Фермер ва томорқачилар иштирокида кўргазмали семинар ўтказилди

Деҳқон учун йилнинг тўрт фасли ҳам эл-юрт фаровонлиги йўлидаги хайрли ташвишлар билан ўтади. Айниқса куз ойларида деҳқонлар қишнинг изғиринли кунлари бошланмасидан аввал ҳосилдан бўшаган ерларини шудгорлаб, келгуси йил ҳосили учун пухта тараддудини кўриб қўядилар.

Айни кунларда мамлакатимизнинг барча ҳудудларида бўлгани каби амударёлик фермер ва томорқачилар ҳам жорий йилги ҳосилдан бўшаган ерларни шудгорлаш, тўқсонбости усулида экин экиладиган ерларни тайёрлаш ишларини муваффақиятли тарзда якунлаб, экишни бошлаб юборишди. Тумандаги барча фермер хўжаликларида, шунингдек аҳоли томорқаларида ҳар бир қарич ердан унумли фойдаланиш мақсадида пиёз, саримсоқпиёз, ошкўк каби экинлар экишга алоҳида эътибор қаратилмоқда.

Бу борада томорқачиларга хизмат кўрсатувчи кластерларнинг фаоллиги муҳим аҳамият касб этади. Якунланаётган деҳқончилик йилида Амударё туманида эришилган ютуқлар ва келгуси йил учун белгиланаётган янги режалар билан танишиш мақсадида туманга ташриф буюрган Ўзбекистон фермер, деҳқон хўжаликлари ва томорқа ер эгалари Кенгаши бўлим бошлиғи Б.Мирзамова ва мазкур Кенгаш бош мутахассиси Э.Мамараҳимов, Қорақалпоғистон Республикаси фермер, деҳқон хўжаликлари ва томорқа ер эгалари Кенгаши раисининг ўринбосари А.Ажимовлар туман фермер, деҳқон хўжаликлари ва томорқа ер эгалари Кенгаши раиси Илҳом Полвонов ҳамроҳлигида Манғит шаҳрининг Чордара маҳалласи ҳудудидаги “Амударё томорқа хизмат” МЧЖ кластерида бўлиб, кластер фаолияти билан яқиндан танишдилар.

Меҳмонлар мазкур кластер томонидан томорқа ер эгаларига намунали техника хизмати кўрсатиш, экинларни тўқсонбости усулида экиш мақсадида уруғликлар етказиб бериш борасида амалга оширилаётган ишлар, эрта баҳорда полиз ҳамда сабзавот экинлари, шунингдек, мевали дарахтлар кўчатларини етказиб бериш бўйича кластер раҳбариятининг режалари билан яқиндан танишиб, зарур тавсиялар бердилар.

Шундан кейин меҳмонлар туманнинг Чойкўл овули ҳудудидаги намунали томорқачи Давлатбой Бобожонов даласида ташкил қилинган кўргазмали семинарда иштирок этишди.

Кўргазмали семинарда иштирокчиларга экинларни тўқсонбости усулида экиш ва униб чиққанидан сўнг куз-қиш мавсумида амалга ошириладиган агротехник тадбирлар бўйича керакли маслаҳатлар ва маълумотлар берилди.

Шунингдек, масъуллар иштирокчиларга боғ-ток қатор оралари ва дала четидан самарали фойдаланиш, аҳоли томорқаларида мевали дарахт кўчатларини экиш, экспортбоп боғдорчилик маҳсулотларни етиштириш, фермер хўжаликларининг даромадини ошириш, шунингдек, 2025 йил ҳосили учун барча тоифа хўжаликларида 2024 йилги қиш фасли бошланмасидан аввал тўқсонбости усулида сабзавот экинларини экиш борасида илмий асосланган маълумотларни тақдим қилдилар.

Шу билан бирга иштирокчиларга “Яшил макон” умуммиллий лойиҳаси доирасида фермер хўжаликларининг далалари ҳамда дала йўллари четларига мевали ва манзарали дарахт кўчатлари экиш, уларни парваришлаш бўйича ҳам тавсия ва кўрсатмалар берилди.

Робия Йўлдошева.