Muntazam ravishda yoʻl harakati qoidabuzarliklarini sodir etayotgan haydovchilar toʻgʻrisida profilaktik suhbat oʻtkazildi

Bugun yoʻl harakati qoidalari har birimizning hayotimizning ajralmas qismi hisoblanadi. Ular insonlar va transport vositalari oʻrtasida xavfsizlikni taʼminlaydi. Qoida va normalar toʻgʻri yoʻl harakatini tashkil etish, yoʻlovchilarning hayotini saqlab qolish va yoʻllardagi noqulayliklarni kamaytirish uchun juda muhimdir.

Yoʻl harakati qoidalarini buzish jiddiy oqibatlarni keltirib chiqarishi mumkin. Qoidabuzarlar nafaqat oʻzlariga, balki boshqalarga ham zarar yetkazishlari, oʻzlarining, hamrohlarining va boshqa yoʻl harakati ishtirokchilarining hayotini xavf ostiga qoʻyishi mumkin. Misol uchun, tezlikni ruxsat etilgan normadan oshirish, svetofor chiroqlarining ishoralariga, yoʻl belgilari va yoʻl chiziqlarining koʻrsatmalariga rioya qilmaslik nafaqat jarimaga sabab boʻlishi, balki fojiali hodisalar bilan yakunlanishi ham mumkin.

Ana shunday noxush holatlarning oldini olish maqsadida Amudaryo tumani Ichki ishlar boʻlimi maʼmuriyati Yoʻl-patrul xizmati xodimlari bilan birgalikda doimiy ravishda tushuntirish-targʻibot ishlarini olib bormoqdalar.

Tuman Ichki ishlar boʻlimi maʼmuriy binosi oldida boʻlib oʻtgan navbatdagi targʻibot tadbirida muntazam ravishda yoʻl harakati qoidabuzarliklarini sodir etayotgan haydovchilar toʻgʻrisida profilaktik suhbat oʻtkazildi. Tadbirda Qoraqalpogʻiston Respublikasi Ichki ishlar vazirligi Yoʻl harakati xavfsizligi boshqarmasi masʼullari ham ishtirok etib, haydovchilarni ogohlikka, yoʻl harakati qoidalariga qatʼiy rioya etishga chaqirdi.

Darhaqiqat, yoʻl harakati qoidalarini buzganlik uchun moliyaviy jarimalar avvalo oila byudjetiga katta zarar keltirishi mumkin. Jarimalar oiladagi boshqa xarajatlar uchun mablagʻni kamaytiradi. Agar haydovchi muntazam ravishda yoʻl harakati qoidalarini buzsa, jarimalar miqdori ham oshib, moliyaviy zarar koʻlami yanada kengayadi. Eng ayanchlisi, haydovchida yoʻl harakati qoidalariga nisbatan bepisandlik kayfiyati kuchayishi, bu esa yanada ayanchli oqibatlarni keltirib chiqarishi mumkin.

Qoidabuzarliklarni faqat moliyaviy mezonlar bilan oʻlchash notoʻgʻri. Ayniqsa, insonlarning tan jarohati olishi yoki oʻlimiga sabab boʻluvchi yoʻl-transport hodisalari nafaqat ikki yoki undan ortiq oilalarning tushkunligiga, balki jamiyatning ham nafratiga sabab boʻladi. Shunday ekan, yoʻl harakati qoidalariga har bir harakat ishtirokchisining qatʼiy amal qilishi talab etiladi.

Oʻtkazilgan profilaktik tadbir davomida haydovchilar bilan yakkama-yakka suhbatlar oʻtkazilib, Jinoyat Kodeksi va “Maʼmuriy javobgarlik toʻgʻrisida”gi Kodeksda yoʻl harakati qoidabuzarliklari uchun nazarda tutilgan jazo turlari haqida batafsil maʼlumotlar berildi. Bunday profilaktik suhbatlar potentsial qoidabuzarlarni  xushyorlikka va ogohlikka chorlashda muhim vosita boʻlsa, ajab emas.

Unutmang, azizlar, yoʻl harakati qoidalari – bu umr foydasi, ularga rioya qilish esa har birimizning burchimizdir.