Халқаро бағрикенглик кунига бағишланган тадбир ўтказилди
2023 йил 10 ноябрь куни Қорақалпоғистон Республикаси Вазирлар Кенгашининг “Ўзбекистон Республикаси Вазирлар Маҳкамасининг 2023 йил 28 октябрдаги хатига асосан 16 ноябрь – “Халқаро бағрикенглик куни” ўтказилиши муносабати билан 13-19 ноябрь кунлари Қорақалпоғистон Республикасида “Маърифат ва миллатлараро бағрикенглик” шиори остида “Бағрикенглик ҳафталиги”ни ташкил этиш ва ўтказиш тўғрисида”ги баёни имзоланган эди.
Ушбу баённомага асосан “Бағрикенглик ҳафталиги” доирасида 16 ноябрь куни Амударё туман Маданият бўлимида “Ўзбекистон – бағрикенг диёр” мавзусида маънавий-маърифий тадбир бўлиб ўтди.
Тадбирда Қорақалпоғистон Республикаси Маънавият ва маърифат маркази туман бўлинмаси ходимлари, туман Мактабгача ва мактаб таълими бўлими масъуллари, ўқувчи-ёшлар ҳамда туманимизда истиқомат қилувчи турли миллат ва элат вакиллари иштирок этдилар.
“Бағрикенглик ҳафталиги”ни ўтказишдан мақсад – жамиятимизда дўстлик ва бағрикенглик муҳитини мустаҳкамлаш, ёшларни Ватанга муҳаббат ва садоқат, миллий ва умуминсоний қадриятларни ҳурмат қилиш руҳида тарбиялаш, қардош мамлакатлар фуқаролари билан дўстлик алоқаларини ривожлантиришдан иборат.
Тадбирда сўзга чиққанлар бағрикенглик – ўзбек халқи маънавияти ва маданиятининг ажралмас қисми ҳисобланишини, Ўзбекистонда нафақат ижтимоий-иқтисодий, сиёсий соҳалар, балки бу заминда истиқомат қилиб келаётган турли миллат ва элатлар ўртасида дўстлик ришталарини янада мустаҳкамлаш, диний бағрикенглик тамойилларини қарор топтиришга ҳам алоҳида эътибор қаратиб келинаётганлигини алоҳида қайд этиб ўтдилар.
Тадбир давомида мамлакатимизда олиб борилаётган кенг кўламли ислоҳотлар марказида, аввало, инсон манфаати, унинг ҳуқуқ ва эркинликларини таъминлаш мақсади борлиги, фуқаролар манфаатларини фақатгина тинчлик ва осойишталик, ўзаро ҳурмат, меҳр-оқибат ва ҳамжиҳатлик муҳитини яратиш орқали таъминлаш мумкинлиги, Ўзбекистонда фуқароларнинг тенг ҳуқуқлилиги, ижтимоий адолат, қонун устуворлиги, миллат ва элатларнинг маданий, тил ва диний қадриятлари, анъана ва урф-одатлари ўзаро ҳурмат қилиниши хусусида фикр-мулоҳазалар билдирилди.
Шунингдек, тадбир иштирокчилари томонидан юртимизда турли миллат ва элатлар вакиллари ўртасидаги аҳил-иноқлик, ҳамжиҳатликни таъминлаш борасида амалга оширилаётган ишлар, тинчлик-осойишталик, барқарорликни сақлаш йўлида олиб борилаётган оқилона ислоҳотлар, амалий чора-тадбирлар ҳақида сўз юритилди.
Мамлакатимиз дунё давлатлари учун бағрикенглик борасида намуна бўлиб келмоқда. Сабаби, ҳозирги кунда юртимиз 140га яқин миллат ва элатлар вакиллари учун умумий уй ҳисобланади.
“Бағрикенглик ҳафталиги” доирасида ташкил этиладиган тадбирлар аҳоли, айниқса, ёш авлодни республикамизда яшаб турган турли миллат ва элат вакилларининг тили, маданияти, анъаналари ва урф-одатларини ҳурмат қилиш ҳамда ривожлантиришга, мамлакатимиз тараққиётига ўз ҳиссасини қўшишга, жамиятда кўп миллатли катта оила туйғусини, миллатлараро тотувлик ҳамда диний бағрикенгликни янада мустаҳкамлашга хизмат қилади.
Тадбирда туман Маданият бўлими томонидан миллатлараро тотувлик, диний бағрикенглик муҳитини мустаҳкамлаш, жаҳон ҳамжамияти билан дўстона алоқаларни кучайтириш, тинчлик ва барқарорликни таъминлаш, умуминсоний қадриятларни асраб-авайлаш, мамлакатлар ва халқлар ўртасидаги самимий дўстлик ришталарини боғлашга бағишланган куй-қўшиқлар ҳамда бадиий чиқишлар намойиш этилди.
Туман ҳокимлиги Ахборот хизмати
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
