31-SONLI MAKTABNING YaNGI BINOSI FOYDALANIShGA TOPShIRILDI

Mamlakatimizda taʼlim tizimiga qaratilayotgan eʼtibor tufayli, har yili oʻnlab maktablar, maktabgacha taʼlim tashkilotlari binolari zamon talablari darajasida rekonstruktsiya qilinib, qayta jihozlanmoqda va oʻz muddatini oʻtab boʻlgan binolar oʻrnida yangilari bunyod etilmoqda. Muhtaram Prezidentimizning tashabbuslari va qoʻllab-quvvatlashlari bilan amalga oshirilayotgan bu kabi bunyodkorlik ishlari Amudaryo tumanida ham keng miqyosda olib borilib, tuman Maktabgacha va maktab taʼlimi boʻlimi tasarrufidagi umumtaʼlim maktablarining shart-sharoitlari yaxshilanib, axborot-kommunikatsiya texnologiyalari bilan jihozlanayotgani taʼlim-tarbiya ishlarini samarali tashkil etish imkonini bermoqda. Tumanda birgina 2024-yilda turli manbalar hisobidan bunyod etilgan 5ta ijtimoiy soha obʼektlaridan 3 tasi umumtaʼlim maktablari va 2tasi maktabgacha taʼlim tashkilotlaridir. Shulardan biri – 31-sonli maktabning 330-oʻrinli yangi binosi hisoblanadi.

Mazkur maktabning eski binosi 1964-yilda 560 oʻquvchi oʻringa moʻljallab qurilgan boʻlib, soʻnggi yillarda mazkur bino ancha eskirgani, taʼlim-tarbiya ishlarini sifatli olib borish imkoni boʻlmagani sababli, 2007-yilda maktabga rekonstruktsiya hisobidan 160-oʻrinli qoʻshimcha bino qurib berilgan edi. Salkam 500 nafar oʻquvchi taʼlim oladigan mazkur oʻquv muassasasi uchun, albatta, 160-oʻrinli qoʻshimcha bino qurilgani bilan maktabda oʻquvchilarga zamon talablari darajasida taʼlim-tarbiya berish borasidagi muammolar barham topmadi. Shu bois, joriy 2024-yilgi investitsiya dasturi doirasida 4,1 milliard soʻm mablagʻ evaziga maktab uchun 330-oʻrinli, zamonaviy talablarga toʻla javob beradigan yangi bino qurilib, foydalanishga topshirildi.

29-noyabr kuni maktab binosini foydalanishga topshirishga bagʻishlangan tantanali marosim boʻlib oʻtdi. Oʻquv muassasasining ochilishiga bagʻishlangan tantanali marosimda Amudaryo tumani hokimi Sobir Xoʻjametov rahbarligidagi tuman hokimligi masʼullari, sektor rahbarlari, Amudaryo tuman Maktabgacha va maktab taʼlimi boʻlimi mutasaddilari, Beruniy nomli mahalla fuqarolar yigʻini masʼullari hamda mahalla faollari, pedagog xodimlar ishtirok etdilar.

Tadbirda Amudaryo tuman hokimi Sobir Xoʻjametov Maktabgacha va maktab taʼlimi boʻlimi masʼullarini, 31-sonli maktab pedagogika jamoasini yangi maktab binosining foydalanishga topshirilishi munosabati bilan samimiy tabrikladi va qurilish ishlarini qisqa muddatda, sifatli amalga oshirgani uchun "Sanjar Diyor building" MChJ quruvchilariga minnatdorchilik bildirdi.

Tadbirda mazkur taʼlim dargohi yillar davomida tumanimizning turli sohalarida faoliyat yuritayotgan yuksak salohiyatli mutaxassis kadrlar yetishib chiqishida muhim rol oʻynagani alohida eʼtirof etilib, maktabning sobiq bitiruvchilari orasida mamlakatimiz ilm-fani dargʻalari, davlat va jamoat arboblari borligini faxr bilan tilga olindi.

Tadbirda tuman Maktabgacha va maktab taʼlimi boʻlimi mudiri Yalgʻosh Shomuratov ham soʻzga chiqib, mamlakatimizda taʼlim tizimiga qaratilayotgan eʼtibor tufayli sohada erishilayotgan yutuqlar haqida toʻxtalib oʻtdi va pedagog xodimlarni yosh avlod taʼlim-tarbiyasiga masʼuliyat bilan yondoshgan holda, yaratilayotgan sharoitlarga munosib ravishda faoliyat olib borishga chaqirdi.

Shundan soʻng, maktab binosini bunyod etgan “Sanjar Diyor building” MChJ rahbariyati tomonidan maktab direktori Nilufar Davletovaga yangi binoning ramziy kaliti tantanali ravishda topshirildi.

Tadbir ishtirokchilari maktab binosida yaratilgan shart-sharoitlar, xususan, maktab infratuzilmasi, fanlar boʻyicha maxsus jihozlangan xonalar bilan yaqindan tanishdilar.

Shu kunning oʻzida oʻquvchilar oʻz ustozlari rahbarligida shinam va yorugʻ, zamonaviy sharoitlarga ega sinf xonalarida oʻquv mashgʻulotlarini boshlab yubordilar.

Robiya Yoʻldosheva.