“ЖАҲОЛАТГА ҚАРШИ МАЪРИФАТ БИЛАН” МАВЗУСИДА ТАДБИР ЎТКАЗИЛДИ

Амударё телевидениеси таҳририятининг “Юксак маънавиятли ва ахлоқли ёшлар – келажак пойдевори” номли грант лойиҳаси доирасида туманнинг барча ҳудудларида ёшларнинг маънавиятини юксалтириш, улар онгида Ватанга муҳаббат миллий ва умуминсоний қадриятларга садоқат руҳини шакллантириш мақсадида турли тадбирлар ташкил этилиб келинмоқда. Ушбу тадбирлар ёшларнинг бўш вақтини мазмунли ўтказишларида, дунёқарашни кенгайтириб, маънавий дунёсини бойитишда, жамиятда ижтимоий-маънавий муҳитни соғломлаштиришда муҳим аҳамият касб этмоқда.

20 декабрь куни 16-сонли ихтисослаштирилган давлат умумтаълим мактабида грант лойиҳаси режасига мувофиқ “Жаҳолатга қарши маърифат билан” мавзусида маънавий-маърифий тадбир ўтказилди.

Ёшларни миллий ва умуминсоний қадриятларга ҳурмат руҳида тарбиялаш, уларнинг маънавиятини юксалтириш, келажагимиз эгаларини “оммавий маданият” ниқоби остидаги маданиятсизликнинг зарарли таъсирларидан ҳимоя қилишга қаратилган ушбу тадбирда Дин ишлари бўйича қўмитанинг Амударё туманидаги бош мутахассиси Музаффар Шеримбетов, Республика Маънавият ва маърифат маркази туман бўлими мутахассиси Маҳмуд Эшмановлар қатнашишди. Шунингдек, грант лойиҳаси ижрочилари, таҳририят ходимлари ҳамда мактаб ўқитувчи ва ўқувчилари ҳам иштирок этишди.

Тадбирда дастлаб грант лойиҳаси доирасида амалга оширилаётган ишлар, ҳудудларда ўтказилаётган турли тадбирлар, ёшларни китобхонликка жалб этишга қаратилган танловлар, адабий кечалар, ижодкорлар билан учрашувлар ҳақида сўз юритилиб, батафсил маълумотлар берилди. Ушбу тадбирлар ва грант лойиҳаси доирасида тумандаги оммавий ахборот воситаларида ёритилаётган турли мақолалар, ёшларнинг ижод намуналари барчага манзур бўлаётгани таъкидлаб ўтилди.

Шундан сўнг, Дин ишлари бўйича қўмитанинг Амударё туманидаги бош мутахассиси Музаффар Шеримбетов, Республика Маънавият ва маърифат маркази туман бўлими мутахассиси Маҳмуд Эшмановлар ташкилот ходимлари томонидан амалга оширилаётган ишлар хусусида кенг тўхталишди. Ундан ташқари, “оммавий маданият”нинг зарарли таъсири, мафкура майдонининг турли хуружлари, улардан ҳимояланиш борасида ҳам сўз юритишди.

Тадбир давомида XXI аср – глобаллашув жараёнида ёшларнинг радио-телевидение, матбуот, интернет каби воситалар орқали ахборот ва маълумотлар олаётгани, бу жараёнда баъзи бир ақидапараст оқимлар ёшларга мафкуравий таъсир ўтказишга уринаётгани ҳамда уларнинг олдини олиш борасида нималарга эътибор қаратиш лозимлиги айтиб ўтилди. Шунингдек, бугунги кунда жаҳолатга карши маърифат билан курашиш ҳар қачонгидан кўра муҳим аҳамият касб этаётгани, бунда ёшларнинг миллий қадриятларга содиқ, ошкора ва пинҳона кўринишдаги ғоявий таҳдидларга қарши курашадиган қилиб тарбиялаш лозимлиги эътироф этилди.

Ушбу тадбир таъсирчанлигини янада ошириш мақсадида ёшларга “Адашганлар” номли видеоролик ҳам намойиш этилди. Мазкур видеороликда ёшлар онгига таъсир ўтказишга ҳаракат қилаётган миссионерлик оқимларидан бири бўлган «Иегово шоҳидлари» ташкилотига аъзо бўлганлар қандай оғир ишга қўл урганларини, икки дунёларини ўз ҳатти-ҳаракатлари билан барбод этганларини, ғоявий-мафкуравий таҳдид сифатида давом этаётган миссионерлик фаолияти ва шу кабилардан доимо огоҳ бўлиш кераклигини англаб, ёт ғоялар хатар ва хавф манбаи эканлиги тўғрисида аниқ тасаввурга эга бўлдилар.

Видеоролик намойишидан сўнг, Ислом динини ниқоб қилган бузғунчи оқим ва ҳаракатларнинг ғайриисломий фаолиятлари моҳияти аниқ фактлар асосида очиб берилди. Шунингдек, «Жаҳолат», «Маърифат» тушунчалари, тинчлик ва барқарорлик, глобаллашув жараёни, «оммавий маданият», маърифатпарвар, тинчликпарвар жамиятимиздаги мавжуд қонунчилик хусусида батафсил маълумотлар берилиб, фикр алмашилди.

Амударё телевидениесининг “Юксак маънавиятли ва ахлоқли ёшлар – келажак пойдевори” номли грант лойиҳаси доирасида ташкил этилган “Жаҳолатга қарши маърифат билан” мавзусидаги маънавий-маърифий тадбир барча иштирокчиларда катта таассурот қолдирди.

О.Худойберганова