21-SONLI DAVLAT MTTDA “TRANSPORT, YOʻL HARAKATI QOIDALARI” MAVZUSIDA SEMINAR TAShKIL ETILDI

Mamlakatimizda maktabgacha taʼlim tashkilotlari faoliyatini zamon talablari darajasida rivojlantirish, tarbiyachi-pedagoglarning malakalarini oshirish, oʻsib kelayotgan yosh avlodni har tomonlama yetuk va barkamol insonlar qilib tarbiyalashga qaratilayotgan eʼtibor va ragʻbat tufayli sohaga yangi innovatsion pedtexnologiyalar izchillik bilan joriy etilmoqda. Xususan, oʻzaro tajriba almashuvlar, ilgʻor tarbiyachi-pedagoglarning ish uslublarini ommalashtirishga qaratilgan oʻquv-seminar mashgʻulotlari oʻzining ijobiy samarasini bermoqda.

Bu borada Amudaryo tuman Maktabgacha va maktab taʼlimi boʻlimi tasarrufidagi namunali ish faoliyatiga ega maktabgacha taʼlim tashkilotlarida oʻtkazilayotgan oʻquv-seminarlari soha xodimlarida qiziqish uygʻotmoqda. Tumandagi MTTlarda har oy alohida muhim bir mavzu bilan nomlanib, mazkur oy mavzusi boʻyicha MTT tarbiyalanuvchilari ishtirokida seminar mashgʻulotlarini oʻtkazish anʼanaga aylangan.

Joriy yilning noyabr oyi mavzusi “Transport, yoʻl harakati qoidalari” sifatida belgilanib, 28-noyabr kuni 21-sonli davlat maktabgacha taʼlim tashkilotida shu mavzuda seminar tashkil etildi.

Seminarda tuman Maktabgacha va maktab taʼlimi boʻlimi uslubchilari Saule Patullayeva, Shahnoza Qilicheva, davlat maktabgacha taʼlim tashkilotlari, davlat-xususiy sheriklik asosidagi maktabgacha taʼlim tashkilotlari rahbarlari, tarbiyachi-pedagoglar hamda 21-sonli davlat MTTning 4ta guruhi tarbiyalanuvchilari ishtirok etdilar.

Mazkur maktabgacha taʼlim tashkiloti 120-oʻrinli boʻlib, ayni paytda 119 nafar kichkintoylar tarbiyalanmoqda. Muassasada 34 nafar malakali xodimlar faoliyat olib borishadi. Kichik, oʻrta, katta va tayyorlov guruhlaridan iborat 4ta guruhda tarbiyalanuvchilar uchun har oy mavzusidan kelib chiqib oʻtkaziladigan maʼnaviy-maʼrifiy tadbirlar bolajonlarning qiziqish va iqtidorlarini rivojlantirishga qaratilgani bilan ota-onalarga ham manzur boʻlmoqda. Muassasada noyabr oyi mavzusi – “Yoʻl harakati qoidalari” boʻyicha oʻtkazilgan seminar ham qiziqarli taassurotlarga boy boʻldi.

Seminar mashgʻulotini tayyorlov guruhi tarbiyachisi Tursunoy Adamboyeva boshlab berdi. Tayyorlov guruhi tarbiyalanuvchilari noyabr oyining soʻnggi haftasi uchun belgilangan “Ehtiyotkor piyoda” mavzusida koʻrgazmali chiqish namoyish etdilar. Unga koʻra, bolajonlar koʻchalarda harakatlanish, madaniyati, yoʻlning chorraha qismida va piyodalarning oʻtish qismida qanday yoʻl belgilariga eʼtibor berish, svetofor chiroqlarining ranglari nimalarni anglatishi haqidagi bilim va koʻnikmalarini namoyish etdilar.

Seminar davomida katta guruh tarbiyachisi Feruza Iskandarova va yordamchi tarbiyachi Mavluda Xidirovalar “Koʻcha harakati qoidalari”, oʻrta guruh tarbiyachisi Shahnoza Fayzullayeva, yordamchi tarbiyachi Gulrux Raimboyevalar “Shoshilinch harakat xizmatlari”, kichik guruh tarbiyachisi Shahnoza Qoʻshmanova hamda yordamchi tarbiyachi Guljon Yerjanovalar esa “Transportlar bilan tanishuv” mavzularida oʻz guruhlaridagi tarbiyalanuvchilar ishtirokida qiziqarli mashgʻulotlar oʻtkazdilar.

Mashgʻulotlarni eʼtibor va qiziqish bilan kuzatgan seminar ishtirokchilari 21-sonli davlat maktabgacha taʼlim tashkiloti pedagog xodimlari tomonidan taʼlim-tarbiya ishlari samarali yoʻlga qoʻyilganini alohida eʼtirof etishib, pedagog tarbiyachilarning mahoratiga yuqori baho berdilar.

Robiya Yoʻldosheva.