Мунтазам равишда йўл ҳаракати қоидабузарликларини содир этаётган ҳайдовчилар тўғрисида профилактик суҳбат ўтказилди
Бугун йўл ҳаракати қоидалари ҳар биримизнинг ҳаётимизнинг ажралмас қисми ҳисобланади. Улар инсонлар ва транспорт воситалари ўртасида хавфсизликни таъминлайди. Қоида ва нормалар тўғри йўл ҳаракатини ташкил этиш, йўловчиларнинг ҳаётини сақлаб қолиш ва йўллардаги ноқулайликларни камайтириш учун жуда муҳимдир.
Йўл ҳаракати қоидаларини бузиш жиддий оқибатларни келтириб чиқариши мумкин. Қоидабузарлар нафақат ўзларига, балки бошқаларга ҳам зарар етказишлари, ўзларининг, ҳамроҳларининг ва бошқа йўл ҳаракати иштирокчиларининг ҳаётини хавф остига қўйиши мумкин. Мисол учун, тезликни рухсат этилган нормадан ошириш, светофор чироқларининг ишораларига, йўл белгилари ва йўл чизиқларининг кўрсатмаларига риоя қилмаслик нафақат жаримага сабаб бўлиши, балки фожиали ҳодисалар билан якунланиши ҳам мумкин.
Ана шундай нохуш ҳолатларнинг олдини олиш мақсадида Амударё тумани Ички ишлар бўлими маъмурияти Йўл-патруль хизмати ходимлари билан биргаликда доимий равишда тушунтириш-тарғибот ишларини олиб бормоқдалар.
Туман Ички ишлар бўлими маъмурий биноси олдида бўлиб ўтган навбатдаги тарғибот тадбирида мунтазам равишда йўл ҳаракати қоидабузарликларини содир этаётган ҳайдовчилар тўғрисида профилактик суҳбат ўтказилди. Тадбирда Қорақалпоғистон Республикаси Ички ишлар вазирлиги Йўл ҳаракати хавфсизлиги бошқармаси масъуллари ҳам иштирок этиб, ҳайдовчиларни огоҳликка, йўл ҳаракати қоидаларига қатъий риоя этишга чақирди.
Дарҳақиқат, йўл ҳаракати қoидaларини бузганлик учун молиявий жарималар аввало оила бюджетига катта зарар келтириши мумкин. Жарималар оиладаги бошқа харажатлар учун маблағни камайтиради. Агар ҳайдовчи мунтазам равишда йўл ҳаракати қоидаларини бузса, жарималар миқдори ҳам ошиб, молиявий зарар кўлами янада кенгаяди. Энг аянчлиси, ҳайдовчида йўл ҳаракати қоидаларига нисбатан беписандлик кайфияти кучайиши, бу эса янада аянчли оқибатларни келтириб чиқариши мумкин.
Қоидабузарликларни фақат молиявий мезонлар билан ўлчаш нотўғри. Айниқса, инсонларнинг тан жароҳати олиши ёки ўлимига сабаб бўлувчи йўл-транспорт ҳодисалари нафақат икки ёки ундан ортиқ оилаларнинг тушкунлигига, балки жамиятнинг ҳам нафратига сабаб бўлади. Шундай экан, йўл ҳаракати қоидаларига ҳар бир ҳаракат иштирокчисининг қатъий амал қилиши талаб этилади.
Ўтказилган профилактик тадбир давомида ҳайдовчилар билан яккама-якка суҳбатлар ўтказилиб, Жиноят Кодекси ва “Маъмурий жавобгарлик тўғрисида”ги Кодексда йўл ҳаракати қоидабузарликлари учун назарда тутилган жазо турлари ҳақида батафсил маълумотлар берилди. Бундай профилактик суҳбатлар потенциал қоидабузарларни хушёрликка ва огоҳликка чорлашда муҳим восита бўлса, ажаб эмас.
Унутманг, азизлар, йўл ҳаракати қоидалари – бу умр фойдаси, уларга риоя қилиш эса ҳар биримизнинг бурчимиздир.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
