Беш йил давомида “Venus academy” ўқув марказининг 70 фоиз ўқувчиси ОТМ талабалари бўлишди
Мустақиллик – халқимиз ҳаётинигина эмас, балки онгини ҳам ўзгартирди. Авваллари Манғитдан нарини кўрмаган амударёлик ёшлар бугунги кунда спортда, илмда, қўйингки, ҳаётимизнинг барча жабҳаларида дунё ёшлари билан беллашишга қодир, мустақил фикрга эга инсонлар сифатида вояга етишмоқда. Улар орасида илм-у салоҳиятда собит, тадбиркор ёшлар, таниқли спортчилар, санъаткор ва ижтимоий-сиёсий жиҳатдан фаол, маънавий тафаккур дунёси кенг ижодкор ёшлар талайгина. "Venus academy" ўқув маркази раҳбари Зуҳра Ерлапасова ана шундай ёшлардан.
Бошланғич синф ўқувчиларини кичик ёшидан бошлаб, интилиш ва қизиқишлари асосида маълум йўналиш бўйича ўқитиш орқали уларнинг яширин имкониятлари ва иқтидорларини юзага чиқариш мақсадида Зуҳра Ерлапасова 2019 йилда хусусий ўқув маркази фаолиятини йўлга қўйди. Аввал "AmuKids", кейинчалик "Venus academy" номи билан фаолият юритаётган ўқув марказида ўзбек ва рус тилларида машғулотлар олиб боришга мўлжалланган ментал арифметика, мактабга умумий тайёрлов гуруҳи, инглиз тили, рус тили, рус тили саводхонлиги, яъни болаларни таълим рус тилида олиб борилувчи мактабга тайёрлов гуруҳи, машғулотлар рус ва ўзбек тилларида олиб бориладиган математика фани йўналишлари ҳамда Президент мактабларига тайёрлов курси ташкил этилиб, нутқида нуқсони бор болалар учун логопед хизматидан фойдаланиш имконияти яратилди.
Ўқув марказида ташкил этилган ноанъанавий таълим-тарбия услуби, марказда фаолият олиб борувчи малакали мутахассис ўқитувчиларнинг изланувчанлиги туфайли қисқа фурсат ичида катта қизиқиш ва эътибор билан фарзандларини ўқув марказига етаклаб келувчи ота-оналар сафи ошди. Ўқув марказида таълим олаётган болажонлар орасида ноёб қобилиятли вундеркинд болалар пайдо бўлди.
Айни пайтда "Venus academy" ўқув марказида 20 нафар мутахассис ўқитувчилар болажонларга ўзлари ва ота-оналари танлаган йўналишлар бўйича таълим-тарбия беришмоқда.
Ташкил этилганига 5 йил бўлган мазкур таълим даргоҳида ўтган давр мобайнида 4 минг нафардан ортиқ иқтидорли ўқувчилар таълим-тарбия олишди. Ўқув марказида таълим олган ўқувчиларнинг 70 фоизи мамлакатимиздаги нуфузли олий таълим муассасаларида таҳсил олишмоқда.Улардан 3 нафари Vestminster университети талабалари бўлишди. 2 нафар битирувчи эса айни пайтда Германия давлатида ўқишни давом эттиришмоқда.
Ўқув марказининг хотираси кучли, вундеркинд ўқувчилари орасида ментал арифметика бўйича Қорақалпоғистон чемпионатларининг ғолиблари ва Ўзбекистон, шунингдек, мазкур йўналишда Тошкент, Самарқанд ва Хива шаҳарларида бўлиб ўтган мусобақаларнинг ғолиб ва совриндорлари бор. Қардош Қирғизистон давлатида бўлиб ўтган ментал арифметика бўйича халқаро мусобақаларда эса ўқув маркази ўқувчилари фахрли 2-ўринни қўлга киритдилар.
– Қобилиятсиз бола бўлмайди, – дейди ўқув маркази раҳбари Зуҳрахон Ерлапасова, – биринчи галда ота-она ўз фарзандининг қизиқишларини шунчаки болалик орзуси-да, деб эътиборсиз қолдирмаслиги, у билан катталардай муомалада бўлиши, қизиқишларини маълум маънода рағбатлантириб бориши зарур. Айниқса, ширин, катта орзулар оғушида учиб-қўниб юрган болага ножўя гап айтиб, камситиш керак эмас. Бундай хатти-ҳаракати билан ота-она боласининг орзу-умидини, энг ёмони, кўнглини синдиради. Кўнгли синган боланинг нутқида нуқсонлар пайдо бўлади. Ота-онасига бирон фикр айтишдан ҳадиксираб қолади. Логопед йўналишига қабул қилинган, нутқида нуқсони бор болаларнинг аксарияти ана шундай нотўғри муомала ва оиладаги носоғлом муҳит – уруш- жанжаллар таъсиридаги стресслар туфайли қўрқув исканжасидаги болалардир. Бундай болалар билан тажрибали логопед-ўқитувчилар тизимли равишда машғулотлар олиб бориш орқали самарали натижаларга эришишмоқда.
Ақл бовар қилмас катта-катта сонларни бир зумда, ёддан ҳисоблаб бераётган, инглиз тилида ва рус тили бўйича мактабга тайёрлов гуруҳларида тутилмасдан, ўқитувчисига бурро-бурро жавоб бераётган, логопед-ўқитувчиси кўмагида нутқидаги нуқсонлардан халос бўлиб, қувонаётган ва математика гуруҳи ўқувчиларининг энг мураккаб мисол, масалаларни аниқ, пухта ечишнинг уддасидан чиқаётганидан ота-оналар мамнун.
Фарзандини етаклаб, "Зуҳрахоннинг мактаби шуми?" деб келаётганларни кўриб, таълим -тарбия соҳасидаги тадбиркорликнинг бу каби муваффақиятидан биз ҳам қувондик. Ўқув маркази педагогика жамоасига амударёлик билимдон ёшларни тарбиялаш йўлидаги эзгу ишларида ютуқлар тиладик.
Робия Йўлдошева.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
