnatsevarligi bilan halol rizq topmoqda. Baʼzi odamlar sogʻlom boʻlsa-da, hayotdan nolib yashaydi. Oybek aka esa turmush oʻrtogʻi Gulnora Ametova va farzandlari bilan fidokorona mehnati bilan oilaga daromad keltirmoqda.

Oybek Xalillayevning onasi – 75 yoshli Gulchehra ona Turayeva ham haligacha faol mehnat qiladi. U farzandlariga bosh boʻlib, tomorqada yoshlardek sergʻayrat ishlaydi. Gulchehra ona nevaralari uchun saboq va mehnatkashlikning yorqin namunasidir.

Tomarqadan olingan daromad orqali Oybek Xolillayevning katta qizi Malohat Boltaboyeva Toshkent irrigatsiya va qishloq xoʻjaligini mexanizatsiyalash muhandislari instituti Milliy tadqiqot universitetida tahsil olmoqda, kichik qizi Mahliyo Boltaboyeva esa 10-sinf oʻquvchisi.

Bu oila nafaqat issiqxonachilik, balki chorvachilik va asalarichilik bilan ham shugʻullanib, turli sohalarda oʻzini sinab koʻrmoqda.

Bugungi kunda davlat tomonidan qishloq xoʻjaligini rivojlantirish, dehqonchilik va oilaviy tadbirkorlikni qoʻllab-quvvatlash maqsadida imtiyozli kreditlar ajratilayotgani koʻpchilik uchun yangi imkoniyatlar eshigini ochmoqda. Yosh oilalar va ijtimoiy himoyaga muhtoj qatlam vakillari uchun bunday imkoniyatlar – mustaqil biznes tashkil etish va oilaviy daromadni oshirishda katta yordam boʻlmoqda.

Eng muhimi, tomorqa – daromad manbai. Agar inson harakat qilsa, yer unga saxovatini ayamaydi. Har qanday sharoitda ham mehnat qilib, ilm va tajribasini boyitgan kishi oʻzining va oilasining farovonligini taʼminlay oladi.

Shohzod Qurbonboyev.