Yurt obodligi va farovonligi yoʻlidagi asosiy vazifalar belgilab olindi

Bahor kirib kelishi bilan butun tabiat uygʻondi. Qishning izgʻirinli kunlari yakunlanib, ona zaminimizda yangilanish, yasharish boshlandi. Tabiatning bizga bergan neʼmatlaridan unumli foydalanish, yurtimiz obodligiga hissa qoʻshish har birimizning insoniy burchimizdir!

10-mart kuni Amudaryo tumanidagi markaziy oʻyingohda yurt obodligi va xalq farovonligini taʼminlash borasidagi asosiy vazifalarga bagʻishlangan yigʻilish oʻtkazildi. Yigʻilishda tuman hokimi Sobir Xoʻjametov, respublika va tumandan biriktirilgan vakillar va masʼul rahbarlar, hokim oʻrinbosarlari, fermerlar, korxona-tashkilotlar rahbarlari, “Mahalla yettiliklari” masʼullari ishtirok qildilar.

Yigʻilishda Oʻzbekiston Respublikasi Prezidenti Administratsiyasining 2025-yil 3-martdagi topshirigʻiga muvofiq tumanda Navroʻz umumxalq bayramiga tayyorgarlik koʻrish, tuman markazi va qishloq aholi punktlarini obodonlashtirish hamda koʻkalamzorlashtirish, fermer xoʻjaliklari ekin maydonlarini mavsumga tayyorlash, kanal va ariqlarni betonlashtirish, shuningdek, yangi tizim asosida aholining tomorqa yerlaridan samarali foydalanishi borasida joylarda amalga oshirilayotgan ishlarni oʻrganish va aholiga amaliy yordam koʻrsatish boʻyicha hududlarida bajarilishi lozim ishlar yuzasidan asosiy vazifalar belgilab olindi va tegishli topshiriqlar berildi.

Yigʻilishda tuman hokimi Sobir Xoʻjametov soʻzga chiqib, davlatimiz rahbari tashabbusi bilan butun yurtimizda, shu jumladan Amudaryo tumanida amalga oshirilayotgan bunyodkorlik, obodonlashtirish ishlarida aholining daxldorlik hissini shakllantirish, ushbu xayrli amallarga javob tariqasida aholi turar joylarini obodonlashtirish va koʻkalamzorlashtirish, xonadonlarda tozalik ishlarini tashkil etish, tomorqalardan unumli foydalanib, har qarich yerga ekin ekish lozimligi xususida soʻz yuritdi.

Shuningdek, tuman hokimi oʻz soʻzida Navroʻz umumxalq bayramiga munosib tayyorgarlik koʻrish hamda bayram tantanalarini avvalgi yildagilarga oʻxshamagan, oʻzgacha tarzda tashkil etish, xalqimiz orasida milliy qadriyatlarimizga xos boʻlgan oʻzaro mehr-oqibat va hamjihatlikni yanada kuchaytirish, bayram arafasida begʻaraz yordam, mehr-muruvvat kabi ezgu fazilatlarni yuksaltirish yuzasidan tegishli tavsiya va koʻrsatmalar berdi.

Yigʻilish mobaynida tumanni kompleks rivojlantirish boʻyicha respublikadan biriktirilgan vakil – Qoraqalpogʻiston Respublikasi Joʻqorgʻi Kengesining Sanoat, qurilish, transport va aloqa masalalari qoʻmitasi raisi Islam Sdikov soʻzga chiqib, bugungi kunda tumanni har tomonlama ijtimoiy-iqtisodiy rivojlantirish boʻyicha keng qamrovli ishlar amalga oshirilayotgani, bularning barchasi muhtaram Prezidentimizning xalq farovonligi yoʻlidagi islohotlarining samarali natijasi ekanligini alohida taʼkidladi va hamjihatlikda islohotlar ijrosi borasidagi ishlarni yanada jadallashtirish lozimligini takidlab, bu borada tegishli tavsiya va koʻrsatmalar berdi.

Masʼul vakil oʻz soʻzida tumanni har tomonlama kompleks rivojlantirish borasidagi ishlarda har bir rahbar zimmasiga yuklatilgan ishlarni oʻz vaqtida, samarali amalga oshirishi lozimligini taʼkidlab, natijadorlikka erishishda har doim amaliy yordamga tayyor ekanligini bildirdi.

Charos Arslonova, tuman hokimligining Axborot xizmati rahbari.