Tadbirkorlik obʼektlariga media-tur tashkil etildi

Amudaryo tumani hokimligining Axborot xizmati tomonidan hududdagi yangi tadbirkorlik obʼektlarga media-tur tashkil etildi. Media-tur mobaynida muhtaram Prezidentimiz tomonidan yaratilayotgan imkoniyatlardan samarali foydalanib, oʻz faoliyatini yanada rivojlantirayotgan tadbirkorlar faoliyati bilan tanishildi.

Media-tur davomida ommaviy axborot vositalari vakillari tumandagi kichik sanoat zonasida faoliyat yuritayotgan, ish boshlaganiga qisqa fursat boʻlishiga qaramasdan, ichki bozorda oʻz xaridorlariga ega boʻlgan tadbirkorlik subʼektlari – plastmassa mahsulotlari ishlab chiqarishga ixtisoslashgan “Al-kafil biznes plast” MChJ, non va qandolat mahsulotlari ishlab chiqarish bilan shugʻullanuvchi “Ravshanbek-Yulduzxon” xususiy korxonasi, sutdan tayyorlanadigan mahsulotlar ishlab chiqaradigan “Kamron Gold Media” MChJga qarashli tsexlar faoliyati bilan tanishdilar.

“Al-kafil biznes plast” MChJ direktori Allabergan Yernazarovning taʼkidlashicha, jamiyat nafaqat tuman ichki bozorini, balki qoʻshni tumanlar hamda qoʻshni viloyatlar bozorlarini ham oʻz mahsulotlari bilan taʼminlab kelmoqda. Bugungi kunda jamiyatda 15 nafarga yaqin band boʻlmagan fuqarolar ish bilan taʼminlangan. Tadbirkor oʻz faoliyatini 2019-yilda boshlagan boʻlib, Xalq banki tomonidan ajratilgan 37 ming AQSh dollari miqdoridagi imtiyozli kredit hisobiga Xitoy Xalq Respublikasidan plastmassa mahsulotlari ishlab chiqaruvchi dastgohlar olib kelgan. Ayni paytda jamiyatga qarashli tsexda aholi kundalik ehtiyoji uchun ishlatadigan 10 dan ortiq turdagi, har xil hajmdagi xoʻjalik plastmassa buyumlari ishlab ishlab chiqarilmoqda.

Jamiyat mahsulotlari xaridorlari soni tobora ortib, ishlab chiqarish hajmi oy sayin oshib bormoqda. Masʼuliyati cheklangan jamiyati oʻz ishlab chiqarish mahsulotlarini Qoraqalpogʻistonning shahar va tumanlaridan tashqari Xorazm, Navoiy, Buxoro, Samarqand va Toshkent viloyatlariga ham yetkazib beradi. Shuningdek, endilikda qoʻshni davlatlarga mahsulotlar eksportini yoʻlga qoʻyish boʻyicha rejalar tuzilib, qator samarali ishlar qilinmoqda. Korxona oʻzining yuqori sifatli plastmassa mahsulotlari bilan Amudaryo tumanining ishlab chiqarish salohiyatini yuksaltirishga munosib hissa qoʻshmoqda.

Media-tur ishtirokchilari mazkur kichik sanoat zonasida joylashgan, izlanuvchan va shijoatli tadbirkor Dildora Xaytboyeva rahbarlik qilayotgan sutdan tayyorlanadigan mahsulotlar ishlab chiqarishga ixtisoslashgan “Kamron Gold Media” MChJ hamda “Ravshanbek-Yulduzxon” xususiy korxonasiga qarashli non va qandolat mahsulotlari ishlab chiqarish tsexida ham boʻldilar.

Tadbirkor Dildora Xayitboyevaning taʼkidlashicha, 2008-yilda onasi bilan birgalikda kuniga 100ta non va patir yopishdan boshlagan kichik tadbirkorlik faoliyati bugungi kunga kelib 33 nafar ishsiz yurtdoshlarimizning bandligini taʼminlagan ishlab chiqarish korxonasiga aylangan. Eʼtiborlisi, korxonada ishlayotganlarning aksariyati ijtimoiy himoyaga muhtoj, “Ayollar daftari”da turgan yurtdoshlarimiz boʻlib, bugun doimiy ish bilan taʼminlanishlari natijasida oilaviy sharoitlri tobora yaxshilanmoqda.

Tadbirkorning faoliyati Oʻzbekiston Respublikasi Prezidentining “Qoraqalpogʻiston Respublikasida tadbirkorlik, innovatsion texnologiyalar va infratuzilmalarni jadal surʼatlarda rivojlantirish orqali aholi farovonligini oshirishning qoʻshimcha chora-tadbirlari toʻgʻrisida”gi 213-sonli Farmoni asosida 200 ming AQSh dollari miqdoridagi imtiyozli bank krediti hisobiga Xitoy Xalq Respublikasidan zamonaviy dastgohlar, asbob-uskunalar olib kelinishi natijasida yanada rivojlanmoqda.

Bugungi kunda “Kamron Gold Media” MChJda 10 xildan ortiq sut mahsulotlari ishlab chiqarilmoqda. Kuniga 600 litrdan ortiq sut qayta ishlanadi. Ishlab chiqarilgan sut mahsulotlari tumandagi davlat maktabgacha taʼlim tashkilotlariga shartnoma asosida yetkazib beriladi. Korxonaning 4 ta yetkazib berish mashinalari mavjud boʻlib, ishlab chiqarilgan mahsulotlar shu kunning oʻzida isteʼmolchilarga yetkaziladi. Mangʻit dehqon bozorida ham korxonaga qarashli yarmarkalar tashkil etilgan boʻlib, mahsulotlar aholiga hamyonbop narxlarda sotilmoqda.

Tadbirkor Dildora Xayitboyevaning kelgusidagi rejalari katta. Kelgusida tumandagi har bir mahallada sut va sut mahsulotlari, non mahsulotlari hamyonbop narxlarda sotiladigan shoxobchalarni tashkil etish orqali aholi uchun yanada qulayliklar yaratish rejalashtirilmoqda. Shuningdek, Xitoy Xalq Respublikasidan yangi dastgohlar olib kelib, sariyogʻ ishlab chiqarishni yoʻlga qoʻyish ham tadbirkorning oldinda turgan eng katta maqsadlardan biridir.

Bugun har bir tadbirkorning tashabbusi davlatimiz va hukumatimiz tomonidan har tomonlama qoʻllab-quvvatlanayotgan bir davrda Dildora Xayitboyeva ham yaratilayotgan imkoniyat va shart-sharoitlardan samarali foydalanib, tumanning ishlab chiqarish salohiyatini yanada oshirishga munosib hissa qoʻshmoqda.

Charos Arslonova, tuman hokimligining Axborot xizmati rahbari.