Amudaryo tumanida sport sinovlarini namunali topshirganlar munosib taqdirlandi

Bugungi kunda aholi oʻrtasida sportga va jismoniy faollikka boʻlgan qiziqish har qachongidan ham ortib bormoqda. Oʻzbekiston Respublikasi Prezidentining 2021-yil 16-iyundagi qarori asosida yurtimizda sportga boʻlgan eʼtiborni yanada kuchaytirish maqsadida jismoniy tayyorgarlikka oid normativlar joriy qilingan boʻlib, ushbu hujjat aholi oʻrtasida jismoniy faollikni yanada oshirish borasida muhim ahamiyat kasb etmoqda.

Ushbu qaror bilan 2021-yil 1-avgustdan boshlab aholining jismoniy tayyorgarlik darajasini baholash tizimi joriy etildi. Baholash tizimi boʻyicha sport sinovlari maxsus va ixtiyoriy ravishda aholining jismoniy tayyorgarligini aniqlaydi.

Amudaryo tumanida ham 30 yoshdan 70 yoshgacha boʻlgan aholi vakillari sport sinovlaridan oʻtib, jismoniy tayyorgarlik darajasini haqida maʼlumotlarga ega boʻlmoqdalar. Yaqinda ushbu sinovlarni namunali tarzda topshirgan bir guruh amudaryolik sportsevarlarni taqdirlash marosimi boʻlib oʻtdi. Qoraqalpogʻiston Respublikasi Sport vazirligi tomonidan tashkil etilgan taqdirlash marosimida sport sinovlarining faol ishtirokchilariga maxsus sport formalari va birinchi, ikkinchi hamda uchinchi darajali “Jismoniy tayyorgarlik darajasi” koʻkrak nishonlari topshirildi.

Aytish joizki, baholash tizimi boʻyicha yosh koʻrsatkichlaridan kelib chiqib sport sinovlarining maxsus talablarini muvaffaqiyatli bajargan shaxslar bir yil mobaynida safarbarlik chaqiruvi rezervidagi harbiy xizmat toʻlovining 50 foizini chegirma bilan toʻlaydi va muddatli harbiy xizmatga birinchilar qatorida ustunlik bilan yuboriladi. Qolaversa, maxsus talablarni bajargan gʻoliblarga, yaʼni 1-oʻrin egalariga “Temurbeklar maktabi”ga test sinovlarisiz tanlovdan tashqari oʻqishga kirish, bepul tarzda davlat tuman yoki shahar koʻp tarmoqli tibbiyot muassasasida bir martalik chuqurlashtirilgan tibbiy koʻrikdan oʻtish, shahar transportida bepul hamda hududlararo harakatlanishda 50 foiz chegirmali toʻlov bilan imtiyozli yurish huquqi beriladi.

Shuningdek, gʻoliblarning farzandlari oʻzlari yashayotgan joydagi umumtaʼlim maktabi, maktabgacha taʼlim tashkilotlari, yozgi sogʻlomlashtirish oromgohlariga navbatsiz joylashtiriladi, barcha davlat organlari va tashkilotlarining xodimlariga ish joyi hisobidan dam olish maskanlari va sanatoriylarga bepul yoʻllanmalar taqdim etiladi. Yana bir imtiyoz – gʻoliblarning respublika miqyosida ishga yoki oʻqishga qabul qilinishida jismoniy tayyorgarlik talab etiladigan imtihon, sinov, amaliy mashgʻulotlarda ustunlik beriladi, yaʼni ularga oliy taʼlim muassasalari sport yoʻnalishlaridan tashqari barcha imtihonlarda maksimal ball beriladi yoki amaliy mashgʻulotlardan ozod qilinadi.

Tadbirda bir qator nufuzli mehmonlar – Oʻzbekiston Respublikasi Sport vazirligining Etnosport turlarini rivojlantirish va sport normativlarini oʻtkazish shoʻʼbasi xodimi Feruza Abduraxmonova, Toshkent shahar sport maktabi masʼullari hamda Qoraqalpogʻiston Respublikasi Sport vaziri oʻrinbosari Azamat Qalbayevlar ishtirok etib, gʻoliblarni koʻkrak nishoni bilan taqdirlab, ularga beriladigan imtiyozlar haqida batafsil maʼlumotlar berdilar.

Taʼkidlash kerakki, ushbu sport sinovlari nafaqat sport bilan muntazam shugʻullanish, balki aholi salomatligini mustahkamlash va faol hayot tarzini keng targʻib qilishga qaratilgani bilan ham ahamiyatlidir. Shuningdek, har yili tashkil qilinadigan bu tadbirlar mahallalarda sportga boʻlgan qiziqishni oshirish va aholining turli yosh guruhlari orasida jismoniy faollikni ragʻbatlantirishga ham xizmat qilmoqda.

Ushbu sport sinovlari shuningdek, yoshlarda iroda, oʻz kuchi va imkoniyatlariga ishonch kabi fazilatlarni mustahkamlash, ularda jasorat, vatanparvarlik va sadoqat xislatlarini rivojlantirish, yurtimiz sharafini himoya qila oladigan, jismonan baquvvat va intellektual salohiyatli, Vatan mudofaasiga munosib zaxira kadrlarni tayyorlashda ham muhim vosita boʻlishi koʻzda tutilgan.