“Заковат” интеллектуал ўйинининг Қорақалпоғистон Республикаси босқичида иштирок этувчи жамоалар аниқланди

Мамлакатимизда иқтидорли ёшларнинг мантиқий билимларини ошириш, уларни саралаш ва интеллектуал ўйинларга кенг жалб қилиш, ушбу ўйинлар ташкил қилинишини давлат томонидан қўллаб-қувватлаш ва зарур шарт-шароитлар яратиш, шунингдек, аҳолининг интеллектуал салоҳиятини юксалтириш мақсадида “Заковат” интеллектуал ўйинини аҳоли ўртасида оммавий-маърифий ҳаракатга айлантириш ва бошқа интеллектуал ўйинларни ривожлантириш бўйича кенг ислоҳотлар амалга оширилмоқда.

Ўзбекистон Республикаси Президентининг 2022 йил 20 январь кунги бу борадаги махсус Қарори иқтидорли ёшларни интеллектуал ўйинларга кенг жалб қилишда муҳим асос бўлиб хизмат қилмоқда. Хусусан, мактаб, олий ўқув юртлари ва маҳалла ёшлари ўртасида шундай миллий интеллектуал танловлар янгича руҳда ташкил этиляпти.

Жорий йилнинг 11 сентябрь куни Амударё туманидаги “Олтин сарой” тантаналар мажмуасида умумтаълим мактаблари ўқувчилари ўртасида кўтаринки руҳда ўтказилган “Заковат” интеллектуал ўйинининг Амударё тумани босқичи ҳам овул ва маҳаллалардаги барча иқтидорли ёшларни тафаккур даврасига қамраб олди. Мазкур турнирда тумандаги 85 та умумтаълим мактабларининг ҳар биридан жамоалар иштирок этиб, ғолиблик учун муносиб кураш олиб боришди. Қувонарлиси, қизғин ва муросасиз кечган баҳсларда туманимиз ёшлари ўз билим ва иқтидорларини намойиш қилишди.

Турнир “Заковат интеллектуал клуби” нодавлат нотижорат ташкилотининг Қорақалпоғистон Республикаси бўйича координатори Дилшод Жуманиязов томонидан юқори савияда бошқариб борилди. Ҳаяжонли ва қизғин кечган ўйинда иштирокчиларнинг тарихий, адабий ва мантиқий билимлари, тафаккур ва фикр тезлиги синовдан ўтказилди. Жамоаларнинг ҳар бири инсонни фалсафий мушоҳадаларга ундайдиган саволлардаги жумбоқларга астойдил жавоб излашди.

Ишонамизки, умумтаълим мактабларида таълим олаётган бу иқтидорли ёшлар, яъни “Заковат” билимдонлари эртага юрт корига ярайдиган муносиб фарзанд бўлиб камолга етадилар. Шу боис бугун улар олаётган билим ва эришаётган ютуқлар мамлакат ривожида муҳим пойдевор вазифасини ўтайди.

Дарҳақиқат, авваллари “Заковат” деганда ойнаи жаҳонда болаликдан кўрганимиз – ҳозиргидек гавжум бўлмаган, саноқли билимдонлар қуршовидаги столда ўтирган 6 кишилик жамоанинг саволларга жавоб бериши тушуниларди. Бироқ бугун манзара бутунлай бошқача. “Заковат” интеллектуал ўйинининг бир нечта тармоқлари, кўринишлари пайдо бўлди. Давлат томонидан катта маблағ ажратилиб, интеллектуал мусобақалар маҳаллаларгача кириб борди.

Турнир якунига етгач, ҳакамлар ҳайъати томонидан натижалар эълон қилинди. Жамоалар тўплаган умумий очколарга кўра, “Заковат” интеллектуал ўйинининг туман босқичида 3-ўринга 22-сонли умумтаълим мактаби ўқувчилари, 2-ўринга 35-сонли ҳамда 1-ўринга 65-сонли умумтаълим мактаби билимдонлари сазовор бўлишди.

Ташкилотчилар томонидан ғолиб жамоалар диплом билан тақдирланди. Ушбу жамоалар “Заковат” интеллектуал ўйинининг Қорақалпоғистон Республикаси босқичида иштирок этиш ҳуқуқини қўлга киритдилар.

Шоҳзод Қурбонбоев