Жиноятчиликка қарши кураш ва хавфсиз муҳитни таъминлаш масалалари муҳокама қилинди
Жамият барқарорлиги ва тараққиётини таъминлашда маҳаллий даражадаги ҳуқуқ-тартибот ишлари муҳим аҳамиятга эга. Шу мақсадда, 25 февраль куни Қорақалпоғистон Республикаси Ички ишлар вазири ўринбосари, полковник Музаффар Раҳматуллаев бошчилигида Амударё тумани ҳокимлигида йиғилиш ўтказилди.
Бунда Ўзбекистон Республикаси Президентининг 2025 йил 3 январдаги "2025 йилда республика маҳаллаларида хавфсиз муҳитни яратиш ва ҳуқуқбузарликларнинг барвақт олдини олиш тизими самарадорлигини янада ошириш бўйича чора-тадбирлар тўғрисида"ги Қарори ижроси юзасидан туманда олиб борилган ўрганишлар натижалари муҳокама этилди.
Тадбирда жиноятчилик ва ҳуқуқбузарликларнинг олдини олишда техник воситалардан самарали фойдаланиш зарурлиги таъкидланди. Шу мақсадда белгиланган ўринларда кузатув камералари ўрнатиляпти. Оилалардаги осойишталикни таъминлаш мақсадида туман Оила ва хотин-қизлар бўлими томонидан 11 нафар низоли оилалар билан профилактик суҳбатлар ўтказилди. Бироқ, зўравонлик ҳолатларини аниқлаш ва уларни бартараф этиш, ўз жонига қасд қилишнинг олдини олиш чора-тадбирлари етарли даражада ташкил этилмаган. Пробация назоратидаги аёлларни ижтимоий реабилитация қилиш, ишга жойлаштириш, тадбиркорлик ва ҳунармандчиликка жалб этиш ишлари ҳам қониқарли тарзда бажарилмаган.
Ишсизлик ва бандликни таъминлаш масалалари ҳам алоҳида муҳокама қилинди. Туман Камбағалликни қисқартириш ва бандликка кўмаклашиш бўлими томонидан 22 нафар хотин-қиз ишга жойлаштирилган. Бироқ, пробация назоратидаги шахсларни касб-ҳунарга йўналтириш учун мономарказларда ўқитиш ишлари маблағ ажратилмагани сабабли бошланмаган. Оқибатда бу ҳолатлар ҳуқуқбузарлик содир этишга мойил шахсларнинг ижтимоий мослашувига салбий таъсир кўрсатиши мумкинлиги қайд этилди.
Йиғилишда жиноятчилик ҳолати ва профилактика ишлари таҳлил қилинди. Жорий йилнинг январь ва февраль ойларида туманда 18 та жиноят содир этилган бўлиб, барчаси сектор раҳбарлари иштирокида муҳокама қилинган. Туман бўйича "қизил" тоифага киритилган маҳаллаларни “яшил” тоифага ўтказишга доир амалий ишлар қилиняпти. "Ижтимоий профилактика" тадбирлари доирасида 443 нафар шахс ҳақида хулоса берилган ва овул-маҳаллалардаги масъуллар томонидан қабул қилинган.
Шунингдек, маҳаллий раҳбарларнинг назорат ишларини тўлиқ таъминламагани аниқланган. Хусусан, туман Камбағалликни қисқартириш ва бандликка кўмаклашиш бўлими раҳбари томонидан кунлик назорат ўрнатилмаган. Ёшлар ишлари агентлиги туман бўлими вазифаларини ўз вақтида бажармаган.
Аниқланган камчиликлардан бири – маҳаллаларда “хонодонбай” ва “фуқаробай” ишлаш тизими самарали ташкил қилинмаган. Миграциядан қайтган ва ҳуқуқбузарликка мойил фуқаролар билан ишлаш жараёнлари ҳам суст олиб борилган.
Йиғилиш якунида мавжуд муаммоларни бартараф этиш ва ҳуқуқбузарликларнинг олдини олиш бўйича қатор вазифалар белгилаб олинди.
Шоҳзод Қурбонбоев
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
