Jumurtov shaharchasida yoshlarga eʼtibor qay darajada?

Yurtimizda yoshlarning taʼlim olishi, kasb-hunar egallashi va jamiyatda faol ishtirok etishi uchun keng imkoniyatlar yaratilmoqda. Ularni ijtimoiy himoya qilish, tadbirkorlikka jalb qilish va bandligini taʼminlash borasida tizimli chora-tadbirlar amalga oshirilayotgani eʼtiborga molik. Jumladan, Jumurtov shaharcha fuqarolar yigʻinida ham yoshlar manfaatlarini himoya qilish va ularni har tomonlama qoʻllab-quvvatlash borasida samarali ishlar olib borilmoqda. 

Xususan, mahalladagi yoshlar yetakchisi Muyassar Murodova tashabbusi bilan 2024-yil davomida “Yoshlar daftari”ga kiritilgan 16 nafar yoshlarning ijtimoiy himoyasi taʼminlandi. Oliy taʼlim muassasalarida tahsil olayotgan 13 nafar talabaning kontrakt toʻlovining bir qismi qoplab berildi. Shuningdek, yoshlarning 2 nafariga subsidiya asosida tikuv mashinalari taqdim etilgan boʻlsa, yana 1 nafarining safarbarlik rezervi toʻlovi toʻliq toʻlab berildi. Yoshlarning boʻsh vaqtini mazmunli oʻtkazish maqsadida sport musobaqalari, maʼnaviy-maʼrifiy tadbirlar tashkil etildi, bu esa ularning jamiyatdagi faolligini oshirishga xizmat qilmoqda. 

Mahalladagi hokim yordamchisi Samandar Bobojonov boshchiligida oʻtgan yili “Yoshlar va biznesni qoʻllab-quvvatlash yili” davlat dasturi doirasida ham bir qator amaliy ishlar qilindi. Jumladan, 28 nafar ishsiz yoshlar roʻyxatga olinib, ularning 10 nafariga 30-yil muddatga ijara asosida dehqonchilik qilishlari uchun yer maydonlari ajratildi. Shuningdek, 5 nafar yoshlarga tadbirkorlikni yoʻlga qoʻyish uchun jami 81 million soʻmlik kredit mablagʻlari ajratilib, ish faoliyati uchun zarur texnika va jihozlar bilan taʼminlandi.  

Mamlakatimizda yoshlarga qaratilayotgan eʼtibor, ularning taʼlim olishi va mehnat bozorida munosib oʻrin egallashi uchun yaratilayotgan imkoniyatlar Jumurtov shaharchasi yoshlarining ham hayotlarida oʻz aksini topmoqda.

Ozoda Xolnazarova, Iroda Xolnazarova - QDU talabalari, tahririyat amaliyotchilari.