48-SONLI MAKTABNING YaNGI BINOSI FOYDALANIShGA TOPShIRILDI

Taʼlim-tarbiyaga eʼtibor kuchli boʻlgan jamiyat aʼzolari yuksak maʼnaviyatli, shu bilan birga ilgʻor fikrli, ilm-u maʼrifatning qadr-qimmatini hamma narsadan ustun qoʻyguvchi shaxslar sifatida shakllanadilar, oʻsib kelayotgan yosh avlodning chuqur bilim olishlarini taʼminlash maqsadida fidoyilik koʻrsatadilar. Mamlakatimizda taʼlim tizimiga qaratilayotgan eʼtibor va izchillik bilan amalga oshirilayotgan islohotlar mazmun-mohiyatida ham, eng avvalo, Yangi Oʻzbekistonning yangi avlodlarini barkamol va yetuk insonlar qilib voyaga yetkazish orqali jamiyatimizni yanada taraqqiy ettirishdek ezgu maqsadlar mujassam. Bu taʼlim-tarbiya sohasini dunyo andozalariga mutanosib ravishda rivojlantirish, sohaning moddiy texnik taʼminotini yaxshilash, muassasalarni eng soʻnggi rusumdagi taʼlim texnologiyalari bilan jihozlashga qaratilgan amaliy chora-tadbirlarda oʻz ifodasini topmoqda.

Amudaryo tumanida ham davlatimiz tomonidan qaratilayotgan ana shunday eʼtibor va ragʻbat tufayli taʼlim muassasalarining moddiy-texnik taʼminoti yil sayin yaxshilanib bormoqda. Xususan, soʻnggi yillarda tumandagi bir nechta umumtaʼlim maktablarida joriy taʼmirlash va rekonstruktsiya ishlari olib borildi. Birgina 2024-2025 oʻquv yilida 35-, 31- sonli umumtaʼlim maktablari uchun qoʻshimcha binolar qurib berildi, bir nechta maktablarda joriy taʼmirlash ishlari amalga oshirildi. Mazkur taʼlim muassasalarining yangidan qurilgan qoʻshimcha binolarida ayni paytda oʻquvchilar zamonaviy sharoitlarda bilim olishmoqda.

Bundan 50-yil avval – 1975-yilda, oʻsha davr talablaridan kelib chiqib, 190 oʻquvchi oʻrniga moʻljallab bunyod etilgan 48-sonli umumtaʼlim maktabida ayni paytda 423 nafar oʻquvchi taʼlim olishadi. Oʻquvchilarga zamon talablari darajasida taʼlim-tarbiya berish uchun zarur sharoit yaratish maqsadida mazkur taʼlim muassasasiga ham qoʻshimcha bino qurilishi davlat dasturiga kiritildi va 4 mlrd 706 mln. soʻm mablagʻ ajratildi.

“JUMURTOV TEX TAʼMIR SERVISʼ MChJ quruvchilari tomonidan bunyod etilgan maktabning 240-oʻrinli yangi qoʻshimcha binosida zamonaviy sport anjomlari bilan jihozlangan 12ga 24 metr oʻlchamdagi sport zali, toʻliq kompyuter jamlanmalari bilan taʼminlangan 1ta sinfxona, 2ta elektron doska, 60-oʻrinli oshxona mavjud boʻlib, yangi binoning barcha sinf xonalari yangi partalar, stol-stullar doskalar bilan jihozlangan.

Joriy yilning 11-fevral sanasida Jumurovul mahallasida qad rostlagan maktabning yangi qoʻshimcha binosini foydalanishga topshirishga bagʻishlangan marosim boʻlib oʻtdi. Unda Amudaryo tumani hokimining birinchi oʻrinbosari Faxriddin Yusupov, hokim oʻrinbosari Nodirbek Kamolov, tuman Maktabgacha va maktab taʼlimi boʻlimi mudiri Yalgʻash Shamuratov, shuningdek, mazkur maktab pedagogika jamoasi, ovul nuroniylari ishtirok etishdi.

Maktabning yangi binosini foydalanishga topshirishga bagʻishlangan tadbirni Amudaryo tumani hokimining birinchi oʻrinbosari Faxriddin Yusupov ochdi va maktab pedagogika jamoasini hamda oʻquvchi-yoshlarni zamonaviy talablar asosida barpo etilgan yangi oʻquv maskani bilan tabrikladi. Shu bilan birga maktab pedagogika jamoasining davlatimiz gʻamxoʻrligiga munosib ravishda faoliyat olib borishlarida muvaffaqiyatlar tiladi.

Shuningdek, tadbirda soʻzga chiqqanlar davlatimiz tomonidan taʼlim tizimiga qaratilayotgan eʼtibor va amalga oshirilayotgan keng koʻlamli islohotlar tufayli bugungi avlod yoshlari orasida bilimdon, yuksak salohiyatli va intiluvchan oʻquvchilar safi oshib borayotganini alohida taʼkidlab, 48-sonli maktab bitiruvchilarining ham oliy oʻquv yurtlariga oʻqishga kirish koʻrsatkichlari quvonarli ekanligini qayd etdilar va maktab qurilishini sifatli amalga oshirgan bunyodkorlarga chin dildan minnatdorchilik bildirdilar.

Tadbir davomida “JUMURTOV TEX TAʼMIR SERVIS” MChJ rahbari Akbar Tairov maktab direktori Oʻktam Qoʻshnazarovga yangidan bunyod etilgan maktab binosining ramziy kalitini topshirdi.

Shundan soʻng tadbir ishtirokchilari oʻquv muassasasining yangi binosida yaratilgan shart-sharoitlar bilan yaqindan tanishdilar va qoʻli gul quruvchilar tomonidan barcha ishlar sifatli amalga oshirilganini alohida eʼtirof etdilar.

Shu kunning oʻzida maktab oʻquvchilari ustozlari rahbarligida yangi binoda dars mashgʻulotlarini boshlab yubordilar.

ROBIYa YOʻLDOShEVA.