16-ва 26-сонли мактабларда Конституция куни муносабати билан тадбирлар ўтказилди

Ҳар йили 8 декабрь – мамлакатимизнинг Асосий Қонуни – Конституциямиз қабул қилинган кун улкан тантана қилинади. Боиси, давлатимизнинг эркин ва адолатли фуқаролик жамиятига асосланган демократик давлат бўлишида Конституциямизнинг аҳамияти чексиз.

Мазкур ҳужжат давлат суверентети ғояларига йўғрилгани ва инсон шаъни, ҳуқуқларини муқаддас деб эътироф этгани билан, фуқароларнинг муносиб ҳаёт кечиришларини, тинч-тотувлигини таъминлашга хизмат қилаётгани билан ҳам ҳар биримиз учун азиздир. Шунинг учун ҳам ҳар йили Конституция қабул қилинган кун юритимизда кенг тантана қилинади. Сана муносабати билан мактабгача таълим, умумий ўрта таълим муассасаларида Конституция мазмун-моҳиятини тарғиб этишга бағишланган турли маънавий-маърифий тадбирлар ўтказилади, “Конституциямизни ўрганамиз” мавзусида дарслар ўтилади, ўқувчиларнинг Асосий Қонунимиз ҳақидаги билимларини синовдан ўтказиш учун турли танловлар ўтказилади.

Амударё туманининг Босув маҳалласида фаолият юритаётган 26-сонли умумий ўрта таълим мактабида ҳам Конституциямиз қабул қилинган куннинг 31 йиллиги кенг тантана қилинди.

Мактабнинг 3 “Б” синфида “Конституция – бахтимиз қомуси” деб номланган маънавий-маърифий тадбир ўтказилди. Унда синф ўқитувчиси Роза Гулмонова Конституция ҳақида, ёш авлоднинг таълим-тарбия олиши, баркамол бўлиб вояга етишида давлатимизнинг амалга ошираётган ғамхўрлиги хусусида батафсил тушунчалар берди.

Ўқувчилар мавзуга оид шеърлар ижро этдилар. 6 “Б” синф ўқитувчиси Кумушой Холимбетова “Конституция – бахтимиз кафолати” мавзусида синф соати ўтди. Синф соатида Конституция ҳақида маъруза тингланди ва бу борадаги ўқувчиларнинг фикр-мулоҳазаларига ҳам кенг ўрин берилди. Муаллима барча фикрларга муносабат билдириб, дарсга якун ясади.

Шу куни мактабнинг 5-7 синфлари ўқувчилари ўртасида Конституция мазмун-моҳиятини ифода этувчи расмлар танлови бўлиб ўтди. Белгиланган муддат ичида ўқувчилар чизган суратларини ўқитувчилар жамоасидан тузилган ҳакамлар ҳайъати аъзолари одилона баҳоладилар. Натижаларга кўра, Жаҳонгир Ражаббоев, Шодибек Аҳмадов, Қамарой Худойбергановалар чизган расмлар энг мазмунли ва мақсад аниқ ифода этилган, деб топилди. Фан ўқитувчиси Наргиза Авазмуротова танлов ғолибларини эълон қилди ва тақдирлади.

Сана муносабати билан мактабнинг ҳуқуқшунослик фани ўқитувчиси Нилуфар Саъдуллаева 9 “А” синфда “Конституциямиз ҳақидаги билимларимиз” мавзусида давра суҳбати ўтказди.

Давра суҳбатида ўқувчилар Конституция ҳақидаги фикр мулоҳазаларини билдирдилар ва мазкур ҳужжат юртимизнинг ёши, жинси, мавқеидан қатъий назар, ҳар бир фуқароси учун эмин-эркин яшаши, муносиб шароитларда меҳнат қилиши, ўқиши ва бахтиёр яшашининг кафолати эканлигини таъкидладилар.

Мавзу юзасидан 9 “Б” синф ўқувчилари орасида иншолар танлови ўтказилди. Она тили ва адабиёт фани ўқитувчиси Гулсевар Камолова ўтказган ушбу танловда Шаҳнозабону Машарипова, Дилнавоз Аҳмадовалар ғолиб, деб топилди.

Конституциямизнинг 31 йиллиги шарафига ташкиллаштирилган тадбирлар мактаб бадиий ҳаваскор ўқувчиларининг махсус концерт дастурига уланиб кетди.

Манғит шаҳрида жойлашган 16-сонли умумий ўрта таълим мактабида ҳам “Конституция – бахтимиз қомуси” деб номланган маданий-маърифий тадбир ўтказилди.

Тадбирни мактабнинг давлат ва ҳуқуқ асослари фани ўқитувчилари Маърифат Ражабова, Адолат Давековалар 7-, 8-, 9 синфлар ўқувчилари иштирокида  ташкиллаштирдилар.

Мактаб фаоллар залида бўлиб ўтган тадбирга мактаб ўқитувчилари, ўқувчилари, ота-оналар вакиллари иштирок этдилар. Унда дастлаб Конституциямиз ҳақида маърузалар ўқилди ва унинг мазмун-моҳияти ҳақида ўқувчиларга кенг тушунчалар берилди.

Айтиш жоизки Асосий Қонунимизнинг мазмун-моҳияти, унинг ҳаётимизда тутган ўрни ва аҳамиятини ўқувчилар онгига чуқур сингдиришга алоҳида эътибор қаратилмоқда. Бу мазкур тадбирда ҳам ўқувчиларнинг Конституциянинг моддаларига берган таъриф-шарҳларида яққол намоён бўлди.

Ўқувчилар ижро этган Конституция, она Ватан, тинчлик осойишталик ва бахтиёр болалик ҳақидаги шеърлар, қўшиқлар ва рақслар тадбирга яна ҳам ўзгача шукуҳ бағишлади.

Тадбир ўқувчилар намойиш этган Асосий Қонунимизнинг ҳаётимиздаги ўрни, аҳамиятини тарғиб этувчи саҳна кўриниши билан ниҳоясига етди.

Ўтказилган тадбирлар ўқувчи-ёшларга бахтимиз, тинч-осойишталигимиз, фаровон ҳаётимиз кафолати бўлган Асосий Қонунимизни кенг тарғиб этгани билан аҳамиятли бўлди.

Ойгул РАЖАБОВА.