36-sonli MTTda “Transport, yoʻl harakati qoidalari” mavzusida seminar oʻtkazildi

Bolaning chaqqon va zehni oʻtkir boʻlib ulgʻayishida taʼlim-tarbiyaga eng dastlabki qadam boʻlmish bogʻchada olingan bilimlar muhim oʻrin tutadi. Maktabgacha taʼlim tashkilotlarida tarbiyachilar tomonidan olib boriladigan turli xil dars mashgʻulotlari jajji bolajonlarning kelajakdagi bilim saviyasiga, tasavvur olamining kengayishiga mustahkam poydevor yasaydi.

Yaqinda Amudaryo tumani Maktabgacha va maktab taʼlimi boʻlimining Maktabgacha taʼlim tashkilotlari faoliyatini muvofiqlashtirish shoʻʼbasi ish rejasiga asosan 36-sonli maktabgacha taʼlim tashkilotida “Transport, yoʻl harakati qoidalari” mavzusida amaliy koʻrgazmali seminar oʻtkazildi. Seminarda shoʻʼba bosh metodisti Hulkar Babajonova, metodist Saule Patullayeva, tumandagi 2-, 10-, 16-, 20-, 30-, 32-, 44-, 49-, 23-, 31-, 24- va 9-sonli maktabgacha taʼlim tashkilotlarining direktorlari, metodistlari va tarbiyachilari ishtirok etdilar.

Seminarni Qoraqalpogʻiston Respublikasi Maktabgacha va maktab taʼlimi vazirligining Maktabgacha talim tashkilotlari faoliyatini muvofiqlashtirish shoʻbasi metodisti Jupar Oymuratova ochib berdi. U oʻz nutqida ushbu seminarni oʻtkazishdan maqsad, maktabgacha taʼlim tashkilotlarida bolaning individual ehtiyojlarini hisobga olgan holda ilk va maktabgacha yoshdagi bolalarning aqliy rivojlanishini ragʻbatlantirish, ularning davlat talablari asosida hamda davlat oʻquv dasturiga muvofiq har tomonlama barkamol rivojlanishi uchun qulay shart-sharoitlar yaratish masalalariga toʻxtalib oʻtdi. Shundan soʻng, shoʻʼba metodisti Hulkar Babajonova soʻzga chiqib, mazkur seminar maktabgacha yoshdagi bolalarning oʻquv-tarbiyaviy faoliyatini tashkil qilish va amalga oshirishda tarbiyachilarning amaliy koʻnikmalarini rivojlantirish uchun tashkil etilganligini aytib oʻtdi.

Boʻlim metodisti Saule Patullayeva esa mamlakatda oʻtkazilayotgan ijtimoiy-iqtisodiy islohotlarni, xorijiy mamlakatlar ilgʻor tajribasi hamda ilm-fan yutuqlari va zamonaviy axborot-kommunikatsiya texnologiyalari imkoniyatlarini inobatga olgan holda maktabgacha taʼlim tizimida maʼnaviy barkamol va intellektual jihatdan rivojlangan shaxsni tarbiyalash davlat talablarining maqsadi ekanligini alohida urgʻuladi.

Shundan soʻng, seminar oʻz ishini boshladi. Qizgʻin bahs va munozaralarga boy oʻtgan seminarda ishtirokchilar oʻzlarining tajribasini hamda amaliy koʻnikmalarini oshirishdi.

Darhaqiqat, bunday seminarlar barcha davlat MTTlarda yil davomida reja asosida tashkil qilinadi, ularda seminar qatnashuvchilari oʻzaro tajriba almashib, oʻzlarining kasbiy mahoratini oshirib boradilar.

Ushbu seminarda ham ishtirokchilar 4 ta guruhga boʻlinib, mashgʻulot olib bordilar. Xususan, 36-sonli davlat MTTning maktabga tayyorlov guruhi tarbiyachisi, metodist Shahlo Yalgʻasheva mavzu boʻyicha mashgʻulot oʻtdi.

Tarbiyachi mashgʻulot davomida mavsumiy oʻzgarishlarni yigʻilganlarga koʻrgazmali qurollar vositasida tushuntirdi. Shu bilan birga, 36-sonli maktabgacha taʼlim tashkilotining katta guruhi tarbiyachisi Nilufar Kamolova, oʻrta guruhi tarbiyachisi Rayhon Kamolova, kichik guruh tarbiyachisi Mavluda Shomuratovalar ham “Transport turlari” mavzusi boʻyicha mashgʻulotlar oʻtdi. Mashgʻulotlar davomida bolajonlar rivojlantirish markazlariga boʻlinib, amaliy mashgʻulotlar bajardilar. Ayniqsa, qurilish va konstruktsiyalash markazida qurilish materiallari, kubiklar, legolar toʻplamlaridan foydalanib yasagan mashinalar bolalarga oʻzgacha zavq bagʻishladi.

Mashgʻulotlar tarbiyalanuvchilarda jismoniy rivojlanish va sogʻlom turmush tarzini shakllantirish, nutq va muloqot, oʻqish va yozish koʻnikmalari, bilish jarayonining rivojlanishi, ijtimoiy-hissiy rivojlanish hamda ijodiy rivojlanishni amalga oshirishga qaratilib, bolalar rivojlanishining muayyan sharoitlari, ehtiyojlari va xususiyatlari hisobga olingan holda tashkil etildi.

Mashgʻulot jarayonlari tugagandan soʻng seminar ishtirokchilari bilan mashgʻulotlar tahlil qilindi. Har bir guruh kesimida kuzatuvchilar ushbu mashgʻulotni oʻtkazgan tarbiyachilarning pedagogik mahorati hamda layoqati, yutuqlari, kamchiliklari hamda bolalar bilan birgalikdagi faoliyati, taʼlim-tarbiya jarayonida samarali shakl, metod va vositalaridan unumli foydalana olish imkoniyatlari haqida aytib oʻtildi. Seminar kun tartibidagi masala yuzasidan savol-javoblar oʻtkazilib, qatnashuvchilar tomonidan fikr va mulohazalar bildirildi. Mashgʻulotlarning qiziqarli va mazmunli tashkil etganligi uchun alohida minnatdorchilik bildirildi.

“U kim? Bu nima?” deya savollarga koʻmib tashlaydigan bolajonlarimizning barcha savollariga erinmay javob berish, ularni hafsala bilan tinglash, ularning aqliy rivojlanishi uchun vaqt ajratish hamma ota-onaning ham qoʻlidan kelavermaydi. Baʼzan esa vaqt kamlik qiladi. Shu jihatdan olib qarasak, bu borada MTTlari faoliyatining ahamiyati katta, qilayotgan ishlari tahsinga loyiq. Biz esa, ularning xayrli va oʻz navbatida masʼuliyatli boʻlgan ishlariga omad yor boʻlishini tilaymiz.

Aziza Madrahimova