Biz buyuk yurt farzandlarimiz!

Dunyo tamadduniga ulkan hissa qoʻshgan ota-bobolarimiz hokini oʻz bagʻriga olgan yurtimizda, ne-ne zulmlar, jabr-jafolar cheksa-da oʻzligini yoʻqotmagan, dunyoda tengsiz asl milliy ildizlaridan kuch olib tobora ravnaq topib borayotgan xalqimizning bugungi vorislari - yoshlarimiz oʻzlari ulgʻaygan osuda beshik – Ona yurt xizmatiga shay, kamarbasta boʻlib voyaga yetmoqda. Zamonaviy uslubda qurilgan, ilgʻor texnologiyalar bilan jihozlangan, barcha sharoitlarga ega maktablar, oʻrta maxsus, kasb-hunar taʼlimi, oliy taʼlim muassasalari yoshlarimizning ilm-fan sirlarini puxta egallashi, kasb-hunarli boʻlib, ilk mehnat koʻnikmalariga ega boʻlishiga, bilimdon va fidoyi boʻlib voyaga yetishlariga xizmat qilmoqda.

Shuni nazardan qochirmaslik kerakki, bugungi kunda yoshlarimizga yaratilayotgan imkoniyatlar bilan bir qatorda ularni toʻgʻri yoʻldan ozdirishga urinayotgan manfur kuchlar ham bor. Butun dunyoda globallashuv jarayonining chuqurlashuvi va axborot texnologiyalarining takomillashib borgani sari milliy madaniyatimizning, qadriyatlarimizning va asrlar osha yashab kelayotgan azaliy urf-odatlarimizning turmushimizda oʻz jilosini saqlab qolishiga erishish dolzarb vazifa boʻlib qolmoqda. Chunki Gʻarb "ommaviy madaniyati” tobora kengroq hududlarni qamrab olmoqda. Uni yanada keng yoyishga urinayotgan kuchlarning maqsadi esa insonlarni milliy madaniyatidan uzoqlashtirish, dunyoni bir tizimga solib, bitta oqim boʻylab harakatlanishini taʼminlash, antimilliy gʻoyalarni osonlikcha singdirish, maʼnaviy begonalashuvni yuzaga keltirishdan iborat.

Yurtimizda yoshlarimiz tarbiyasiga, maʼnaviyatiga salbiy taʼsir koʻrsatishi mumkin boʻlgan har qanday kuchlar taʼsiridan saqlanish, hayotimizda ularga yoʻl bermaslik uchun koʻpgina chora-tadbirlar amalga oshirilmoqda.Mamlakatimiz yoshlari kamoliga xizmat qiluvchi koʻplab chora-tadbirlar dasturlari ishlab chiqilib, amalga oshirilmoqdaki, bular albatta oʻz samaralarini bermoqda.

Shu yilning 13-may kuni tumanimizda "Biz buyuk yurt farzandlarimiz!” shiori ostida boʻlib oʻtgan yoshlar festivali ham ana shunday tadbirlardan biridir.

Festivalni oʻtkazishdan maqsadyoshlarni "ommaviy madaniyat”ning turli yot gʻoyalaridan asrash, xalqimizning milliy qadriyatlariga hurmat va sadoqat ruhida tarbiyalash, mamlakatimiz ijtimoiy-iqtisodiy, maʼnaviy-madaniy taraqqiyoti yoʻlida oʻz hissalarini qoʻshayotgan iqtidorli va isteʼdodli yosh ijodkorlar, ijtimoiy faol yoshlarni har tomonlama qoʻllab-quvvatlash, iqtidorli yoshlarning ilm-fan sohalarida qoʻlga kiritayotgan yutuqlarini ragʻbatlantirish, ularning aql-zakovati va intellektual qobiliyatlarini toʻla namoyon etishiga koʻmaklashish, yoshlar orasida sogʻlom turmush tarzini keng targʻib qilishdan iboratdir.

Festivalning ochilishi va "Siz sevgan qahramonlar” mavzusida taniqli yozuvchilar, shoirlar, kino aktyorlari hamda estrada xonandalari bilan ijodiy uchrashuv Amudaryo akademik litseyida boʻlib oʻtdi. Ona yurtga muhabbat, sadoqat tuygʻularini madh etuvchi, oʻz tugʻilgan makonini yot kuchlardan himoya qilishga chorlovchi qoʻshiqlar barcha ishtirokchilar qalbida aks sado berdi.

Festival doirasidagi tadbirlardan biri Mangʻit iqtisodiyot kollejida oʻtkazildi. Bu yerda "Prezident asarlari bilimdoni” loyihasida Oʻzbekiston Respublikasi Prezidenti Islom Karimovning "Oʻzbekiston mustaqillikka erishish ostonasida” nomli kitobi boʻyicha qatnashchilarning bilimlari sinovdan oʻtkazildi. Shuningdek, olimlar va yozuvchilar ishtirokida kitobning mazmun-mohiyatini tushuntirishga qaratilgan seminar-trening tashkil etildi.

250 nafar yoshlar ishtirok etgan "Biz sogʻlom turmush tarzi tarafdorimiz” nomli loyihada tumanimizdagi oʻrta maxsus, kasb-hunar taʼlimi muassasalari oʻquvchilari oʻrtasida futbol va voleybol boʻyicha Doʻrman qishloq xoʻjalik kasb-hunar kollejida musobaqalar oʻtkazildi.

Tuman madaniyat va sport ishlari boʻlimi binosida 300 nafar yoshlar "Gumrohlar” nomli kinofilmni tomosha qildilar.

Amalga oshirilgan tadbirlar tumanimizning yoshlarini yurt ravnaqi yoʻlida bir tanbir jon boʻlib birlashishga, har qanday yot gʻoyalar turmushimizga kirib kelishining oldini olishda yakdil kurashishga chorladi.

Yoshlar festivali doirasidagi tadbirlarda Oʻzbekiston xalq artisti Rajab Adashev, aktyorlar Poʻlat Normatov, Yunus Asqarov, Oʻzbekistonda xizmat koʻrsatgan artist Samandar Hamroqulov, estrada xonandasi Tohir Usmonov, aktyor Nurbek Mamatov, yosh olima Gulmira Shomurodova, Oliy Majlis Qonunchilik palatasi deputati Joldasbay Abdujamilov, "Oʻzbekiston belgisi” koʻkrak nishoni sohibasi Goʻzal Ergasheva, Zulfiya nomidagi davlat mukofoti sohibasi Shahzoda Bozorboyevalar ishtirok etdilar.

Oygul RAJABOVA.