Navoiy, Chordara, Boʻston mahallalarida deputat yordami bilan tabiiy gaz bosimi yaxshilandi
Kunlar sovishi bilan tabiiy gazga boʻlgan ehtiyoj yanada ortadi. Insonlar salqin havodan panalanib, uyiga tomon shoshadi. Haqiqatan, issiqqina xonada oʻtirib dars tayyorlaydigan bolaning uyga vazifasi chala-chulpa qolib ketmaydi, issiqqina oshxonada ovqat qiladigan kelinchak doktorga kamroq koʻrinadi, isitish tizimi soz, tabiiy gaz bilan bogʻliq muammo boʻlmagan xonadon egalarining kayfiyati ham ijobiy boʻladi.
Xonadonlarimizga quvurlar orqali yetib keladigan qimmatli boyliklarimizdan biri boʻlgan tabiiy gaz Amudaryo tumani Mangʻit shahrida joylashgan Chordara, Navoiy, Boʻston MFYlarda bir paytlari muammo edi. Tabiiy gaz bosimining pastligi aholining noroziligiga sabab boʻlib kelayotgan edi.
Muhtaram Prezidentimizning maxsus qarori asosida Qoraqalpogʻistonda aholining turmush farovonligini taʼminlash va infratuzilmani yaxshilash masalasiga katta eʼtibor qaratilmoqda.
Qolaversa, oramizda xalq dardi bilan yashab, xalqning duosini olib kelayotgan, savobtalab insonlar ham yoʻq emas. Ana shunday insonlarning biri – Qoraqalpogʻiston Respublikasi Joʻqorgʻi Kengesi deputati Quvonchboy Baymuratovning saʼy-harakatlari va tashabbusi bilan bu muammolar ijobiy yechim topdi.
Deputatning amaliy yordami va gaz taʼminoti korxonasi xodimlarining saʼy-harakatlari tufayli Chordara hamda Navoiy mahallalari hududlaridan oʻtuvchi eski gaz quvurlari yangilanib, diametri 219 mm, uzunligi 4,8 km. boʻlgan yangi gaz quvurlari tortildi hamda yuqori bosimli gaz tarmogʻiga ulandi.
Natijada Chordara mahallasidagi 386ta, Navoiy mahallasidaga 355ta hamda Boʻston mahallasidagi 412ta, jami 1 ming 153ta xonadonlar yetarli darajadagi gaz bosimi bilan taʼminlanib, koʻp yillardan buyon aholini qiynab kelayotgan muammolardan biri bartaraf qilindi.
Ushbu xayrli tadbirda tuman hokimi Sobir Xoʻjametov ham qatnashib, yangidan oʻrnatilgan gaz quvurlarini borib koʻrdi hamda mutasaddilarga qish mavsumida aholini yetarli miqdorda tabiiy gaz bilan taʼminlash boʻyicha koʻrsatmalar berdi.
Inson hayotida qilgan yaxshiliklari qadar baxtli boʻladi, degan gap bor. Chindanda, suv chiqarish, biror joyni obod qilish singari aholini tabiiy gaz bilan muammolarsiz taʼminlash ham bir yaxshilik. Zero, quvurlar orqali kelayotgan tabiiy gazdan hosil boʻladigan issiq harorat koʻngillarga koʻchib, odamlar qalbini yanada ilitsa ajab emas.
Aziza Madrahimova
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
