Qisqa muddatli oʻquv kurslari bitiruvchilariga sertifikatlar topshirildi

Maktabgacha taʼlim tizimida sifat va samaradorlikni oshirish uchun pedagog xodimlar malakasini muntazam ravishda oshirib borish muhim ahamiyatga ega. Shu maqsadda Oʻzbekiston Respublikasi Maktabgacha va maktab taʼlimi vazirligi tomonidan maxsus qisqa muddatli oʻquv kurslari tashkil etilib, xalqaro tajribalar asosida pedagog xodimlarning bilim va koʻnikmalarini oshirish masalasiga katta eʼtibor qaratilmoqda.

Oʻzbekiston Respublikasi Maktabgacha va maktab taʼlimi vazirligining 2024-yil 7-avgustdagi 252-sonli buyrugʻi asosida Jahon banki bilan hamkorlikda “Bolalarni erta yoshdan rivojlantirishni takomillashtirish” loyihasi doirasida pedagoglar uchun toʻrt bosqichli malaka oshirish kurslari tashkil qilingan boʻlib, bu kurslar maktabgacha taʼlim tashkilotlari xodimlariga 36 soatlik oʻquv dasturi orqali xalqaro tajribalar bilan tanishish imkonini beradi va ularning zamonaviy usullarda taʼlim berish koʻnikmalarini oshirishga koʻmaklashadi.

Qoraqalpogʻiston Respublikasi Maktabgacha va maktab taʼlimi vazirligining topshirigʻi asosida joriy yilning 28-oktyabridan 1-noyabr sanasigacha Amudaryo tumani Maktabgacha va maktab taʼlimi boʻlimining majlislar zalida 36 soatga moʻljallangan xalqaro tajribalar asosidagi qisqa muddatli malaka oshirish kurslari tashkil qilindi.

Oʻquv kurslarida tumandagi 52ta davlat maktabgacha taʼlim tashkilotlaridan direktorlar va metodistlar, shuningdek, davlat-xususiy sherikchilik asosida tashkil etilgan maktabgacha taʼlim muassasalaridan tarbiyachilar ishtirok etdi.

Qisqa muddatli oʻquv kurslarida jami 56 nafar ishtirokchi zamonaviy taʼlim metodlari va bolalar bilan ishlashda qoʻllaniladigan yondashuvlar haqida bilim va koʻnikmalarini yanada boyitdilar. Kurs davomida ishtirokchilar amaliy mashgʻulotlarga ham jalb etiladi, bu esa bilimlarni real sharoitlarda qoʻllash koʻnikmalarini oshirishga xizmat qiladi. Oʻquv kursi yakunida tuman Maktabgacha va maktab taʼlimi boʻlimi boshligʻi Yalgʻosh Shomurodov maxsus sertifikatlarni kurs bitiruvchilariga tantanali ravishda topshirdi.

Shundan keyin oʻquv kursi ishtirokchilari oʻzaro tajriba almashish va oʻquv kursi davomida olgan bilimlarini mustahkamlash maqsadida amaliy mashgʻulotlarda ishtirok etishdi.

Taʼkidlash joizki, maktabgacha taʼlim tashkilotlarida bolaning erta yoshdan rivojlanishini takomillashtirishda pedagoglar bolaning jismoniy, ijtimoiy-emotsional, aqliy va nutqiy rivojlanishiga birdek eʼtibor qaratishlari nihoyatda muhimdir. Zero, har bir bola individual xususiyatlarga ega boʻladi, shuning uchun ularga shaxsiy yondashuv talab etiladi. Bu yondashuv bolalarning oʻzlarini qadrli his etishlariga va ularda oʻzlariga nisbatan ishonch paydo boʻlishiga yordam beradi.

Bolaning ijtimoiy koʻnikmalarini rivojlantirish uning keyingi hayotidagi muvaffaqiyati uchun muhim ahamiyat kasb etishi ham ayni haqiqat. Shu sababli mashgʻulotlarda pedagoglar bolalarni guruhda ishlash, doʻstona munosabatlar oʻrnatish va turli vaziyatlarda oʻz his-tuygʻularini toʻgʻri ifoda etishga oʻrgatish masalasiga alohida eʼtibor qaratdilar. Bundan tashqari, bolalarning aqliy rivojlanishi uchun qiziqarli va foydali oʻyinlarni tashkil qilishga alohida urgʻu berdilar. Bolalarga mashgʻulotlar orqali atrof-muhitni oʻrganish, muammolarni yechish va savollarga javob izlashni oʻrgatish ham nihoyatda muhim. Bu jarayonda turli oʻyinlar, amaliy mashgʻulotlar hamda taʼlimiy materiallardan foydalanish ularning fikrlash va muammo yechish qobiliyatlarini oshirishi alohida qayd etib oʻtildi.

Mazkur oʻquv kurslari orqali pedagoglar yangi tajribalarni oʻrganib, amaliy koʻnikmalarini yanada oshirdilar va taʼlim jarayonida foydalanish uchun yangi yondashuvlarni oʻzlashtirdilar. Kelgusida ishtirokchilar oʻzlari faoliyat yuritayotgan muassasalarda kurs davomida oʻrgangan bilimlarini boshqa hamkasblariga ham oʻrgatishadi. Bu esa oʻquv kurslarining samarasini yanada kengroq miqyosda namoyon qiladi va maktabgacha taʼlim tizimi sifatining yuksalishiga zamin yaratadi.