Kuzgi shudgorlash ishlari boʻyicha seminar boʻlib oʻtdi

Xalqimiz orasida “Yer haydasang kuz hayda, kuz haydamasang yuz hayda” degan naql bor va bu bejizga aytilmagan. Qishloq xoʻjaligida moʻl hosil yetishtirishda kuzgi shudgorlashning ahamiyati juda katta. Oʻz vaqtida, sifatli oʻtkazilgan shudgor kelgusi yil hosiliga puxta zamin yaratadi. Hududlarda kuzgi shudgorlash ishlarini olib borish yuzasidan tashkil etilayotgan seminarlarda bu borada mutaxassislar tomonidan masʼullarga tegishli tavsiya hamda koʻrsatmalar berilmoqda.

Amudaryo tumanida ham Qoraqalpogʻiston Respublikasi Vazirlar Kengashi Raisining qishloq xoʻjaligi masalalari boʻyicha oʻrinbosari Shuhrat Teshayev ishtirokida kuzgi shudgorlash ishlarini tashkil etish yuzasidan seminar boʻlib oʻtdi. Seminarda tuman hokimi Sobir Xoʻjametov, sektorlar rahbarlari, hokim oʻrinbosari, qishloq xoʻjaligi sohasi masʼullari hamda fermerlar ishtirok etdilar.

Seminar Tosh yop ovuli hududidagi “Bekmon Allaberganov” fermer xoʻjaligi ekin maydonida tashkil etilib, unda Qoraqalpogʻiston Respublikasi Vazirlar Kengashi Raisi oʻrinbosari Shuhrat Teshayev soʻzga chiqdi. U oʻz soʻzida kuzgi shudgorlashni toʻgʻri tashkil etishning qishloq xoʻjaligi mahsulotlaridan yuqori hosil olishdagi ahamiyati xususida toʻxtalib oʻtdi hamda mavzu yuzasidan tegishli tavsiyalar berdi.

Taʼkidlanganidek, yerlarni sifatli va yuqori unum bilan shudgorlash uchun traktor va pluglar oldindan ishga shay holga keltirilishi va sozlanishi, dalalar esa haydovga tayyorlangan boʻlishi, haydov toʻgʻri tashkil etilishi hamda uning sifati doimo nazorat qilib borilishi lozim. Qolaversa, sifatli shudgorlangan maydonlarda shoʻr yuvish, erta bahorda tuproqni ekishga tayyorlash hamda ekish kabi agrotexnik tadbirlarni ham oʻz vaqtida oʻtkazishga erishiladi.

Seminarda tuman hokimi Sobir Xoʻjametov tumanda kuzgi shudgorlashning tashkil etilishi borasidagi ishlar xususida soʻz yuritdi.

Maʼlumot oʻrnida aytish joizki, tumanda 2025-yilgi ekish mavsumi oldidan joriy yilda 16 ming 27 gektar maydonda kuzgi shudgorlashni oʻtkazish rejalashtirilgan boʻlib, unda jami 71 ta surim texnikalari qatnashishi koʻzda tutilgan. Mavjud texnikalar 18 ta surim otryadlariga biriktirilgan. Kuzgi shudgorlash ishlarini 1-noyabrdan 2-dekabrgacha – 32 kunda yakunlash maqsadida shudgorlash grafiklari ishlab chiqilgan boʻlib, bugungi kungacha jami 1 ming 642 gektar ekin maydonlarida shudgorlash ishlari amalga oshirilgan. Mexanizatorlar kuniga 150-160 gektar dalani shudgor qilishga erishmoqdalar.

Tumanda fermer xoʻjaliklari va qishloq xoʻjaligi korxonalarida 71ta lazerli yer tekislagichlar mavjud boʻlib, ular yordamida jami 1 ming 73ta konturlar yoki 8 ming 70 gektar maydonlar sifatli qilib tekislangan. 2025-yilgi ekish mavsumi oldidan 19 ming 201,4 gektar maydonlar shoʻrini yuvish rejalashtirilgan boʻlib, ushbu maydonlarning 782 gektari kuchli shoʻrlangan, 4 ming 840,2 gektari oʻrtacha shoʻrlangan va 13 ming 579,2 gektari kam shoʻrlangan maydonlar hisoblanadi. Shoʻr yuvish tadbirni amalga oshirish uchun 18ta sugʻorish otryadlari tashkil qilinib, ushbu otryadlarga 1 ming 501 nafar malakali xodimlar biriktirilgan.

Qayd etish joizki, seminar tashkil etilgan “Bekmon Allaberganov” fermer xoʻjaligi tumandagi eng ilgʻorlar qatorida shudgorlash ishlarini oʻz nihoyasiga yetkazayotgan xoʻjaliklardan biri hisoblanadi. Fermer xoʻjaligining jami 110 gektar ekin maydoni mavjud boʻlib, shundan 70 gektar maydonda shudgorlash ishlari olib borildi.

Seminar ishtirokchilari fermer xoʻjaligi dalasida kuzgi shudgorlashning namunaviy usullari bilan tanishishdi, hududdagi ilgʻor fermerlarning tajribalari haqida fikr almashishdi. Shudgorlash ishlarini sovuq kunlarga qoldirmasdan yakuniga etkazish, shoʻr yuvish ishlarini sifatli bajarish boʻyicha tegishli masʼullarga koʻrsatmalar va tavsiyalar berildi.

Charos Arslonova, tuman hokimligining Axborot xizmati rahbari.