FVVga qarashli harbiy qismlarda xizmat qilayotgan harbiy xizmatchilar uchun test sinovlari oʻtkazildi

Oʻzbekiston Respublikasi Oliy taʼlim, fan va innovatsiyalar vazirligi huzuridagi Bilim va malakalarni baholash agentligi va tegishli tashkilotlar tomonidan har yili oʻtkaziladigan maxsus imtihonlar muddatli harbiy xizmatni oʻtayotgan yoshlarning intellektual rivojlanishi hamda oliy taʼlim muassasalarida tahsil olish intilishlarini qoʻllab-quvvatlashga xizmat qilmoqda.

20-fevral kuni Prezident maktablari tizimidagi Amudaryo ixtisoslashtirilgan maktabida Qoraqalpogʻiston hududida joylashgan Oʻzbekiston Respublikasi Favqulodda vaziyatlar vazirligiga qarashli harbiy qismlarda xizmat qilayotgan muddatli harbiy xizmatchilar oʻrtasida oliy taʼlim muassasalariga kirishda imtiyoz beruvchi tavsiyanoma uchun test sinovlari tashkil etildi.

Mazkur test sinovlari harbiy xizmatchilarning bilim darajasini aniqlash, oliy taʼlimga kirish imkoniyatlarini kengaytirish hamda intellektual rivojlanishlarini ragʻbatlantirishga yoʻnaltirilgan. Jarayon boshlanishidan oldin Bilim va malakalarni baholash agentligining Qoraqalpogʻiston Respublikasi boʻlimi vakillari tomonidan ishtirokchilarga test oʻtkazish tartibi, baholash mezonlari hamda muhim jihatlar haqida tushunchalar berildi.

Imtiyozli tavsiyanoma berish jarayoni harbiy xizmatchilarning xizmat davomida erishgan natijalari va bilim saviyasi asosida baholanadi. Asosiy mezonlar qatoridan jangovar tayyorgarlik, maʼnaviy-maʼrifiy saviya va nazariy bilimlar oʻrin oladi. Jangovar tayyorgarlik harbiy xizmatchilarning jismoniy tayyorgarligi, taktik mashgʻulotlardagi muvaffaqiyatlari va xizmat davomida koʻrsatgan qobiliyatlariga asoslanib baholanadi. Maʼnaviy-maʼrifiy saviya esa ularning vatanparvarlik ruhida tarbiyalanganligi, intizomi hamda huquqiy bilimlari darajasi bilan belgilanadi. Nazariy bilimlar esa matematika, fizika va mantiqiy tafakkurga oid test sinovlari orqali aniqlanadi.

Test sinovlari 100 ta savoldan iborat boʻlib, harbiy xizmatchilarning turli yoʻnalishlardagi tayyorgarlik darajasini baholashga qaratilgan. Baholash tizimi jangovar va maʼnaviy-maʼrifiy tayyorgarlik, shuningdek, nazariy bilimlar darajasiga asoslangan holda amalga oshiriladi.

Tavsiyanoma faqat intizomli, bilimli va faol harbiy xizmatchilarga taqdim etiladi. Agar harbiy xizmatchi xizmat davomida intizomiy qoidabuzarliklarga yoʻl qoʻygan boʻlsa, u tavsiyanoma olish huquqidan mahrum qilinadi. Ushbu tizim, bir tomondan, harbiy xizmat intizomini mustahkamlashga xizmat qilsa, ikkinchi tomondan, oliy taʼlimga intilayotgan yoshlarni oʻz bilim va mahoratini oshirishga ragʻbatlantiradi.

Tavsiyanomaga ega boʻlgan harbiy xizmatchilar oliy taʼlim muassasalariga kirishda test natijalari boʻyicha toʻplagan ballarining 50 foizi miqdorida qoʻshimcha ball olish imkoniyatiga ega boʻladilar. Shuningdek, harbiy xizmatni oʻtagan abituriyentlar uchun alohida kvotalar ajratiladi. Tavsiyanoma uch yil davomida amal qiladi va bu muddat yoshlar uchun oliy taʼlimga kirish rejalarini puxta tayyorlash imkonini yaratadi.

Mazkur test sinovlarida jami 200 nafardan ortiq muddatli harbiy xizmatchi ishtirok etdi. Ushbu tashabbus yoshlarga bilim olishga boʻlgan qiziqishini oshirish, harbiy xizmat mobaynida egallagan tajribalari asosida oliy taʼlimga yoʻl ochish imkonini bermoqda. Bu esa oʻz navbatida harbiy xizmatchilarning intellektual va kasbiy rivojlanishiga koʻmaklashadi.

Shohzod Qurbonboyev.