ЭКИНЛАРНИ БИОЛОГИК УСУЛДА ҲИМОЯ ҚИЛИШ АФЗАЛЛИКЛАРИГА БАҒИШЛАНГАН СЕМИНАР БЎЛИБ ЎТДИ

Бирлашган миллатлар ташкилоти маълумотларига кўра ҳозирги кунда жаҳон аҳолисининг 815 миллион нафардан ортиғи очлик азобини тортаяпти. Тўйиб овқатланиш имконига эга бўлмаган қатлам ҳам мавжуд.

Шундай шароитда мамлакатимиз қишлоқ хўжалигида озиқ-овқат маҳсулотлари етиштиришни кўпайтириш, экин майдонлардан унумли фойдаланиш борасида амалга оширилаётган кенг кўламли ишлар туфайли халқимиз дастурхони тўкин, турмуши обод. Бу борадаги ишларнинг самарадорлигини янада ошириш мақсадида қишлоқ хўжалигида чуқур ислоҳотлар амалга оширилмоқда. Хусусан, соҳада бозор муносабатларини кенг жорий этиш, қайта ишлаш ва экспорт инфратузилмасини ривожлантириш, шу асосда фермер ва деҳқонларнинг даромадини ошириш юзасидан аниқ чора-тадбирлар кўрилаётир.

Қишлоқ хўжалиги маҳсулотлари етиштиришни кўпайтиришда экинларни карантиндаги ва бошқа иқтисодий хавфи юқори бўлган зараркунандалардан ҳимоя қилиш ҳам муҳим ўрин тутади. Зараркунандалар кўпайишининг олдини олишда экин майдонларида кузги тадбирларни сифатли ўтказиш, дала четларидаги ариқ-зовурларни сифатли тозалашнинг аҳамияти катта. Қолаверса, майдонлардаги, иссиқхоналардаги етиштирилаётган экинларни зараркунандалардан ҳимоя қилишда биологик усул муҳим ўрин тутади.

Амударё туманининг Тошёп овулида фаолият юритаётган “Манғит инвест плюс” масъулияти чекланган жамиятига қарашли иссиқхонада экинларни зараркунандалардан ҳимоя қилишда биологик усулнинг аҳамияти, феромон тутқичлардан фойдаланиш усулларига бағишланган семинар ҳам айнан шу мақсадда ўтказилди.

Тадбирга Ўсимликлар карантини ва ҳимояси агентлиги Амударё тумани бўлими ходимлари, туман қишлоқ хўжалиги соҳаси масъуллари, қишлоқ хўжалигида фаолият юритувчи тадбиркорлар иштирок этдилар.

Семинарда Қорақалпоғистон Республикаси Ўсимликлар карантини ва ҳимояси агентлиги Амударё туман бўлими ходимлари НодирбекЎрозов, Анвар Раҳимов, Мурот Ибрагимов, Улуғбек Худойбергановлар экинларни биологик ҳимоя қилишнинг афзалликлари хусусида, шунингдек, бу борада Республика Ўсимликлар карантини ва ҳимояси агентлиги томонидан ишлаб чиқилган “Agro ko’makchi” мобиль иловасидан фойдаланиш борасида маълумотлар бердилар.

“Agro ko’makchi” махсус иловаси орқали фермерлар, томорқа ер эгалари зарарли организмлар, бегона ўтлар ҳақида батафсил маълумотга эга бўлиб, уларга қарши курашиш бўйича тавсиялар олиши мумкин. Шунингдек, иловада синов ва рўйхатдан ўтган ўсимликларни ҳимоя қилиш воситалари ва минерал ўғитлар, экспорт учун очилган бозорлар, ҳудудларда фаолият юритаётган биолабораториялар, ўсимликлар клиникалари, қадоқловчи корхоналар хусусида фойдали маълумотлар жамланган.

Мамлакатимиз аҳолисининг тахминан 40 фоизи қишлоқ хўжалиги маҳсулотлари етиштириш билан шуғулланади. Бундай катта қатламни зарурий маълумотлар билан таъминлаш, ўсимликларни зарарли организмлардан тўғри ҳимоя қилиш юқори ҳосилдорлик гаровидир. Бунинг учун “Agro ko’makchi” мобиль иловасидан фойдаланишнинг ўзи етарлидир.

Семинарда бу ҳақда батафсил сўз юритилди. Мутахассислар иштирокчиларни қизиқтирган саволларга батафсил жавоблар бердилар.

Ойгул РАЖАБОВА.