“Zakovat” intellektual oʻyinining Qoraqalpogʻiston Respublikasi bosqichida ishtirok etuvchi jamoalar aniqlandi

Mamlakatimizda iqtidorli yoshlarning mantiqiy bilimlarini oshirish, ularni saralash va intellektual oʻyinlarga keng jalb qilish, ushbu oʻyinlar tashkil qilinishini davlat tomonidan qoʻllab-quvvatlash va zarur shart-sharoitlar yaratish, shuningdek, aholining intellektual salohiyatini yuksaltirish maqsadida “Zakovat” intellektual oʻyinini aholi oʻrtasida ommaviy-maʼrifiy harakatga aylantirish va boshqa intellektual oʻyinlarni rivojlantirish boʻyicha keng islohotlar amalga oshirilmoqda.

Oʻzbekiston Respublikasi Prezidentining 2022-yil 20-yanvar kungi bu boradagi maxsus Qarori iqtidorli yoshlarni intellektual oʻyinlarga keng jalb qilishda muhim asos boʻlib xizmat qilmoqda. Xususan, maktab, oliy oʻquv yurtlari va mahalla yoshlari oʻrtasida shunday milliy intellektual tanlovlar yangicha ruhda tashkil etilyapti.

Joriy yilning 11-sentyabr kuni Amudaryo tumanidagi “Oltin saroy” tantanalar majmuasida umumtaʼlim maktablari oʻquvchilari oʻrtasida koʻtarinki ruhda oʻtkazilgan “Zakovat” intellektual oʻyinining Amudaryo tumani bosqichi ham ovul va mahallalardagi barcha iqtidorli yoshlarni tafakkur davrasiga qamrab oldi. Mazkur turnirda tumandagi 85 ta umumtaʼlim maktablarining har biridan jamoalar ishtirok etib, gʻoliblik uchun munosib kurash olib borishdi. Quvonarlisi, qizgʻin va murosasiz kechgan bahslarda tumanimiz yoshlari oʻz bilim va iqtidorlarini namoyish qilishdi.

Turnir “Zakovat intellektual klubi” nodavlat notijorat tashkilotining Qoraqalpogʻiston Respublikasi boʻyicha koordinatori Dilshod Jumaniyazov tomonidan yuqori saviyada boshqarib borildi. Hayajonli va qizgʻin kechgan oʻyinda ishtirokchilarning tarixiy, adabiy va mantiqiy bilimlari, tafakkur va fikr tezligi sinovdan oʻtkazildi. Jamoalarning har biri insonni falsafiy mushohadalarga undaydigan savollardagi jumboqlarga astoydil javob izlashdi.

Ishonamizki, umumtaʼlim maktablarida taʼlim olayotgan bu iqtidorli yoshlar, yaʼni “Zakovat” bilimdonlari ertaga yurt koriga yaraydigan munosib farzand boʻlib kamolga yetadilar. Shu bois bugun ular olayotgan bilim va erishayotgan yutuqlar mamlakat rivojida muhim poydevor vazifasini oʻtaydi.

Darhaqiqat, avvallari “Zakovat” deganda oynai jahonda bolalikdan koʻrganimiz – hozirgidek gavjum boʻlmagan, sanoqli bilimdonlar qurshovidagi stolda oʻtirgan 6 kishilik jamoaning savollarga javob berishi tushunilardi. Biroq bugun manzara butunlay boshqacha. “Zakovat” intellektual oʻyinining bir nechta tarmoqlari, koʻrinishlari paydo boʻldi. Davlat tomonidan katta mablagʻ ajratilib, intellektual musobaqalar mahallalargacha kirib bordi.

Turnir yakuniga yetgach, hakamlar hayʼati tomonidan natijalar eʼlon qilindi. Jamoalar toʻplagan umumiy ochkolarga koʻra, “Zakovat” intellektual oʻyinining tuman bosqichida 3-oʻringa 22-sonli umumtaʼlim maktabi oʻquvchilari, 2-oʻringa 35-sonli hamda 1-oʻringa 65-sonli umumtaʼlim maktabi bilimdonlari sazovor boʻlishdi.

Tashkilotchilar tomonidan gʻolib jamoalar diplom bilan taqdirlandi. Ushbu jamoalar “Zakovat” intellektual oʻyinining Qoraqalpogʻiston Respublikasi bosqichida ishtirok etish huquqini qoʻlga kiritdilar.

Shohzod Qurbonboyev