KORRUPTsIYaGA QARShI KURAShIShDA NNT IShTIROKI KENGAYMOQDA

“Jayxun ilhomlari” nodavlat notijorat tashkiloti 2024-yilning fevral oyida Qoraqalpogʻiston Respublikasi Joʻqorgʻi Kengesi huzuridagi jamoat fondi tomonidan eʼlon qilingan grant tanlovida oʻz loyihasi bilan ishtirok etib, gʻolib boʻlgan va loyiha davlat granti bilan moliyalashtirilgan edi. Loyiha orqali korruptsiyaga qarshi kurashishning zamonaviy va ijodiy usullarni qoʻllash yoʻli bilan davlat va jamiyat farovonligiga hissa qoʻshish maqsad qilingan.

Grant loyihasining ish rejasiga asosan shu maqsadga xizmat qiluvchi sahna asari stsenariysi uchun tanlov eʼlon qilinib, Bayjan Uzaqov qalamiga mansub “Davr dardi” nomli spektakl stsenariysi gʻolib deb topilgan edi. Qoraqalpogʻiston Respublikasi Madaniyat vazirligi bilan hamkorlikda korruptsiyaning davlat va jamiyatga salbiy taʼsirini chuqur talqin etib, fuqarolarda ushbu illatga nisbatan murosasizlik tuygʻusini shakllantirishga xizmat qiluvchi ushbu asar rejissyor Mars Nuratdinov rahbarligidagi Qoraqalpoq davlat Yosh tomoshabinlar teatri ijodkorlar jamoasi tomonidan sahnalashtirildi.

Loyihaning ish rejasiga asosan spektakl noyabr oyida davlat hokimiyati boshqaruvi organlari va fuqarolarning oʻzini oʻzi boshqarish organlari xodimlari uchun namoyish qilindi.

Spektaklda korruptsiyaning fojiaviy oqibatlari hayotiy misollar orqali yoritib berilgan. Taʼmagirlik yoʻlini tanlagan oliygoh oʻqituvchisi talabalardan birini “oʻqishga seni men kiritdim” deya pora talab qiladi. Aytilgan pulni bermasa, uni oʻqishdan chetlatish bilan tahdid qiladi. Asar soʻngida talaba qizning onasi tegishli huquq-tartibot organlariga murojaat qiladi va taʼmagir oʻqituvchi qoʻlga olinib, ozodlikdan mahrum qilinadi. Asarning kulminatsion nuqtasi – uning oila aʼzolari – farzandlari va turmush oʻrtogʻining monologlari har qanday tomoshabinni taʼsirlantirib, halollik va adolatga daʼvat etadi.

Spektaklda ishtirok etgan davlat hokimiyati organlari va fuqarolarning oʻzini oʻzi boshqarish organlari xodimlari, shuningdek oliy taʼlim muassasalari talabalari korruptsiyaning naqadar ayanchli oqibatlarga olib kelishi va fojiaviy yakun topishiga guvoh boʻldilar.

Darhaqiqat, korruptsiya jamiyat va davlat rivojiga jiddiy toʻsiq boʻlib, uning oldini olish mamlakat taraqqiyotining muhim shartidir. Oʻzbekistonda korruptsiyaga qarshi kurashish davlat siyosatining ustuvor yoʻnalishlaridan biri boʻlib, bu borada keng qamrovli ishlar amalga oshirilmoqda.  Davlat hokimiyati organlarida shaffoflik va ochiqlikni taʼminlash boʻyicha muhim islohotlar amalga oshirilmoqda. Xususan, davlat xizmatlari koʻrsatish jarayonlarini raqamlashtirish orqali inson omili kamaytirilmoqda. Bu esa poraxoʻrlikka qarshi samarali choralardan biridir. Fuqarolarning oʻzini oʻzi boshqarish organlari ham mazkur jarayonda faol ishtirok etmoqda. Mahallalarda korruptsiyaning oldini olishga qaratilgan targʻibot tadbirlari oʻtkazilmoqda. Jamoatchilik kengashlari va huquqni muhofaza qilish organlari bilan hamkorlikda shaffof muhit yaratishga qaratilgan choralar koʻrilmoqda. 

Bularning barchasi korruptsiyaga qarshi kurashda davlat va jamoatchilikning mushtarak harakati oʻz samarasini berayotganidan dalolatdir.

“Jayxun ilhomlari” nodavlat notijorat tashkilotining grant loyihasi doirasida sahnalashtirilgan ushbu spektakl ham aholi ongida korruptsiyaga nisbatan murosasizlik tuygʻusini shakllantirishda muhim ahamiyat kasb etishi shubhasiz.