40-sonli umumtaʼlim maktabining 1-sinfiga 180 nafar bolajonlar qabul qilindi
Oʻquvchilarga maroqli hordiq, qaynoq xotiralar ulashgan yoz fasli nihoyasiga yetdi. Qalblarga ajib bir xotirjamlik, yaxshi kayfiyat, baland ruh bagʻishlab oʻlkamizga sokin kuz fasli kirib keldi. Yigit-qizlar yana ilhombaxsh tuygʻular, yangi rejalar bilan taʼlim muassasalari tomon oshiqadi. Ularning qoʻllaridagi guldastalar jilolanib, atrofga oʻzgacha chiroy bagʻishlaydi. Maktablarda ustozlar mehri, doʻstlar sogʻinchi, qadrdon kitoblar, shinam sinfxonalar oʻquvchilarni oʻziga chorlaydi.
“Birinchi qoʻngʻiroq” sadolarida yangi oʻquv yilining boshlanishi, yuksak masʼuliyatli damlar, hayotning yangi davoni, orzu-maqsadlar sari dadil qadamlar oʻz ifodasini topadi. Bogʻcha taʼlimini yakunlagan bolajonlar maʼrifat maskani, bilimlar bulogʻi, kelajak poydevori boʻlmish muqaddas dargoh – maktab bilan ilk bor tanishadi. Ota-onalar koʻnglida esa umid va hayajon. Farzandi hayotida yangi davr boshlanish arafasida…
4-sentyabr kuni Amudaryo tumanidagi eng ilgʻor maktablardan biri – 40-sonli umumtaʼlim maktabida oʻtkazilgan “Birinchi qoʻngʻiroq” nomli tadbir ham ana shunday ajib tuygʻular bilan qalblarga muhrlandi.
Yangi oʻquv yilida maktabining 1-sinfiga 180 nafar bolajonlar qabul qilindi. Ularga 12 turdagi oʻquv qurollari, maktab sumkasi, darsliklar majmuasidan iborat Prezident sovgʻalari topshirildi.
Bayram tadbirini maktab direktori Sanobar Xoʻjamurotova tabrik soʻzi bilan ochdi va barchani yangi oʻquv yili bilan muborakbod etdi.
Taʼkidlanganidek, soʻnggi yillarda mamlakatimizda asosiy eʼtibor oʻquvchilarga sifatli taʼlim berishga qaratilmoqda. Umumtaʼlim maktablarini, taʼlim sifatini, kadrlar salohiyatini jahon mezonlari asosida rivojlantirish yoʻlida tizimli ishlar olib borilmoqda. Xususan, umumtaʼlim maktablariga Prezident va ixtisoslashgan maktablardagi yangi metodikalarga asoslangan baholash tizimi joriy qilinmoqda. Xorijiy tillarni oʻrganishni ommalashtirish maqsadida “Xorijiy tillarni oʻqitish boʻyicha eng yaxshi maktab” tanlovlari tashkil qilinmoqda. Mazkur tanlovning tuman bosqichida joriy yil 40-sonli maktab faxrli 1-oʻrinni egalladi.
Bugungi kunda 40-sonli umumtaʼlim maktabida 1600ga yaqin oʻquvchilar taʼlim-tarbiya olishmoqda. Ularga jami 111 nafar, xususan, 24 nafar oliy, 26 nafar 1-toifa, 39 nafar 2-toifa, 19 nafar mutaxassis oʻqituvchi-pedagog xodimlar dars berib kelishmoqda. 2023-2024 oʻquv yilida maktabni 143 nafar oʻquvchi bitirgan boʻlsa, shundan 80 nafari oliy taʼlim muassasalariga qabul qilindi. Eʼtirof etish joizki, 11-«D» variativ sinf oʻquvchilarining barchasi talabalik baxtiga sazovor boʻlishdi. Shuningdek, Nukus shahridagi Prezident maktabining 5-sinfiga mazkur umumtaʼlim maktabining 2 nafar oʻquvchisi qabul qilindi.
Bundan tashqari “Tashabbusli byudjet”ning joriy yilgi ikkinchi mavsumida maktab jamoasi ham ijtimoiy ahamiyatga ega loyiha bilan ishtirok etib, gʻolib boʻlgan edi. Loyiha rejasiga koʻra maktab hududida basketbol, voleybol, mini futbol maydonchalari, yugurish yoʻlakchasi, kiyinish xonasidan iborat ust qismi yopiq sport maydonchasini qurish belgilangan. Ushbu zamonaviy sport maydonchasi oʻquvchilarga jismoniy tarbiya mashgʻulotlari bilan yanada faol shugʻullanish imkonini beradi.
Shuningdek tadbirda tuman Ichki ishlar boʻlimi yoʻl-patrul xizmati boʻlinmasi boshligʻi Anvar Yusupov ham ishtirok etib, ota-onalarga, oʻquvchilarga yoʻllarda harakatlanish xavfsizligiga doir muhim tavsiyalarni berdi. Afsuski, soʻnggi paytlarda bolalar boshqaruvidagi skuter, elektrovelosiped va boshqa transport vositalari ishtirokida mudhish yoʻl transport hodisalari kuzatilmoqda. Soha mutaxassisi ushbu holatlar boʻyicha fikr bildirib, ota-onalarni yanada hushyorlikka chaqirdi.
Oʻquv dargohida “Mustaqillik darslari” ham oʻziga xos ruhda oʻtkazildi. Ushbu darslardan koʻzlangan maqsad – oʻquvchilar tafakkurini milliy va umuminsoniy qadriyatlar asosida shakllantirish, oʻzi yashab turgan tarixiy maskandagi obidalarni bilishga chorlash va oʻtmishimizga hurmat ruhida tarbiyalash, qalblarda Vatanga muhabbat va sadoqat, insonparvarlik tuygʻularini mustahkamlashdan iborat. Shuningdek, darslarda oʻquvchilar eʼtibori yangi Oʻzbekistonni barpo etish, uchinchi Renessans poydevorini yaratishga qaratilgan islohotlar mohiyatiga qaratildi.
Shohzod Qurbonboyev
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
