Fermer va tomorqachilar ishtirokida koʻrgazmali seminar oʻtkazildi

Dehqon uchun yilning toʻrt fasli ham el-yurt farovonligi yoʻlidagi xayrli tashvishlar bilan oʻtadi. Ayniqsa kuz oylarida dehqonlar qishning izgʻirinli kunlari boshlanmasidan avval hosildan boʻshagan yerlarini shudgorlab, kelgusi yil hosili uchun puxta taraddudini koʻrib qoʻyadilar.

Ayni kunlarda mamlakatimizning barcha hududlarida boʻlgani kabi amudaryolik fermer va tomorqachilar ham joriy yilgi hosildan boʻshagan yerlarni shudgorlash, toʻqsonbosti usulida ekin ekiladigan yerlarni tayyorlash ishlarini muvaffaqiyatli tarzda yakunlab, ekishni boshlab yuborishdi. Tumandagi barcha fermer xoʻjaliklarida, shuningdek aholi tomorqalarida har bir qarich yerdan unumli foydalanish maqsadida piyoz, sarimsoqpiyoz, oshkoʻk kabi ekinlar ekishga alohida eʼtibor qaratilmoqda.

Bu borada tomorqachilarga xizmat koʻrsatuvchi klasterlarning faolligi muhim ahamiyat kasb etadi. Yakunlanayotgan dehqonchilik yilida Amudaryo tumanida erishilgan yutuqlar va kelgusi yil uchun belgilanayotgan yangi rejalar bilan tanishish maqsadida tumanga tashrif buyurgan Oʻzbekiston fermer, dehqon xoʻjaliklari va tomorqa yer egalari Kengashi boʻlim boshligʻi B.Mirzamova va mazkur Kengash bosh mutaxassisi E.Mamarahimov, Qoraqalpogʻiston Respublikasi fermer, dehqon xoʻjaliklari va tomorqa yer egalari Kengashi raisining oʻrinbosari A.Ajimovlar tuman fermer, dehqon xoʻjaliklari va tomorqa yer egalari Kengashi raisi Ilhom Polvonov hamrohligida Mangʻit shahrining Chordara mahallasi hududidagi “Amudaryo tomorqa xizmat” MChJ klasterida boʻlib, klaster faoliyati bilan yaqindan tanishdilar.

Mehmonlar mazkur klaster tomonidan tomorqa yer egalariga namunali texnika xizmati koʻrsatish, ekinlarni toʻqsonbosti usulida ekish maqsadida urugʻliklar yetkazib berish borasida amalga oshirilayotgan ishlar, erta bahorda poliz hamda sabzavot ekinlari, shuningdek, mevali daraxtlar koʻchatlarini yetkazib berish boʻyicha klaster rahbariyatining rejalari bilan yaqindan tanishib, zarur tavsiyalar berdilar.

Shundan keyin mehmonlar tumanning Choykoʻl ovuli hududidagi namunali tomorqachi Davlatboy Bobojonov dalasida tashkil qilingan koʻrgazmali seminarda ishtirok etishdi.

Koʻrgazmali seminarda ishtirokchilarga ekinlarni toʻqsonbosti usulida ekish va unib chiqqanidan soʻng kuz-qish mavsumida amalga oshiriladigan agrotexnik tadbirlar boʻyicha kerakli maslahatlar va maʼlumotlar berildi.

Shuningdek, masʼullar ishtirokchilarga bogʻ-tok qator oralari va dala chetidan samarali foydalanish, aholi tomorqalarida mevali daraxt koʻchatlarini ekish, eksportbop bogʻdorchilik mahsulotlarni yetishtirish, fermer xoʻjaliklarining daromadini oshirish, shuningdek, 2025-yil hosili uchun barcha toifa xoʻjaliklarida 2024-yilgi qish fasli boshlanmasidan avval toʻqsonbosti usulida sabzavot ekinlarini ekish borasida ilmiy asoslangan maʼlumotlarni taqdim qildilar.

Shu bilan birga ishtirokchilarga “Yashil makon” umummilliy loyihasi doirasida fermer xoʻjaliklarining dalalari hamda dala yoʻllari chetlariga mevali va manzarali daraxt koʻchatlari ekish, ularni parvarishlash boʻyicha ham tavsiya va koʻrsatmalar berildi.

Robiya Yoʻldosheva.