ЧОРДАРА МАҲАЛЛАСИНИНГ ЖОНКУЯР КАЙВОНИ ОНАЛАРИ

Ватан ичра кичик Ватан ҳисобланмиш оилалардаги тинчлик-осойишталик жамиятимизнинг тинч-осойишталигини таъминлайди.

Ҳаёт мураккаб жараён эканлиги исбот талаб қилмайдиган ҳақиқат. Оиланинг тинч, унда дунёга келган фарзандларнинг соғлом, маънавиятли, маърифатли бўлиб улғайиши ота ва онага боғлиқ. Эр ва хотиннинг ўзаро тотувлиги, ўз бурчларини адо этишлари, қўни-қўшнилар, туғишганлар, қариндошлар билан аҳил-иноқ муносабатлари оила аталмиш қўрғоннинг мустаҳкамлигига пойдевор бўлади. Чор-атрофимизга назар солсак, ҳавас қилгулик оилалар бисёр. Афсуски, ўзаро келишмовчиликлар, низолар сабаб парокандаликка учраётган оилалар ҳам йўқ эмас.

Амударё туманининг овул ва маҳаллаларида фаолият юритаётган хотин-қизлар фаоллари ва кўчабошчи аёллар оилаларда соғлом муҳит, аҳиллик барқарор бўлиши йўлида саъй-ҳаракатлар олиб боришаяпти.

Манғит шаҳрининг Чордара маҳалласида оилавий низоларни тинч йўл билан ҳал этиш, қариндошлар, қўни-қўшнилар ўртасидаги бузилган муносабатни тиклашда фаоллик кўрсатаётган кайвони онахонлар фаолияти билан танишиш мақсадида шу йилнинг 22 январида amunews.uz веб-сайти таҳририяти ходимлари мазкур маҳаллада бўлишди.

Сайт таҳририяти томонидан амалга оширилаётган “Соғлом муҳит – соғлом ҳаёт” номли грант лойиҳаси иш режасига кўра маҳаллада олиб борилган ўрганишлар ушбу ҳудуднинг яшил тоифада туришида кайвони онахонлар, нуроний отахонларнинг ҳиссаси катта эканлигини яққол кўрсатди.

Маҳалланинг 15 та кўчаларидаги хонадонларда 36 минг нафардан ортиқ аҳоли истиқомат қилади. Уларнинг орасида ижтимоий қўллаб-қувватлашга муҳтож оилалар, ёлғиз яшовчи кексалар ҳам бор. 14 нафар кўчабошчи аёллар маҳалла хотин-қизлар фаоли Саида Юсупова билан ҳамкорликда ўз ҳудудларидаги аҳоли ҳолидан тез-тез хабар олиб, уларнинг ҳаётидаги муаммоларини жойида ҳал этишга, оилаларда соғлом маънавий муҳит ҳукмрон бўлишига ҳаракат қилишаяпти.

Ҳаёт йўллари доимо равон эмас. Аммо дуч келган ўзаро тушунмовчилик ё келишмовчилик оқибатида оилаларнинг бузилиб кетишининг олдини олишда, ёш оилаларга кириб, ҳаётий маслаҳатлар бериб, ўзаро аҳилликда яшашга даъват этишда кайвони онахонларнинг хизмати улкан бўлаётир. Уларнинг маҳалла хотин-қизлар фаоли Саида Юсупова билан биргаликдаги саъй-ҳаракатлари натижасида ажрим ёқасига келиб қолган, суднинг якуний қарори қабул қилиниши арафасида турган 3та оила яраштирилди ва 8 нафар норасида ўғил-қизлар ота-онаси бағрида беғам, бахтиёр яшайдиган бўлди, ўзаро низога борган 4та қўшни оила, 2 нафар аразлашган туғишганлар яраштирилди.

Салкам 80 ёш остонасига борай деб турган, турмуш ўртоғи бевақт вафот этиб, беш нафар фарзандни ёлғиз ўзи оқ ювиб, оқ тараб вояга етказиб, ҳаётда ўз ўринларини топишларига эришган ҳожи она Ўғилжон Ўрозова маҳалла хотин-қизлар фаолининг яқин кўмакчиси, кўчабошчи аёллар сардори, дейиш мумкин.

Онахон интилишда, маҳалла ҳаёти учун ҳаракат қилишда ёшлардан қолишмайди. У чор-атрофидаги кўчаларни ҳам айланиб, маҳалладошлари ҳолидан хабар олади, ҳовлиси чор-атрофини супураётган, йўллар бўйидаги дарахтларга шакл бераётган қизларни, йигитларни кўрганида уларга раҳмат айтиб, алқайди, дуо қилади. Шўх-шодон ўйнаб юрган болажонларнинг имон-инсофли, ақлли инсонлар бўлиб вояга етишини тилайди.

Онахон оиласидаги арзимаган келишмовчилик, қийинчиликларга сабрсизлик қилаётган айрим ёшларга ўз ҳаётидан сўзлайди. Айтишича, онахоннинг турмуш ўртоғи вафот этганида кичик фарзанди бир ярим яшар бўлган экан. Беш нафар фарзандни ёлғиз ўзи туман Тиббиёт бирлашмасида кичик ҳамшира бўлиб ишлаб боққан, ёлғиз боши билан уларни ўқитиб илмли, касб-ҳунарли қилган экан.

Не бир машаққатларни сабр-бардош билан енгиб ўтган онахон куни кеча чевараси уйланган тўйга ҳам бош бўлди.

Маҳалланинг яна бир кайвони онахони Ҳайитгул Ражабова таълим фахрийси. Умр бўйи туманимиздаги 67-сонли, 36-сонли мактабларда ўқувчиларга она тили ва адабиёт фанидан дарс берган онахон ҳозир 66-ёшда, тўрт нафар ўғилни вояга етказиб, эл ҳавас қилгудай даражага етказган, уч нафари ички ишлар органларида, бири эса тадбиркорлик компаниясида меҳнат қилади. Икки нафари Тошкент шаҳрида, бири Самарқанд шаҳрида, бири Манғитда яшайди. Ота-она улар орасида талаш. Бироқ умргузаронлик қилган маҳалласини, қўни-қўшниларини соғиниб, қай бириникига борса-да, ўз уйига қайтгиси келаверади. Маҳалласи, кўчаси тинч-тотувлигига ўзини масъул ҳисоблайди.

Улар каби аждодларимиз анъананалари, урф-одатлари, қадриятлари қадрини улуғ тутиб, эл осойишталиги йўлида фидойилик қилаётган нуронийлар юртимиз файзи, фариштаси. Биз уларга узоқ умр, куч-қувват тилаб қоламиз.

Ойгул РАЖАБОВА.