11-sonli maktabda Bolalar harakati sardorlarining maktab aʼzolari saylovi oʻtkazildi

Maʼlumki, Oʻzbekiston Mahallalar uyushmasi, Oʻzbekiston Respublikasi Maktabgacha va maktab taʼlimi vazirligi, Yoshlar ishlari agentligi, Respublika Maʼnaviyat va maʼrifat markazi hamda Oʻzbekiston Bolalar tashkiloti boshqaruv kengashining joriy yil oktyabr oyidagi qoʻshma qarori bilan taʼlim muassasalarida sardorlar saylovini tashkil etish va bolalar harakati faoliyatini yoʻlga qoʻyish tartibi tasdiqlangan edi. Harakatning maqsadi – Oʻzbekiston bolalar tashkiloti nufuzini oshirish, bolalarda vatanparvarlik, liderlik, tashabbuskorlik mahoratini rivojlantirish, notiqlik mahoratini takomillashtirish, oʻz ustida ishlashi, zamonaviy axborot texnologiyalaridan foydalana olishi, loyiha tashabbuslarini keng ommaga, ayniqsa bolalar orasida targʻib etishiga koʻmaklashishdan iborat.

Mazkur qoʻshma qarorda har oʻquv yilining boshida bolalar harakati sardorlari saylovi oʻtkazilishi belgilangan. Sardorlar saylovi sinf, maktab, tuman va respublika miqyosida oʻtkazilib, har bir bosqichda sardorlikka nomzodlar oʻz loyihalarini himoya qiladilar.

Qoʻshma qaror bilan tasdiqlangan Nizom asosida Amudaryo tumanidagi 11-sonli umumtaʼlim maktabida Bolalar harakati sardorlarining maktab aʼzolari saylovi oʻtkazildi. Tadbirda maktab direktori Ulugʻbek Mamutov, Milliy gvardiya xodimi Gʻafur Shukurullayev, Qipchoq shaharcha fuqarolar yigʻini yoshlar yetakchisi Doniyor Vaisovlar qatnashdi. Tadbirni maktab direktorining maʼnaviy-maʼrifiy ishlar boʻyicha oʻrinbosari Qunduzoy Xolmuratova olib bordi.

Saylovda Bolalar harakati sardorlarining maktab aʼzoligiga nomzodlar dasturlari tinglanib, jami 18 nafar aʼzo va 1 nafar bosh sardor saylandi hamda ularga ishonch yorliqlari topshirildi. Aʼzolar jami 6 ta – sport va salomatlik, “Yashil makon”, media va axborot texnologiyalari, sanʼat, taʼlim hamda “Imkon” yoʻnalishlarining har biriga 3 nafardan masʼul qilib biriktirildi. Tadbirda maktabning 5-“v” sinf qizlari ijrosida raqs namoyish etildi.

Aytish joizki, Bolalar harakati sardori maktabdagi bolalar tashkilotining yetakchisi hisoblanadi va u maktabdagi bolalar tadbirlari, loyihalar va uchrashuvlarni tashkil etish, sinf va maktab oʻquvchilari oʻrtasida hamjihatlikni taʼminlash hamda ijtimoiy faollikni rivojlantirish, bolalar tashabbuslarini ragʻbatlantirish va ularning takliflarini qoʻllab-quvvatlash, shuningdek, jamoatchilik bilan hamkorlik qilish vazifalarini bajaradi. Sardor maktab maʼmuriyati va oʻquvchilar oʻrtasidagi koʻprik vazifasini bajarib, bolalarning fikrlari va takliflarini oʻqituvchilarga yetkazadi.

Qayd etish kerakki, oʻquvchilarni jamiyatning faol aʼzosi sifatida voyaga yetkazishda maktablardagi bolalar harakatining ahamiyati juda katta. Bolalar harakati yoshlarda jamoatchilik hayotida faol ishtirok etish koʻnikmalarini shakllantirib, ularni mustaqil fikrlashga, bolalardagi yetakchilik qobiliyatlarini rivojlantirishga yordam beradi.

Endilikda Bolalar harakati sardorlarining tuman aʼzolarini, keyinchalik esa Qoraqalpogʻiston Respublikasi, viloyatlar va Toshkent shahar Bolalar harakati sardorlarini saylash, yakunda esa Bolalar harakati sardorlarining Respublika aʼzolarini saylash koʻzda tutilgan.

Bolalar harakati – bu maktablarda oʻquvchilar oʻrtasida hamkorlik va birdamlik muhitini shakllantirishga xizmat qiladigan ijtimoiy tuzilmadir. Harakat oʻquvchilarning jamoat ishlarida faol ishtirok etishi, masʼuliyat va yetakchilikni oʻz zimmalariga olishi, oʻzaro hamkorlikda ishlashi kabi qobiliyatlarini rivojlantirishga koʻmaklashish maqsadida tashkil etilgan. Shu bilan birga, Bolalar harakati oʻquvchilarning ijodiy qobiliyatlarini rivojlantirishga, turli tadbirlarda faol qatnashish orqali oʻzini namoyon qilishiga koʻmaklashishi sababli bolalar hayotida muhim ahamiyat kasb etadi.