МАКТАБГАЧА ТАЪЛИМ ТАШКИЛОТЛАРИДА СОҒЛОМ ОВҚАТЛАНТИРИШНИ ТАШКИЛ ЭТИШ БЎЙИЧА СЕМИНАР-ТРЕНИНГ ЎТКАЗИЛДИ

Амударё туманида Мактабгача ва мактаб таълими бўлими томонидан МТТларда фаолият юритаётган ҳамширалар ва ошпазлар учун соғлом овқатлантиришни ташкил этиш, озиқ-овқат маҳсулотлари ҳамда таомларнинг хавфсизлиги ва сифатини кафолатлаш, тарбияланувчиларнинг соғлом ва баркамол ўсишини таъминлаш, сифатли таомлар тайёрлаш, гигиеник талабларга амал қилиш каби масалалар юзасидан семинар-тренинг ташкил этилди.

18 январь куни бўлим фаоллар залида ўтказилган мазкур семинар-тренингни туман Мактабгача ва мактаб таълими бўлими бошлиғи Я.Шомуродов, Қорақалпоғистон Республикаси Ошпазлар уюшмаси раиси Г.Юлдашев, Ўзбекистон Республикаси Ошпазлар уюшмаси ўқитувчиси Н.Бекчанов, туман Санитария-эпидемиологик тинчлик ва жамоат саломатлиги бўлими, Санитария-гигиена бўлинмаси мудираси Н.Ешимова, бўлим лабораторияси мудири Р.Гулманова ҳамда тумандаги МТТлар ҳамширалари, ошпазлари қатнашишди.

Семинар давомида Ўзбекистон Республикаси Мактабгача ва мактаб таълими вазирлиги ҳузуридаги Мактабгача таълим агентлиги, Ўзбекистон Республикаси Санитария-эпидемиологик осойишталик ва жамоат саломатлиги қўмитасининг қарори асосида давлат мактабгача таълим ташкилотларида жорий этилган ягона мавсумий таомноманинг баҳор мавсуми учун мўлжалланган баҳорги таомномани тузиш афзаллиги тўғрисидаги, давлат МТТларида Ўзбекистон Республикаси Мактабгача таълим ташкилотларида тарбияланаётган болаларни хавфсиз ва сифатли овқатлантиришни ташкил этишга оид гигиеник талабларга амал қилиниши жараёнларига оид, МТТларда тарбияланувчиларнинг соғлом овқатланишини ташкил этиш учун ягона мавсумий таомномаларни амалда қўллаш ва баҳорги таомномадаги таомларни тайёрлаш технологияси қоидалари ҳақидаги масалалар кўриб чиқилди.

Йиғилишда ушбу масалалар юзасидан маърузалар қилинди ва кенг тарзда муҳокамалар бўлиб ўтди.

Тадбир давомида Ўзбекистон Республикаси Ошпазлар уюшмаси ўқитувчиси Н.Бекчанов томонидан “Ақлвой-ошпаз, боғчалар учун таомлар рецепти” тўпламидан фойдаланилган ҳолда тузилган ягона намунавий мавсумий таомномалар асосида баҳорги таомларни тайёрлаш, маҳсулотларга технологик ишлов бериш, тайёр таомларни тайёрлаш технологиялари кўрсатиб ўтилди. Бундан ташқари, ошпазлар иштирокида бўлиб ўтган маҳорат дарсида санитария-гигиена қоидалари, таом тайёрлашда эътибор берилиши лозим бўлган меъёрлар ҳамда маҳсулот тайёрлашнинг янгича усуллари каби масалалар юзасидан тажриба алмашилди.
Семинар-тренинг давомида Ошпазлар уюшмаси томонидан малака оширган ошпазларга диплом ва сертификатлар топширилди. Шунингдек, бир гуруҳ ходимлар 8 март – Халқаро хотин-қизлар байрами муносабати билан МТТларда соғлом овқатлантиришни ташкил этишга қўшаётган ҳиссаси ва самарали фаолияти учун Мактабгача ва мактаб таълими бўлимининг фахрий ёрлиқлари билан тақдирланди.

С.Патуллаева, туман Мактаб ва мактабгача таълим бўлимининг методисти.