“KAMBAGʻALLIKDAN – FAROVONLIK SARI” DASTURINI AMALGA OShIRIShGA BAGʻIShLANGAN YIGʻILISh OʻTKAZILDI

Xalqimizning oʻziga xos milliy-maʼnaviy qadriyatlari, asrlar sinovidan oʻtgan biri-biridan goʻzal urf-odatlari dunyo xalqlarini oʻziga rom etib keladi. “Qoʻshni – qoʻshniga qoʻl-qanot”, “Bir oila obroʻsi mahalla ahli uchun sharaf”, “Mahalla – mehr-oqibat maskani”, “Bir bolaga yetti mahalla ham ota, ham ona” kabi hikmatlarni oʻzlarining hayot tamoyillariga aylantirgan mahalladoshlar hech qachon biri-biridan koʻngil uzishmaydi va biri-birini yolgʻiz tashlab qoʻyishmaydi. Ayniqsa, kamxarj oilalarni qoʻllab-quvvatlash, bunday oilalar farzandlarining oʻqib, bilim olishlari, kasb-hunar oʻrganishlari uchun koʻmaklashish hamisha mahalladoshlarning zimmalaridagi insoniy burchlari boʻlib kelgan va bu burch va masʼuliyat tuygʻusi xalqimiz uchun ona Vatanga muhabbat tuygʻusi bilan hamohangdir.

Muhtaram Prezidentimizning 2024-yil 25-noyabrda qabul qilingan “Kambagʻallikdan farovonlik sari” dasturini amalga oshirishga faol nuroniylarni jalb etish chora-tadbirlari toʻgʻrisida”gi Qarori mohiyatan mahalla institutining oʻziga xos xalqona qadriyatlarni yanada mustahkamlash borasidagi nufuzini oshirishga qaratilgani bilan muhim ahamiyatga ega.

Unga koʻra, keksa avlod vakillarining bilim va katta hayot tajribalaridan foydalangan holda 3 nafar nuroniyni 5ta kambagʻal oilaga biriktirish orqali ularning tomorqa xoʻjaligini samarali yuritishlari uchun shart-sharoitlar yaratishga koʻmaklashish, farzandlarining bilim olishlari, kasb-kor egallashlari borasida toʻgʻri yoʻl-yoʻriqlar berish, ijtimoiy-maʼnaviy muhitni sogʻlomlashtirish maqsadida “Nuroniylar va ota-onalar Kengashi” aʼzolari ishtirokida oilalarda tinchlik-xotirjamlikni taʼminlash, koʻchma doʻkonlar, kichik oilaviy tadbirkorlik yoʻnalishlari boʻyicha faoliyatlarini yoʻlga qoʻyishlarida fuqarolarni “Mahalla yettiligi” bilan hamkorlikda doimiy qoʻllab-quvvatlash kabi vazifalarni amalga oshirish belgilangan.

Joriy yilning 3-dekabr sanasida Amudaryo tuman hokimligining katta majlislar zalida tumandagi barcha ovul va mahalla fuqarolar yigʻinlari raislari, “Mahalla yettiligi” aʼzolari, “Nuroniy” jamgʻarmasi jamoatchilik Kengashi aʼzolari va faol nuroniylar ishtirokida boʻlib oʻtgan kengaytirilgan yigʻilishda masʼullar tomonidan mazkur Qarorning mazmun-mohiyati, undan kelib chiqadigan vazifalar va “Kambagʻallikdan farovonlik sari” dasturi doirasida tumandagi barcha ovul va mahalla fuqarolar yigʻinlarida tashkil etilayotgan “Nuroniylar va ota-onalar Kengashi” aʼzolarining mahalla ahli hayotidagi oʻrni xususidagi masalalar boʻyicha maʼlumot va tavsiyalar, zarur tushunchalar berildi.

Yigʻilishda Amudaryo tuman hokimining oʻrinbosari Nodirbek Kamolov, “Nuroniy” jamgʻarmasi jamoatchilik Kengashi raisi Bekman Allamberganov va boshqalar soʻzga chiqib, “Kambagʻallikdan farovonlik sari” dasturini amalga oshirishda nuroniylar oʻzlariga birkitilgan kambagʻal oilalar farzandlarining bilim olish, kasb oʻrganishga boʻlgan qiziqish va iqtidorlariga muvofiq ularni usta va hunarmandlarga shogirdlikka berish, xorijiy tillarni oʻrganishlari uchun sharoitlar yaratish, koʻchma doʻkon va kichik ishlab chiqarish uskunalarini xarid qilishni xohlagan oilalarga mahalladagi hokim yordamchisini jalb qilgan holda boʻlib-boʻlib toʻlash imkoniyatini yaratish, farzandlari OTMlarda taʼlim olayotgan oilalarni tegishli jamgʻarmalar orqali qoʻllab-quvvatlash choralarini koʻrishga masʼuliyat bilan yondashish zarurligi haqida batafsil maʼlumotlar berdilar.

Shuningdek, yigʻilishda mazkur dastur doirasida ovul va mahallalarda salomatlik uchun piyoda yurish, kamxarj oilalardagi nuroniylar va yoshlar ishtirokida turli koʻngilochar sport tadbirlarini tashkil etish, sogʻlom turmush tarzi targʻibotini doimiy ravishda amalga oshirish, ayniqsa, kambagʻal oilalar farzandlarining turli sport musobaqalarda qatnashishlari uchun tegishli manbalar orqali mablagʻlar ajratilishini taʼminlash borasida qimmatli fikrlar ham bildirildi.

Yigʻilishda “Kambagʻallikdan farovonlik sari” dasturi doirasida Amudaryo tumani boʻyicha amalga oshiriladigan vazifalar yuzasidan rejalar belgilanib, tegishli qaror qabul qilindi.

Robiya Yoʻldosheva.