OYBEK NOMLI MAHALLADA “XUSNIYA KIDS” NODAVLAT MAKTABGAChA TAʼLIM TAShKILOTI OʻZ FAOLIYaTINI BOShLADI

Mamlakatimizda taʼlim-tarbiya ishlarini zamon talablari darajasida tashkil etish, sohaga innovatsion gʻoyalarni keng joriy qilish hamda nodavlat taʼlim tashkilotlari faoliyatiga keng yoʻl ochishga qaratilgan saʼy-harakatlar tufayli bugungi kunda, ayniqsa, maktabgacha taʼlim tizimi jadal rivojlanmoqda. Nodavlat maktabgacha tashkilotlarining ham yil sayin nufuzi va taʼlim-tarbiya sifati tobora yaxshilanib, natijada maktabgacha taʼlim yoshidagi bolalarni qamrab olish koʻrsatkichi oshib bormoqda. Sohaga tadbirkorlarning jalb qilinishi aholining maktabgacha taʼlim tashkilotlariga boʻlgan talab va ehtiyojlarini qondirish imkonini berish bilan birga yangi ish  oʻrinlarining ham paydo boʻlishiga zamin yaratmoqda.

Amudaryo tumanida ham Oʻzbekiston Respublikasi Prezidentining 2018-yil 5-apreldagi “Maktabgacha taʼlim tizimini yanada ragʻbatlantirish va rivojlantirish chora-tadbirlari toʻgʻrisida”gi Qaroriga koʻra, maktabgacha taʼlim tizimida nodavlat sektor ishtirokini yanada rivojlantirish, maktabgacha taʼlim tarmogʻini kengaytirish, xususiy MTTlarni tashkil etish istagida boʻlgan tadbirkorlarga zarur shart-sharoitlar yaratib berish, qurilish-taʼmirlash ishlarida yaqindan koʻmaklashish va tadbirkorlarni qoʻllab-quvvatlashga qaratilgan eʼtibor va ragʻbat tufayli koʻplab xususiy muassasalar faoliyati yoʻlga qoʻyilmoqda.

Ana shunday nodavlat maktabgacha taʼlim tashkilotlaridan biri yangi 2025-yilning ilk haftasida Mangʻit shahrining Oybek nomli mahallasida ham tashkil etilib, oʻz faoliyatini boshladi.

Bugungi kunda mazkur mahalla hududida 1ta davlat, 2ta oilaviy nodavlat maktabgacha taʼlim tashkilotlari mavjud boʻlib, ularda 373 nafar kichkitoylar tarbiyalanayotgan edi. Yangidan tashkil etilgan “XUSNIYA KIDS” nodavlat maktabgacha taʼlim tashkiloti esa 120-oʻringa moʻljallangan boʻlib, 4ta guruhning har biriga 30 nafardan bolajonlar qamrab olinishi rejalashtirilgan.

Muassasaning ochilish marosimida Amudaryo tumani hokimining moliya, iqtisodiyot va kambagʻallikni qisqartirish masalalari boʻyicha birinchi oʻrinbosari Faxriddin Yusupov, tuman Maktabgacha va maktab taʼlimi boʻlimi boshligʻi Yalgʻash Shomurodov, mahalla fuqarolar yigʻini masʼullari va keng jamoatchilik vakillari ishtirok etdilar.

“XUSNIYA KIDS” nodavlat maktabgacha taʼlim tashkilotini tashkil etish, muassasa binosini qurish va jihozlash uchun tadbirkorning salkam 3 mlrd soʻm oʻz mablagʻi yoʻnaltirilib, shuning 2,4 mlrd soʻmi qurilish va rekonstruktsiya ishlari uchun, 500 million soʻmdan ortiq qismi esa binoni toʻliq jihozlash uchun sarflandi.

Gulxumor Qozoqboyeva rahbarligida oʻz faoliyatini boshlagan mazkur maktabgacha taʼlim tashkilotida bolajonlarning yayrab ulgʻayishlari uchun barcha sharoitlar yaratilgan. Xususan, yumshoq oʻrindiqlar, bolalarning toʻyib uxlashlari uchun qulay va zamonaviy divan-karavotlar bilan jihozlangan dam olish xonasi, turli ertak qahramonlari, ona tabiat manzaralari bilan bezatilgan, biri-biridan yoqimtoy oʻyinchoqlar turkumlarini oʻzida mujassam etgan oʻyinxona, yuvinish va kiyimlarni almashtirish xonalari, tantanalar zali, oshxona va ovqatlanish xonalari koʻrgan koʻzni quvontiradi.

Tadbirkor Feruza Madrahimova tomonidan tashkil etilgan “XUSNIYA KIDS” nodavlat maktabgacha taʼlim tashkiloti ish boshlashi bilan 15 nafar ayol-qizlar doimiy ish bilan taʼminlandi. Muassasa toʻliq quvvat bilan faoliyat yuritishni boshlagach, yaʼni 4 ta guruhning har biriga 30 nafardan bola qamrab olingandan keyin ish oʻrinlarini yanada kengaytirish rejalashtirilgan.

– Maqsadimiz – xalqimizga munosib xizmat qilish, – deydi tadbirkor Feruza Madrahimova. – Davlatimiz tadbirkorlar uchun keng imkoniyatlar yaratib bermoqda. Fidoyi mehnat qilgan tadbirkorga esa eʼtibor va gʻamxoʻrlik koʻrsatilayotir. Bunga javoban biz tadbirkorlar ham yanada yaxshiroq, yanada faolroq ishlashimiz kerak.

Biz esa el-yurt manfaati yoʻlida xizmat qilishga bel bogʻlagan Feruza Madrahimovaga:

– Ezgu ishlaringizda omad va muvaffaqiyatlar yor boʻlsin, – deya tilak bildirdik.

Iroda ERDOShEVA, Qoraqalpoq davlat universiteti Jurnalistika fakulteti 2-bosqich talabasi