Jinoyatchilikka qarshi kurash va xavfsiz muhitni taʼminlash masalalari muhokama qilindi

Jamiyat barqarorligi va taraqqiyotini taʼminlashda mahalliy darajadagi huquq-tartibot ishlari muhim ahamiyatga ega. Shu maqsadda, 25-fevral kuni Qoraqalpogʻiston Respublikasi Ichki ishlar vaziri oʻrinbosari, polkovnik Muzaffar Rahmatullayev boshchiligida Amudaryo tumani hokimligida yigʻilish oʻtkazildi.

Bunda Oʻzbekiston Respublikasi Prezidentining 2025-yil 3-yanvardagi "2025-yilda respublika mahallalarida xavfsiz muhitni yaratish va huquqbuzarliklarning barvaqt oldini olish tizimi samaradorligini yanada oshirish boʻyicha chora-tadbirlar toʻgʻrisida"gi Qarori ijrosi yuzasidan tumanda olib borilgan oʻrganishlar natijalari muhokama etildi.

 Tadbirda jinoyatchilik va huquqbuzarliklarning oldini olishda texnik vositalardan samarali foydalanish zarurligi taʼkidlandi. Shu maqsadda belgilangan oʻrinlarda kuzatuv kameralari oʻrnatilyapti. Oilalardagi osoyishtalikni taʼminlash maqsadida tuman Oila va xotin-qizlar boʻlimi tomonidan 11 nafar nizoli oilalar bilan profilaktik suhbatlar oʻtkazildi. Biroq, zoʻravonlik holatlarini aniqlash va ularni bartaraf etish, oʻz joniga qasd qilishning oldini olish chora-tadbirlari yetarli darajada tashkil etilmagan. Probatsiya nazoratidagi ayollarni ijtimoiy reabilitatsiya qilish, ishga joylashtirish, tadbirkorlik va hunarmandchilikka jalb etish ishlari ham qoniqarli tarzda bajarilmagan.

Ishsizlik va bandlikni taʼminlash masalalari ham alohida muhokama qilindi. Tuman Kambagʻallikni qisqartirish va bandlikka koʻmaklashish boʻlimi tomonidan 22 nafar xotin-qiz ishga joylashtirilgan. Biroq, probatsiya nazoratidagi shaxslarni kasb-hunarga yoʻnaltirish uchun monomarkazlarda oʻqitish ishlari mablagʻ ajratilmagani sababli boshlanmagan. Oqibatda bu holatlar huquqbuzarlik sodir etishga moyil shaxslarning ijtimoiy moslashuviga salbiy taʼsir koʻrsatishi mumkinligi qayd etildi.

Yigʻilishda jinoyatchilik holati va profilaktika ishlari tahlil qilindi. Joriy yilning yanvar va fevral oylarida tumanda 18 ta jinoyat sodir etilgan boʻlib, barchasi sektor rahbarlari ishtirokida muhokama qilingan. Tuman boʻyicha "qizil" toifaga kiritilgan mahallalarni “yashil” toifaga oʻtkazishga doir amaliy ishlar qilinyapti. "Ijtimoiy profilaktika" tadbirlari doirasida 443 nafar shaxs haqida xulosa berilgan va ovul-mahallalardagi masʼullar tomonidan qabul qilingan.

Shuningdek, mahalliy rahbarlarning nazorat ishlarini toʻliq taʼminlamagani aniqlangan. Xususan, tuman Kambagʻallikni qisqartirish va bandlikka koʻmaklashish boʻlimi rahbari tomonidan kunlik nazorat oʻrnatilmagan. Yoshlar ishlari agentligi tuman boʻlimi vazifalarini oʻz vaqtida bajarmagan.

Aniqlangan kamchiliklardan biri – mahallalarda “xonodonbay” va “fuqarobay” ishlash tizimi samarali tashkil qilinmagan. Migratsiyadan qaytgan va huquqbuzarlikka moyil fuqarolar bilan ishlash jarayonlari ham sust olib borilgan.

Yigʻilish yakunida mavjud muammolarni bartaraf etish va huquqbuzarliklarning oldini olish boʻyicha qator vazifalar belgilab olindi.

Shohzod Qurbonboyev