36-СОНЛИ МАКТАБДА БОБОКАЛОНЛАР ТАВАЛЛУДИГА БАҒИШЛАБ “ИККИ БУЮК СИЙМО” ДЕБ НОМЛАНГАН ТАДБИР ТАШКИЛ ЭТИЛДИ

Мамлакатимизда улуғ аждодларимиз Алишер Навоий ва Заҳириддин Муҳаммад Бобурларнинг таваллуд куни кенг нишонланади ва ушбу саналар муносабати билан турли тадбирлар, маънавий-маърифий, адабий-бадиий кечалар ўтказилади. Тадбирларда ўсиб келаётган ёш авлод буюк бобокалонларга фахру-ифтихорини яққол намоён этиб, ўз эҳтиромини кўрсатишга ҳаракат қилади.

9 февраль куни Амударё туманидаги 36-сонли мактабда ҳам “Икки буюк сиймо” деб номланган тадбир ташкил этилди. Мактабнинг бошланғич синф ўқитувчиси Насиба Бобожонова ҳамда унинг раҳбарлигидаги 2-“А”синф ўқувчилари томонидан тайёрланган ушбу тадбирни мактаб директорининг маънавий-маърифий масалалар бўйича ўринбосари Ваҳобжон Давлетов очиб берди. У ўз сўзида буюк бобокалонларимиз ҳаёти ва ижодига кенг тўхталиб ўтди. Икки буюк сиймо – сўз мулкининг султони Мир Алишер Навоий, улуғ шоир ва давлат арбоби Заҳириддин Муҳаммад Бобур ҳаёти ва ижоди, улар қолдирган улкан адабий мероснинг ёшлар тафаккурини ўстиришдаги, дунёқарашини бойитишдаги беқиёс аҳамияти хусусида сўз юритди.

Шундан сўнг, синф раҳбари Насиба Бобожонова ҳамда ўқувчилар Алишер Навоий ва Бобур ижодига мансуб ғазал ва рубоийлардан ёд айтишди. Ифодали тарзда айтилган ғазал ва рубойилар томошабинларга ниҳоятда манзур бўлди. Айниқса, жажжи ўқувчилар ижросидаги саҳна кўринишлари, улар гавдалантирган Алишер Навоийнинг ёшлиги, Заҳириддин Муҳаммад Бобурнинг қалбидаги Ватанга муҳаббат ва соғинч ҳисларини акс эттиришга ҳаракат қилишлари барчани ниҳоятда таъсирлантирди. Қизлар эса дилрабо рақс ва қўшиқлари билан кечага янада файз киритдилар.

Тадбирда ўқувчилар икки буюк сиймо ҳақида олган билимларини савол-жавоб тарзида синаб кўришди. Навоий ва Бобур ҳаёти, ижоди ҳақидаги саволларга тўлиқ жавоб беришга харакат қилган ўқувчилар Бобур меросини чуқур ўрганишгани барчани қувонтирди.

Тадбир давомида ҳар икки ижодкор дунё адабиёти тарихида жуда катта ўрин тутиши, халқпарвар давлат арбоби сифатида жамиятда тутган юксак мавқеи жиҳатидан ҳам, илм-фан, маданият ва санъат, адабиёт аҳлига кўрсатган ҳомийлиги жиҳатидан ҳам ўхшаши йўқ сиймо эканлиги, улар бугун ўзбек халқининг миллий ифтихорига, адабий, маънавий камолот тимсолига айлангани таъкидланди.

Навоий ҳам, Бобур ҳам буюк давлат арбоби бўлишгани, Бобур моҳир саркарда сифатида ақл-заковати ва шижоати билан Ҳиндистонда Бобурийлар сулоласига асос солгани, ўзбек тилида ёзилган “Бобурнома”, “Мубаййин”, “Хатти Бобурий”, “Ҳарб иши”, Мусиқа сирлари”, “Қофия илми” каби асарлари билан жаҳоннинг машҳур тарихнавис олимлари қаторидан жой олгани тўғрисидаги фикрлар билдирилди.

Шундан сўнг, ўқувчилар ўртасида Навоий ва Бобур бобокалонларимиз ҳаёти тўғрисида диктантлар танлови ўтказилди. Зукко ўқувчилардан Дилфуза Йўлдошева, Лазиз Турсунбоев, Чаросой Солиева, Аслиддин Юсупов, Жавоҳир Мадатов, Умрбек Баширов, Шириной Бахтиёровалар ушбу танловда фаол иштирок этиб, зеҳнли, билимли эканлигини, иқтидорини кўрсатишди.

Халқимиз маънавий дунёсининг юксалишига улкан ҳисса қўшган икки буюк шахс – Алишер Навоий ва Заҳириддин Муҳаммад Бобур таваллуди муносабати билан ташкил этилган тадбир барчага манзур бўлди. Ўқувчилар ҳам икки ижодкорнинг ҳаёти, фаолияти, ижодий мероси ҳақидаги билимларини янада мустаҳкамлаб олдилар.

О.Худойберганова.