Afgʻon urushi ishtirokchilari uchun bayram tadbiri tashkil etildi

Oʻtgan asrning 79-89-yillarida Afgʻonistondagi fuqarolik urushi va qurolli toʻqnashuvlarda ishtirok etgan sobiq Sovet ittifoqi qoʻshinlari 1989-yil 15-fevral kuni mamlakat hududidan olib chiqib ketilgan edi. Ushbu sana Afgʻon urushi faxriylarining bayramiga aylangan. Salkam oʻn yil mobaynida Afgʻoniston hududida boʻlib oʻtgan harbiy harakatlarda Respublikamizdan 3580 nafar harbiy xizmatchilar ishtirok etgan. Anʼanaga muvofiq bu yil ham Afgʻon urushi qatnashchilari, jangchi-faxriylar ishtirokida ushbu mamlakatdan sobiq Sovet ittifoqi qoʻshinlari olib chiqilganining 36 yilligi keng nishonlanmoqda. Amudaryo tumanida ham sana munosabati bilan urush faxriylarining aholi va yoshlar bilan uchrashuvlari hamda bayram tadbirlari tashkil etilmoqda.

Amudaryolik afgʻon urushi qatnashchilari boʻlmish jangchi-faxriylar ishtirokida tumandagi Xotira maydoniga oʻrnatilgan “Motamsaro ona” haykali poyiga gulchambarlar qoʻyildi. Baynalmilal jangi-faxriylar Afgʻonistondagi urush harakatlarida qatnashib, shahid boʻlgan quroldoshlari xotirasiga hurmat bajo keltirib, urush qiyinchiliklari, uning salbiy oqibatlarini eslab, yurtimizdagi tinchlik mangu boʻlishini tilab duoga qoʻl ochdilar.

Soʻngra tantanalar Mangʻit shahridagi “Diamond” restoranida davom ettirildi. Bu yerda afgʻon urushi qatnashchilari boʻlmish baynalmilal jangchilar uchun bayram dasturxoni yozildi.

Tuman hokimligi tomonidan tashkil etilgan tadbirda hokimning yoshlar siyosati, ijtimoiy rivojlantirish va maʼnaviy-maʼrifiy ishlar boʻyicha oʻrinbosari Nodirbek Kamolov, tuman Mudofaa ishlari boʻyicha boʻlim boshligʻi Shuhrat Mamatov, respublika Maʼnaviyat va maʼrifat markazi tuman boʻlimi boshligʻi Islom Matkarimov hamda Oʻzbekiston “Veteran” jangchi-faxriy va nogironlar birlashmasining tumandagi vakili Bahodir Jumaniyozov boshchiligida bir guruh faxriy jangchilar ishtirok etdi.

Bayram tadbirini tuman hokimi oʻrinbosari Nodirbek Kamolov tabrik soʻzi bilan ochib berdi. U oʻz nuqida Afgʻonistonda chorak asrcha davom etgan oʻzaro urushlarga barham berish uchun sobiq ittifoq armiyasi safida safarbar qilingan, murakkab sharoitlarda jang-u jadallarda qatnashib, omon qaytgan faxriylar uchun 15-fevral – sobiq ittifoq qoʻshinlari olib chiqib ketilgan sana chinakam bayram ekanligini taʼkidladi hamda ularni bayram bilan tabrikladi. Sana munosabati bilan har yili mamlakatimizda turli tadbirlar oʻtkazilib, Afgʻon urushi faxriylariga alohida hurmat-eʼtibor koʻrsatilayotgani, ularning munosib dam olishi va salomatliklarini tiklashlari uchun hukumatimiz tomondan sharoitlar yaratilganini qayd qilib, Afgʻon urushi faxriylariga tashakkurnomalar, esdalik sovgʻalarini topshirdi.

Bayram tadbirida soʻz olganlar yurtimizda jangchi-faxriylarni har tomonlama qoʻllab-quvvatlashga va halok boʻlgan vatandoshlarimizning xotirasini abadiylashtirishga katta eʼtibor qaratilayotganini qayd qilib, ushbu urush qanchadan-qancha oilalarning yostigʻini quritgani, bugungi tinch va osoyishta hayotimizning qadriga yetish, yoshlarni vatanparvarlik ruhida tarbiyalashda urush faxriylarining tajribasi va hayot yoʻlini oʻrnak qilib koʻrsatish lozimligini qayd etdilar. Afgʻon urushida halok boʻlgan faxriylarni xotirlash har birimizning insoniy burchimiz ekanligi alohida taʼkidlandi.

Maʼlumotlarga koʻra, Afgʻon urushida 65 ming nafar Oʻzbekiston fuqarolari qatnashib, ularning 1500 nafardan koʻprogʻi halok boʻlgan. Amudaryo tumanidan harbiy harakatlarda ishtirok qilgan fuqarolarning 13 nafari janglarda halok boʻlgan, 20 nafari urushda yaralangan, 278 nafari esa bugungi kunda tinch va osoyishta yurtimizda umrguzaronlik qilmoqda.

Bayram tadbiri mobaynida tuman Madaniyat boʻlimi sanʼatkorlari tomonidan kontsert dasturi namoyish etildi. Xonandalar tomonidan ijro etilgan Vatan, ona, tinchlik, shukronalik haqidagi shoʻx-shodon kuy-qoʻshiqlar faxriylarimizga bayramona koʻtarinki kayfiyat bagʻishladi.

Charos Arslonova, tuman hokimligining Axborot xizmati rahbari.